ދިވެހިންގެ ހުވަފެންތައް ހަގީގަތަކަށް ހެދުމަށް، މި ސަރުކާރު އަަބަދުވެސް އޮންނާނެ: ރައީސް
ރާއްޖޭގެ ރައްޔިތުންގެ ހުވަފެންތައް ހަގީގަތަށް ހަދައި ދިނުމަށް ސަރުކާރު އަބަދުވެސް ރައްޔިތުންނާއެކު އޮންނާނެ ކަމުގެ ޔަގީންކަން ރައީސް ޑރ މުހައްމަދު މުއިއްޒު ދެއްވައިފިއެވެ.
ޔޫއޭއީގެ ދުބާއި ގައި ބޭއްވި ވާލްޑް ގަވަމަންޓްސް ސަމިޓް 2024 ރައީސް ވިދާޅުވީ އެމަނިކުފާނު ބޭނުންފުޅުވެވަޑައިގަންނަވަނީ ރާއްޖެއަކީ ދެމެހެއްޓެނިވި ތަރައްގީ ގެނައުމަށް މަސައްކަތްކުރާ، އެންމެން ބައިވެރިވާ، އުފެއްދުންތެރި ރާއްޖެއަކަށް ހެއްދުވުމަށް ކަމަށެވެ.
ރާއްޖޭގެ ހުރިހާ ރައްޔިތުން، ހާއްސަކޮށް އަންހެނުންނާއި ޒުވާނުންގެ ގާތުގައި ރައީސް އެދިވަޑައިގެންނެވީ ދެކެމުންދާ ހުވަފެން ހަގީތަކަށް ހެދުމަށެވެ.
''އެ ހުވަފެންތައް ހަގީގަތަަކަށް ހަދައި ދިނުމަށް ރައްޔިތުންނާއެކު ސަރުކާރު އޮންނާނެ'' ރައީސް ވިދާޅުވިއެވެ. ރައީސް އިޝާރާތް ކުރެއްވީ އީޖާދީ ގޮތުންނާއި އިލްމީ ގޮތުން ކުރިއަށްދާން ބޭނުންވާ ފަރާތްތަކަށް އެ ފުރުސަތު ފަހިކޮށްދޭނެ ވާހަކައެވެ.
އެއަށް ފަހު ރައީސް ވަނީ ވިޒިޓާ އިކޮނޮމީ ކޮންސެޕްޓްގެ ދަށުން އިގްތިސާދީ ދާއިރާއިން ދެމެހެއްޓެނިވި ތަރައްގީ ހޯއްދަވައިދެއްވުމަށް އެމަނިކުފާނު ގެންގުޅުއްވާ ތަސައްވުރުގެ މައްޗަށް އަލިއަޅުއްވާލައްވާފައެވެ. ފްރީ ޒޯނަކާއެކު ސެންޓްރަލް މެރިޓައިމް ބަނދަރެއް ތަރައްގީކުރުމާއި، ވެލާނާ އިންޓަރނޭޝަނަލް އެއާޕޯޓު އިތުރަށް ފުޅާކުރުމާއި، ދިވެހިރާއްޖޭގެ އެންމެ އުތުރުގައި ބައިނަލްއަގުވާމީ ޝިޕިން ރޫޓެއް ގާއިމުކޮށް، ކަނޑު ދަތުރުފަތުރާއި ވަސީލަތްތައް ތަރައްޤީކުރުމުގެ މަޝްރޫއުތައް ހިންގުމަށް ނިންމަވާފައިވާކަން އެމަނިކުފާނު ފާހަގަކުރެއްވިއެވެ.
ރާއްޖޭގައި އުފެއްދުންތެރިކަމާއި ވިޔަފާރީގެ ދާއިރާ އިތުރަށް ފުޅާ ކުރުމުގެ ގޮތުން ޓެކްނޮލޮޖީ އާއި އާޓިފިޝަލް އިންޓެލިޖެންސްގެ ވަސީލަތްތައް ބޭނުންކުރުމަށް މި ސަރުކާރުން ދޭ އަހަންމިއްޔަތު ފާހަގަ ކުރެއްވިއެވެ. އެމަނިކުފާނުގެ މެނިފެސްޓޯގެ މުހިންމު ވައުދުތައް ތަކުރާރުކުރައްވައި، ސަރުކާރު ހިންގުމާއި އާންމު ޚިދުމަތްތައް ދިނުމުގައި ކަރުދާސް ބޭނުންކުރުން ހުއްޓާލައި، އާޓިފިޝަލް އިންޓެލިޖެންސްގެ ބޭނުންކުރުމަށް ސަރުކާރުން އިސްކަންދޭ ކަމުގައި ރައީސް ވިދާޅުވިއެވެ.
ރާއްޖޭގެ ނާޒުކު ތިމާވެށީގެ މާހައުލާއި، މޫސުމަށް ކުރިމަތިވެފައިވާ ހީނަރުކަމުން އަރައިގަތުމަށް އަވަސް ފިޔަވަޅުތަކެއް އެޅުމުގެ މުހިންމުކަމުގެ މައްޗަށްވެސް ރައީސްގެ ވާހަކަފުޅު ދެއްކެވިއެވެ. އެގޮތުން އެމަނިކުފާނުގެ ވާހަކަފުޅުގައި އިއާދަކުރަނިވި ހަކަތަ 33 އިންސައްތައަށް އިތުރުކުރުމާއި، ރާއްޖޭގައި ބަޔޮސްފިއާ ރިޒަވްތަކާއި ނޭޗާ ޕާކްތައް އިތުރުކުރުމާއި، ރާއްޖޭގެ އެކި ކަންކޮޅުތަކުގައި ފަސް މިލިއަން ގަސް އިންދުމާއި، ކާބޯތަކެތި ދަތިނުވެ ލިބޭނެކަން ކަށަވަރު ކުރުމުގެ ގޮތުން ފުޑް ސެކިއުރިޓީ ގާއިމްކުރުމަށްޓަކައި ވާޓިކަލް ދަނޑުވެރިކަން ކުރެވޭނެ ގޮތްތައް ހޯދުމާއި، މޫސުމަށް އަންނަ ބަދަލުތަކަށް ވިލުންތެރި ފިޔަވަޅު އެޅުމަށް އިސްކަންދީ، 20 އަހަރަށް އެކުލަވާލާ ތަރައްގީގެ ޕްލޭނެއް ތަންފީޒުކުރުން ހިމެނޭކަން ފާހަގަކުރެއްވިއެވެ.
މިއަހަރުގެ ވާލްޑް ގަވަމަންޓްސް ސަމިޓްގެ ތީމަކީ "ޝޭޕިންގ ފިއުޗާ ގަވަމަންޓްސް"އެވެ. މި ސަމިޓުގައި ސަރުކާރުތަކުންނާއި ބައިނަލްއަގްވާމީ އެކިއެކި ޖަމުއިއްޔާ ޖަމާއަތްތަކާއި ޕްރައިވެޓް ސެކްޓާ އަދި އެކި ދާއިރާތަކަށް ހާއްސަ ލީޑަރުން ބައިވެރިވެ މުސްތަގްބަލަށް ހުރި ގޮންޖެހުންތަކާ ގުޅޭގޮތުން މަޝްވަރާކޮށް، ކުރިއަށް އޮތް ޖީލުތަކުގައި އަންނަ ސަރުކާރުތައް ބާރުވެރިކުރުމަށް ކުރަންހުރި ކަންކަމާ ގުޅޭގޮތުން މަޝްވަރާތައް ކުރެވޭނެއެވެ.
