މުޢިއްޒުގެ ފުރަތަމަ 100 ދުވަސް: ފުށިދިއްގަރުފަޅު ހިއްކުމުގެ ޢަމަލީ މަސައްކަތް ފަށާނެ
ރިޔާސީ އިންތިޚާބުގެ ފުރަތަމަ 100 ދުވަހުގެ ތެރޭގައި، އައު ސަރުކާރުގެ ބޯހިޔާވަހިކަމުގެ އެންމެ މުހިންމު އެއް މަޝްރޫޢު ހިންގުމަށް ކ.ފުށިދިއްގަރުފަޅު ހިއްކުމުގެ ޢަމަލީ މަސައްކަތް ފަށަން އަމާޒު ހިފައިފިއެވެ.
އިންތިޚާބީ ރައީސް ޑރ.މުޙައްމަދު މުޢިއްޒުގެ ވެރިކަމުގެ އެންމެ ފުރަތަމަ 100 ދުވަހުގެ ވަޢުދުތަކުގެ ތެރޭގައި، ޖުމްލަ 08 ދާއިރާ އަކުން ވެފައިވާ 161 ވަޢުދު ހިމެނެއެވެ.
ބޯހިޔާވަހިކަމުގެ ސިޔާސަތަށް މުޢިއްޒުގެ ސަރުކާރުން ޚާއްޞަ އިސްކަމެއް ދޭން ނިންމައިފައިވާއިރު، "ހަފްތާ 14" މަގު ޗާޓުގައިވާ ގޮތުން، ފުށިދިއްގަރުފަޅު މަޝްރޫޢުގެ ޢަމަލީ މަސައްކަތް ފުރަތަމަ 100 ދުވަހުގެ ތެރޭގައި ފަށާނެއެވެ.
ފުށިދިއްގަރުފަޅު ހިއްކުމަށް 400 މިލިއަން ރުފިޔާ އަންނަ އަހަރުގެ ބަޖެޓުގައި ވަނީ ހިމަނައިފައެވެ.
މުޢިއްޒު އިއުލާނު ކުރެއްވި މެނިފެސްޓޯގެ ދަށުން ފުށިދިއްގަރުފަޅާއި ގިރާވަރުފަޅާއި ގުޅިފަޅާއި ހުޅުމާލެ އާއި މާލެ ހިމެނޭހެން 65،000 ގޯތި ނުވަތަ ފްލެޓް ދޭނެއެވެ. އޭރުން ބޯހިޔާވަހިކަން ނުލިބޭ މީހަކު މާލެ ސަރަހައްދުގައި ނުހުންނާނެ ކަމަށް އިންތިޚާބީ ރައީސް ވަނީ ވިދާޅުވެފައެވެ.
މުޢިއްޒުގެ ބޯހިޔާވަހިކަމުގެ މެނިފެސްޓޯ އިޢުލާނު ކުރުމަށް ބޭއްވި ޖަލްސާގައި އެމަނިކުފާނު ވަނީ ފުށިދިއްގަރުފަޅުން 1،200 ހެކްޓަރުގެ ބޮޑު ސަރަހައްދެއް ހިއްކާނެ ކަމަށް ވިދާޅުވެފައެވެ. އަދި އެތަނުގައި 65،000 ގޯތި ނުވަތަ ފްލެޓް ދޭނެ ކަމަށް އެމަނިކުފާނު އިޢުލާނުކުރެެއްވިއެވެ.
