މިއަދުން ފެށިގެން އިރާދުކުރެއްވިއްޔާ ދިވެހީންގެ އައުދާނަ ދިދައަށް އިރުއޮއްސުން ނިމުނީ: ރައީސް ޑރ. މުޢިއްޒު
މިއަދުން ފެށިގެން އިރާދުކުރެއްވިއްޔާ ދިވެހީންގެ އައުދާނަ ދިދައަށް އިރުއޮއްސުން ނިމުނީކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ. މުޢިއްޒު މިހެން ވިދާޅުވެފައި ވަނީ ދިވެހިރާއްޖޭގެ ރައީސުލްޖުމްހޫރިއްޔާކަމުގެ ޤާނޫނީ ހުވާ ކުރެއްވުމަށްފަހު ޤައުމާ މުޚާތަބު ކުރައްވާ ތަޤުރީރު ކުރައްވަމުންނެވެ.
އެމަނިކުފާނު ވިދާޅުވީ އެ ދިދަ އަޅުގަނޑުމެން ކޮންމެ ރައްޔިތަކާއި މުޚާތަބުކުރާކަމަށާއި، އެއީ މިނިވަންކަމުގެ ދިދަކަމަށެވެ. އަދި އެކަން ދައްކައިދިނުމަށްޓަކައި އެ ދިދަ ހުންނަނީ ފިންޏާއި، ހޫނާއި، އަތްވާއި އަދި ވާރޭގައި އެ ދިދަ ވިހުރޭ ކަމަށާއި އެކަމުން ބުނެދެނީ މިނިވަންކަމުގައި ކުރަންޖެހޭ ހިތްވަރާއި ބަހައްޓަންޖެހޭ ސާބިތުކަމުގެ ވާހަކަ ކަމަށެވެ.
"އެ ދިދައިގައި ކުލަތައް އެތުރިފައި ހުންނަނީ ވަކި މިންތަކަކުން ވަކި އިންތަކެއްގައި، އެއިން އެނގެނީ މިނިވަންކަމުގައި މުޖްތަމަޢެއް ނުވަތަ ޤައުމެއް ބޭއްވޭނީ ހަމަތަކަކާއި އުޞޫލުތަކެއް ހުރުމާއި އެކުގައިކަން. ވަކި ގޮތަކަށް ތަރުތީބުވެގެން ވަކި އިންތިޒާމްތަކެއްގެ މަތީގައި ބަޔަކު ތިބެގެންކަން." ރައީސް ޑރ. މުޢިއްޒު ވިދާޅުވިއެވެ.
އެހެންކަމުން، އެ ދިދަ އަޅުގަނޑުމެން ދިވެހިންނަށް ހަނދާންކޮށްދެނީ ދިވެހި ޤައުމު ހަޤީޤީ ދިވެހި ޤައުމަކަށްވަނީ ދިވެހި މުޖްތަމަޢު ދިވެހިންގެ ހަޤީޤީ ސިފަތަކުން ގުޅިލާމެހި އެކުވެރިވެ، އެހީތެރިވެގެންކަމަށާއި، ރަނގަޅުކަންކަން ދިރުވުމުގައްޔާއި، ނުރަނގަޅު ކަންކަން އިޞްލާޙުކުރުމުގައި އެކަކު އަނެކަކަށް އެއްބާރުލުން ދީގެންކަމަށްވެސް އެމަނިކުފާނު ވިދާޅުވިއެވެ.
އެއަށްފަހު، އެމަނިކުފާނުގެ ފަހަތްޕުޅުގައި ވިހުރިލާ ހުރި ދިވެހީންގެ އަގުހުރި ނިޝާންކަމުގައިވާ ދިވެހިންގެ ފަޚްރުވެރި ދިވެހި ދިދައަށް ބައްލަވާލެއްވުމަށްފަހު ރައީސް ޑރ. މުޢިއްޒު ވިދާޅުވީ މާތްﷲ ގެ އިރާދަފުޅާއެކު އެމަނިކުފާނު ހުވާކުރެއްވުމާއެކު، ދެން އެ ދިދައަށް އިރުއޮއްސުމެއް ނެތްކަމަށެވެ.
" އޭ ދިވެހީންގެ ފަޚްރުވެރި ޤައުމީ ދިވެހި ދިދަޔާ، ތިބާދެކެ އަޅުގަނޑު އިންތިހާއަށް ލޯބިވަން. ތިޔަ ހެލިލުމާއި ވިހެރިލުމުގެ މާނަތައް އިޙްސާސްކުރަން، ތިޔަ ދައްކައިދެނީ ޤައުމު ދިފާޢުކުރި މަތިވެރި ޝަހީދުންގެ ލޭފޮދު، ޤައުމު ބިނާކުރި އެންމެހާ އަޖުދާދުންގެ ފެހި ރޯޝަން، އުންމީދާއި ދިރުން، ދިވެހީންގެ ދެދުނިޔޭގެ ސަލާމަތްކަމުގައިވާ މާތްވެގެންވާ އިސްލާމްދީނުގެ ކީރިތި މޫރިތިކަން" ރައީސް ޑރ. މުޢިއްޒު ވިދާޅުވިއެވެ.
"އޭ ލޮބުވެތި ޝަރަފުވެރި ދިދަޔާ، މިއަދު މިވަގުތުން ފެށިގެން އިރާދުކުރެއްވިއްޔާ ތިޔަ އައުދާނަ ދިވެހި ދިދައަށް އިރުއޮއްސުން ނިމުނީ. މީގެ ފަހުން ތިޔަ ފަޚްރުވެރި ދިވެހި ދިދައަކީ ދިވެހިރާއްޖޭގެ ކޮންމެ ކަންކޮޅެއްގައި، ތިބާހުރި ކޮންމެ ތަނެއްގައި ތިރި ކުރުމެއްނެތި ރެއާއި ދުވާލު ސައުވީސް ގަޑިއިރު ޝަރަފާއި އިއްޒަތާއެކު ވިހުރިވިހުރި ހުންނާނެ އެންމެ ޢިއްޒަތްތެރި ނިޝާން" ރައީސް ޑރ. މުޢިއްޒު ވިދާޅުވިއެވެ.
އެމަނިކުފާނުގެ ތަޤްރީރު ނިންމަވާލައްވަމުން އެމަނިކުފާނުވަނީ ދިވެހި ރައްޔިތުންގެ ކިބައިން ބައެއްކަންކަމަށް އެދިވަޑައިގެންފައެވެ. އެގޮތުން، ދިވެހީން ދިވެހީންގެ ހަރުދަނާ ގޮތްތައް ކުރިއަށް ނެރި، އެކުވެރިކަމާއެކު އުޅުމަށާއި ބައިބައިނުވުމަށް އެމަނިކުފާނު އިލްތިމާސްކުރެއްވިއެވެ.
އަދި އެމަނިކުފާނުގެ ހިތުގެ ނިދާއަކީ ދިވެހީން ދިވެހީންގެ ރީތި އަޚްލާޤް ދައްކުވައި، ހެޔޮބަސްބުނާ ބަޔަކަށްވެ، ނުބައިބަސް ނުބުނުންކަމަށާއި، މިދިވެހި ލޮބުވެތި ފަސްގަނޑުގެ ކޮންމެ ވެލިފުކެއްގެ އަގު ދަސްކުރުމަށް ރައީސް ޑރ. މުޢިއްޒުވަނީ އިލްތިމާސްކުރައްވާފައެވެ.
