ރައީީސް މުޢިއްޒުގެ ފުރަތަމަ 100 ދުވަސް: އައްޑޫ ބްރިޖު މަޝްރޫޢުއަށް ބޭނުންވާ މަސައްކަތްތައް ފެށުން
އިންތިޚާބީ ރައީސް ޑރ.މުޙައްމަދު މުޢިއްޒުގެ ވެރިކަމުގެ އެންމެ ފުރަތަމަ 100 ދުވަހުގެ ދުވަހުގެ ލަނޑުދަނޑިތަކުގެ ތެރޭގައި އައްޑޫ ސިޓީގެ ހުޅުދޫއާއި ހިތަދޫ އާއި ދެމެދު ބްރިޖެއް އެޅުމަށް ބޭނުންވާ މަސައްކަތްތައް ފެށުން ހިމަނައިފިއެވެ.
ދަރުބާރުގޭގައި ރޭ ބޭއްވެވި ރަސްމިއްޔާތެއްގައި، ރައީސް މުޢިއްޒުގެ ސަރުކާރުގެ އެންމެ ފުރަތަމަ 100 ދުވަހުގެ ޕްލޭންގައި ހުޅުދޫ-ހިތަދޫ ބްރިޖް ހަގީގަތަކަށް ހައްދަވައި ދެއްވާނެ ކަމަށް ރިޔާސީ ކެމްޕެއިނުގައި އެމަނިކުފާނު ވެވަޑައިގެންނެވި ވަޢުދުފުޅު ފުއްދެވުމަށް ކުރަން ޖެހޭ ކަންކަން ކުރައްވާނެ ކަމަށް ހިމަނުއްވައިފައިވެއެވެ.
އައްޑޫ ބްރިޖު މަޝްރޫޢު އަކީ އައު ސަރުކާރުގެ އެންމެ ބޮޑު އެއް މަޝްރޫޢުއެވެ. އިސްކަން ދެއްވަވާނެ ތަރުތީބަށް ބަލާއިރު ވެސް، މި މަޝްރޫޢު ހިމެނެނީ ލިސްޓުގެ ކުރީ ކޮޅުގައެވެ.
ޖުމްހޫރީ ދުވަހު ދައުލަތުގެ މީޑިއާގައި އިންތިޚާބީ ރައީސް ވަނީ އެމަނިކުފާނުގެ ސަރުކާރުގައި ކުރައްވާނެ ކަންކަމުގެ ތެރެއިން އެންމެ މުހިންމު ކަންކަމަށް އަލިއަޅުވާލައްވަމުން އެއް ނަމްބަރަކީ ވެލާނާ އިންޓަރނޭޝަނަލް އެއާޕޯޓް ކަމަށާއި، އެއަށްފަހު ބޯހިޔާވަހިކަން ހިމެނޭއިރު، ތިންވަނަ، އައްޑޫ ބްރިޖް ކަމަށް ވިދާޅުވެފައެވެ.
"މިކަހަލަ ގިނަ މަސައްކަތްތަކެއް ރޭވުމުން ދަނީ އަޅުގަނޑުމެންގެ އެންމެ ބޮޑު މަޝްރޫއަކީ އެއާޕޯޓް އެއީ ނަމްބަރު ވަން ފުރަތަމަ ނިންމަން އެންމެ އިސްކަން ދޭ މަޝްރޫއު އެއީ. ޖެހިގެން ދެން އަންނަނީ ފުށިދިއްގަރުފަޅު، ދެން އައްޑޫ ބްރިޖް ޕްރޮޖެކްޓް ދެން މިހެން ހުންނާނެ ބައިވަރު މަޝްރޫއުތައް މިކަހަލަ މަޝްރޫއުތަކަށް އަޅުގަނޑުމެން ބަޖެޓްގައިވެސް ހިމަނާފައި ވާނެ. އައްޑޫގެ ޕްރޮޖެކްޓްގެ ޑީޓެއިލް ސާވޭ އާއި ޑިޒައިނާއި ކުރަންޖެހޭ ކަންކަންކޮށް، ބަޔަކު ހޯދާ ދެމަހެއް ތިންމަހެއް ތެރޭގައި ހަވާލު ކޮށްގެން މަސައްކަތް ފަށާނަން. އެހެން ހުރި ކީ ހުރިހާ މަޝްރޫއެއް ހިނގައިގަންނަން ފަށާނެ ފުރަތަމަ ދެތިން މަސް ތެރޭގައި" ޓީވީއެމްގައި އިންތިޚާބީ ރައީސް ވިދާޅުވިއެވެ.
ރާއްޖޭގެ އުމްރާނީ ތަރައްޤީގެ އެންމެ ފުރިހަމަ މަސައްކަތްތަކެއް ހިންގަވައިފައިވަނީ އިންތިޚާބީ ރައީީސްގެ ބެއްލެވުމުގެ ދަށުން، އެމަނިކުފާނުގެ ވަޒީރުކަމުގައެވެ. އެގޮތުން މާލެއާއި ހުޅުލެއާއި ދެމެދު އަޅައިފައިވާ "ސިނަމާލެ" ބްރިޖުގެ މަޝްރޫޢު ފާހަގަކޮށްލެވެއެވެ.
ަ
ު
