ކުދިން އުފަންވުން މަދުވުމުން ގައުމީ ތަރައްގީއަށް ހުރަސްއެޅޭ: ސާޖިދާ
ރާއްޖޭގައި ކުދިން އުފަންވާ ނިސްބަތް މަދުވުމުގެ މައްސަލައަށް ހައްލު ނުހޯދިއްޖެނަމަ ގައުމީ ތަރައްގީއަށް ހުރަސްއެޅެމުގެ ފުރުސަތު އެބައޮތްކަމަށް ރައީސް ޑރ މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު މިރޭ ވިދާޅުވެއްޖެއެވެ.
ރާއްޖޭގެ އާބާދީ އޮތްގޮތާއި ގުޅޭ ގޮތުން ބޭއްވި މަތީ ފަންތީގެ ބައްދަލުވުން ކަމަށްވާ "ޗޭންޖިން ޕޮޕިއުލޭޝަން ޑައިނަމިކްސްއިން މޯލްޑިވްސް" ގައި ވާހަކަފުޅު ދައްކަވަމުން ސާޖިދާ ވިދާޅުވީ ރާއްޖޭގައި އުފަންވާކުދިން މަދުވުމުގެ މައްސަލަ އަކީ ކަންބޮޑުވާ ކަމެއް ކަމަށާއި އެކަމަށް ހައްލު ގެނައުމަށް ހުރިހާ ފަރާތެއް ގުޅިގެން މަސައްކަތް ކުރަންޖެހޭ ކަމަށެވެ.
އެގޮތަށް މަސައްކަތް ނުކުރެވިއްޖެނަމަ މީގެ 20 އަހަރު ފަހުން ރާއްޖޭގެ އިގްތިސާދީ އިންޖީނު ހިންގުމަށް ވަޒީފާ އަދާކުރާނެ ވޯކް ފޯސްއެއް ނެތުމުގެ ފުރުސަތު އޮންނާނެ ކަމަށް ފަސްޓް ލޭޑީ ވިދާޅުވިއެވެ.
''...އުފަންވާ ކުދިންގެ ރޭޓަށް ބަލާއިރު ރާއްޖޭގެ މަސައްކަތްކުރާ އާބާދީ ބޮޑުތަކުން ކުޑަވެ ގައުމީ ތަރައްގީ އަށް އޭގެ ނޭދެވޭ އަސަރު ކުރާނެ. އެކަމަށް މިއަދު ލިބިފައިވާ ފުރުސަތުގައި ފިޔަވަޅު އަޅަންޖެހޭ" ސާޖިދާ ވިދާޅުވިއެވެ.
އުމުރުން ދުވަސްވީ މީހުންގެ އިޖުތިމާއީ މަރުކަޒު "އިސްރަވްވެހިންގޭ ނާދީ" އާއި ޔުނިވާސަލް ހެލްތްކެއާ އިންޝުއަރެންސް ސްކީމް، އާސަންދަގެ ދަށުން އައިވީއެފް އަދި އައިޔޫއައި ފަރުވާ ތައް ހިމަނައިގެން ކުރިއަށް ގެންދާ މަސައްކަތްތައް އެކަމަނާ ފާހަގަކުރެއްވިއެވެ.
މެ ރަސްމިއްޔާތުގައި 2022 ވަނަ އަހަރުގެ ބޯހިމެނުމުގެ ނަތީޖާގެ މައްޗަށް ބިނާކޮށް ނެރެފައިވާ ތަފްސީލީ ދިރާސާތައް ވަނީ އާއްމުކޮސްފައެވެ. އަދި އެ ނަތީޖާތަކަށް ބިނާކޮށް ރަށު ފެންވަރުގައި ތައްޔާރުކޮށްފައިވާ އައިލެންޑް ކާޑުތައް ސާޖިދާ ވަނީ އިފްތިތާހު ކޮށްދެއްވާފައެވެ.
