ބަންގްލަދޭޝްގެ ގާނޫނު ހަދާ މަޖިލީހުގެ އިންތިހާބު އަންނަ ޖެނުއަރީ މަހުގެ ހަތް ވަނަ ދުވަހު ބާއްވަން ނިންމައިފި
ބަންގްލަދޭޝްގެ ބޮޑުވަޒީރުގެ އިސްތިއުފާއަށް ގޮވާލައި އިދިކޮޅު ފަރާތްތަކުން ކުރަމުންދާ ނުރައްކާތެރި މުޒާހަރާތަކުގެ ސަބަބުން ބަންގްލަދޭޝްގައި އަންނަ ޖެނުއަރީ މަހުގެ ހަތް ވަނަ ދުވަހު ޕާލަމެންޓް އިންތިހާބު ބާއްވަން އެ ގައުމުގެ އިލެކްޝަންސް ކޮމިޝަނުން ނިންމައިފި އެވެ.
"12 ވަނަ ރައްޔިތުންގެ މަޖިލީހުގެ އިންތިހާބު އޮންނާނީ ޖެނުއަރީ މަހުގެ ހަތް ވަނަ ދުވަހު 300 ގޮނޑީގައި،" ސިޔާސީ މަސްރަހު ހައްލުކުރުމަށް ޕާޓީތަކުން މަޝްވަރާކުރުމަށް އިލްތިމާސް ކުރައްވައި ޗީފް އިލެކްޝަން ކޮމިޝަނަރު ހަބީބުލް އަވާލް ބުދަ ދުވަހު ލައިވް ޓީވީ ބްރޯޑްކާސްޓެއްގައި ވިދާޅުވި އެވެ.
ބަންގްލަދޭޝްގެ ބޮޑުވަޒީރު ޝެއިޚް ހަސީނާ އިސްތިއުފާ ނުދެއްވައިފިނަމަ އިންތިޚާބު ބޮއިކޮޓް ކުރާނެ ކަމަށް އިދިކޮޅު ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އިން ވަނީ ބުނެފައެވެ.
ހަސީނާ އަކީ ފާއިތުވި 15 އަހަރު ބަންގްލަދޭޝްގައި އިސްކޮށް ހުންނެވި ބޭފުޅެއް ކަމަށާއި، ދަގަނޑު މުށިގަނޑަކުން ވެރިކަން ކުރެއްވި ކަމުގެ ތުހުމަތު ވެސް ވަނީ ކޮށްފަ އެވެ. އިދިކޮޅު ބޮއިކޮޓް ކުރިއަށް ގޮސްފިނަމަ ހަތަރު ވަނަ ފަހަރަށް ވެރިކަމަށް ވަޑައިގަންނަވާނެ ކަން ގާތްގަނޑަކަށް ޔަގީންވެފައިވާ ކަމަށް އެކަމަނާ ދެކެވަޑައިގަންނަވަ އެވެ.
ހަސީނާގެ އެންމެ ބޮޑު ވާދަވެރިޔާ އަދި ދެ ފަހަރެއްގެ މަތިން ބޮޑުވަޒީރުކަން ކުރައްވާފައިވާ ބީއެންޕީގެ ލީޑަރު ޚާލިދާ ޒިޔާ ގޭބަންދުގައި ހުންނެވީ ކޮރަޕްޝަންގެ ތުހުމަތުތަކެއް ކުރެއްވުމާ ގުޅިގެންނެވެ.
ބީއެންޕީން 2014 ވަނަ އަހަރުގެ އިންތިހާބު ބޮއިކޮޓް ކުރި ނަމަވެސް 2018 ވަނަ އަހަރު ވަނީ ބައިވެރިވެފަ އެވެ. މުސްލިމުންގެ އަޣުލަބިއްޔަތު އޮންނަ އެ ގައުމުގެ އެންމެ ބޮޑު އިސްލާމީ ޕާޓީ ކަމަށްވާ ޖަމިއްޔަތުއް އިސްލާމީ އާއި އިސްލާމިކް އަންދުލޯން ބަންގްލަދޭޝް (އައިއޭބީ) ޕާޓީން ވެސް ވަނީ އިންތިހާބަށް ހުރަސް އަޅާނެ ކަމަށް ބުނެފަ އެވެ.
