ފިހާރައިގައި އަލިފާން ރޯވީ ކަރަންޓު ޝޯޓު ވެގެން ކަމަށް ބެލެވޭ، ހަތް ލައްކަ ރުފިޔާގެ ގެއްލުން
މިއަދު މެންދުރު މާލޭގެ ފިހާރައެއްގައި ހިނގި އަލިފާނުގެ ހާދިސާ ހިނގާފައިވަނީ ކަރަންޓު ޝޯޓަކުން ކަމަށް ބެލެވޭ ކަމަށާއި ފިހާރައަށް ހަތް ލައްކަ ރުފިޔާގެ ގެއްލުމެއް ލިބިފައިވާ ކަމަށް ލަފާ ކުރެވޭ ކަމަށް އެފިހާރައިގެ ވެރިފަރާތުން ބުނެފިއެވެ.
މިއަދު މެންދުރު 13:30 ހާއިރު އަލިފާން ރޯވެފައިވަނީ މަޖީމަގާއި ޖަނަވަރީމަގު ގުޅޭ ކަންމަތީގައި ހުންނަ "ވެސްޓަޔާ" ކިޔާ ފިހާރައެއްގައެވެ. އެފިހާރައިގެ މުދާތައް ވަނީ އެއްކޮށް އަނދާ ހުލިވެފައެވެ.
އޮންލައިން ނޫސް "ސަން" އިން ބުނެފައިވަނީ އެފިހާރައިގައި އަލިފާން ރޯވީ ކަރަންޓު ޝޯޓެއް ވެގެން އެއާކޮންޑިޝަނުގައި ކަމަށް ފިހާރައިގެ ވެރި ފަރާތް ޙަސަން ޒުބެއިރު މައުލޫމާތު ދިން ކަމަށެވެ.
"މަގުން ދިޔަ ބަޔަކު ބުނޭ، ފިހާރައިގައި ހުރި ޖިންސްތަކެއްގައި ރޯވެފައި ހުއްޓާ ފެނުނު ކަމަށް. ބޮޑަށް ބެލެވެނީ ފިހާރައިގައި ރޯވީ، ކަރަންޓް ޝޯޓަކުން ކަމަށް،" ޒުބައިރު ބުނެފައިވެއެވެ.
އަލިފާނުގެ މިހާދިސާގެ ސަބަބުން ފިހާރައަށް ހަތްް ލައްކަ ރުފިޔާއެއްހާ ގެއްލުން ލިބުން ކަމުގައި ވިޔަސް، އެއްވެސް މީހަކަށް މިހާދިސާގައި އަނިޔާއެއް ލިބިފައެއް ނުވެއެވެ.
އެފިހާރައިގެ މަސައްކަތު މީހަކު ބުނި ގޮތުގައި އެފިހާރައިގައި އަލިފާން ރޯވީ، ނަމާދު ވަގުތައް ފިހާރަ ބަންދު ކޮށްފައި ވަނިކޮށެވެ. އެހެންކަމުން އެގަޑީގައި ފިހާރައިގައި އެއްވެސް މީހަކު ނެތެވެ.
