އަތޮޅު ތެރޭގައި އާބަން ރީޖަންތަކެއް ކަނޑައެޅުމަށް ދިރާސާއެއް ކުރަނީ
އަތޮޅު ތެރޭގައި އާބަން ރީޖަންތަކެއް ކަނޑައެޅުމަށް ދިރާސާއެއް ކުރަން ކެބިނެޓުން ނިންމައިފި އެވެ.
މިކަން ހާމަކުރައްވާ ރައީސް އޮފީހުން މިއަދު ހަވީރު ބޭއްވި ޕްރެސް ކޮންފަރެންސްގައި އެ އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހިމް ވިދާޅުވީ އާބަން ސެންޓަރުތަކާއި އާބަން ރީޖަންތައް ތަރައްގީ ކުރުމަށްޓަކައި ހައުސިން މިނިސްޓްރީން ހުށަހެޅި ކަރުދާހަކާ މެދު ކެބިނެޓުގައި މަޝްވަރާ ކޮށްފައިވާ ކަމަށެވެ.
އެގޮތުން ނާޒިމް ވިދާޅުވީ ރައްޔިތުންގެ ބައިވެރިވުން އޮންނަ ގޮތަށް، ހިޔާލާއި މަޝްވަރާ ހޯދައިގެން، އާބަން ރީޖަންތައް ކަނޑައެޅުމަށް ކަމާގުޅޭ އިދާރާތައް ގުޅިގެން ތަފްސީލީ ދިރާސާއެއް ކުރަން ނިންމާފައިވާ ކަމަށެވެ.
ހަމަ އެހެންމެ މި ދިރާސާގެ ތެރެއިން އާބަން ޑިވެލޮޕްމަންޓް ރީޖަންގެ ގޮތުގައި ތަރައްގީ ކުރެވޭނެ ސަރަހައްދުތައް ފާހަގަކޮށް، އެތަންތަނުގައި ހިމެނޭނެ އަތޮޅުތަކާއި ރަށްތައް ފާހަގަކުރަން ނިންމާފައިވާ ކަމަށްވެސް ނިޒާމް ވިދާޅުވިއެވެ.
ނާޒިމް ވިދާޅުވީ ސިޔާސަތުތައް އެކުލެވިގެންދާއިރު، އާބަން ރީޖަނަކުން ޓޫރިޒަމާއި ދަނޑުވެރިކަން ފަދަ އިޤުތިޞާދީ ނަފާ އިތުރުކުރެވޭނެ ގޮތްތައް ވެސް ހިމެނޭނެ ކަމަށެވެ.
މީގެ އިތުރުން ނާޒިމް ވިދާޅުވީ އާބަން ރީޖަންއެއްގެ ގޮތުގައި ކަނޑައެޅޭނީ އެ ސަރަހައްދެއްގައި ހިމެނޭ ރަށްތަކުގައި ދިރިއުޅޭ ރައްޔިތުންގެ އާބާދީ 50،000 އަށް ވުރެ ދަށް ނުވާނެ ގޮތަކަށް ބަލައިގެން ކަމަށެވެ.
