ވިހެއުމަށްފަހު، އެއްލައިލި ކުއްޖާގެ ހަށިގަނޑާމެދު ގޮތެއް ނިންމަން އާއިލާއާ މަޝްވަރާ ކުރަނީ

އދ.ދިގުރަށުގައި، ކުނިގޮނޑުގައި ކޮތަޅަކަށް ލާފައި އޮޮއްވާ ފެނުނު ތުއްތުކުއްޖާގެ ހަށިގަނޑާމެދު ގޮތެއް ނިންމުމަށް އާއިލާއާ މަޝްވަރާކުރަމުން އަންނަ ކަމަށް ފުލުހުން މިއަދު ބުނެފިއެވެ.

Ads by STELCO

ކޮތަޅަކަށް ލާފައި ދިގުރަށުގެ ކުނިގޮނޑަށް އެއްލާލާފައި އޮތް ތުއްތު ކުއްޖަކު ފެނުނީ މި މަހުގެ ތިން ވަނަ ދުވަހުއެވެ.

ފެނުނުއިރު މަރުވެފައި އޮތް އެ ކުއްޖާގެ ހަށިގަނޑު ޕޯސްޓްމޯޓަމް ހެދުމަށް އިންޑިއާއަށް ފޮނުވީ މި މަހުގެ 15 ގައެވެ.

ޕޯސްޓްމޯޓަމް ހެދުމަށްފަހު މި މަހުގެ 22 ގައި ކުއްޖާގެ ހަށިގަނޑު ވަނީ ރާއްޖެ ގެނެސްފައެވެ.

ގަސްތުގައި ކުޑަ ކުއްޖަކު މެރިކަމުގެ ތުހުމަތުގައި މި މައްސަލާގައި ވަނީ ލަންކާގެ އުުމުރުން 30 އަހަރުގެ އަންހެނެއް ހައްޔަރުކޮށް ޝަރީއަތް ނިމެންދެން ބަންދުކޮށްފައެވެ. މި މައްސަލައިގައި ހައްޔަރު ކޮށްފައިވަނީ، ސްރީލަންކާއަށް ނިސްބަތްވާ، ކުއްޖާގެ މަންމައެވެ.