އެމްއެމްސީގައި މަސައްކަތް ކުރެއްވި ޝިއުނާއާއި މަލްޝާއަށް ޑެޕިއުޓީ މިނިސްޓަރުކަން
މާލެ ސިޓީ ކައުންސިލުގެ ތަރުޖަމާނު ކަމުގެ މަޤާމުގައި ހުންނެވި، މަރިޔަމް ޝިއުނާ(ނަންނަ) އާއި އެ ކައުންސިލުގެ މީޑިއާ އޮފިސަރު މަލްޝާ ޝަރީފު ޔޫތު މިނިސްޓްރީގެ ޑެޕިއުޓީ މިނިސްޓަރުންގެ މަޤާމަށް އައްޔަނު ކުރައްވާ ގޮތަށް ހަމަޖެހިއްޖެއެވެ.
އެ ދެ ބޭފުޅުން ވެސް މިއަދު ވަނީ މަޤާމުން އިސްތިއުފާ ދެއްވައިފައެވެ.
މަޤާމުން އިސްތިއުފާ ދެއްވައި ޝިއުނާ އޭނާ މިއަދު ވަނީ މަޤާމުގެ މަސްޢޫލިއްޔަތު އެންމެ ފުރިހަމައަށް އަދާކުރެވުނު ކަމަށް އުންމީދު ކުރައްވާ ކަމަށް ވިދާޅުވެފައެވެ.
”އަދި ކައުންސިލަށް ޚިދުމަތް ކުރުމުގެ ފުރުޞަތު ދެއްވި ކަމަށްޓަކާ ރައީސް ޑރ. މުޢިއްޒުއަށް ޝުކުރުދަންނަވަން. އަޅުގަނޑު މަޤާމްގައި ހޭދަކުރި ދުވަސްތަކުގައި މީޑިއާތަކުން ތިޔަ ބެހެއްޓެވި ގާތްކަމަށްޓަކާ ހުރިހާ މީޑިއާތަކަށް ޝުކުރު ދަންނަަވަން.“ ޝިއުނާ މީޑިއާތަކަށް ފޮނުއްވި މެސެޖުގައިވެއެވެ.
މަލްޝާއަކީ ބިޒްނަސް މެނޭޖްމަންޓުގެ ދާއިރާއިން 2016 ވަނަ އަހަރު ޑިޕްލޮމާ ހާސިލް ކުރައްވައި، 2018 ވަނަ އަހަރު ބިޒްނަސް މެނޭޖްމަންޓް އެންޑް މާކެޓިންގެ ދާއިރާއިން ޑިގްރީ ހާސިލް ކުރައްވައިފައިވާ ބޭފުޅެކެވެ.
މީގެއިތުރުން މަލްޝާ ވެސް ވަނީ، އޭނާއަށް ނޫޫސްވެރިން ދިން އެއްބާރުލުން ފާހަގަކޮށް، ޝުކުރު އަދާ ކުރައްވައިފައެވެ.
ޝިއުނާ އާއި މަލްޝާ އަކީ ރައީސް ޑރ. މުޙައްމަދު މުޢިއްޒުގެ ކެމްޕެއިނުގައި މަސައްކަތް ކުރެއްވި ދެ ބޭފުޅުންނެވެ.
