މިއީ ސިޔާދަތީ ބާރު އަމިއްލައަށް ހިނގަން ޖެހޭ ގައުމެއް: ރައީސް
ރާއްޖެއަކީ އިގްތިސޯދީ އަދި ސިޔާދަތީ ބާރު އަމިއްލައަށް ހިނގަން ޖެހޭ ގައުމެއް ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ދިވެހި އަސްކަރިއްޔާއިން ރާއްޖޭގެ އިގްތިސާދީ ސަރަހައްދު ބެލެހެއްޓުމަށް 560 މިލިއަން ރުފިޔާއަށް ތުރުކީން ގަނެފައިވާ ''ބައިރަކްތާރު ޓީބީ2'' ދެ ޑްރޯންގެ ހިދުމަތް ފެށުމަށް ބޭއްވި ރަސްމިއްޔާތުގައި ރައީސް ވިދާޅުވީ، ގައުމުގެ މިނިވަންކަން ދިފާއުކުރުމާއި އަމިއްލަވަންތަކަން ދިފާއުކުރުމަކީ އަމިއްލަ ހައްގެއް ކަމަށް ދެކުމަކީ ލިބޭ އެންމެ ބޮޑު ހިތްހަމަޖެހުން ކަމަށެވެ.
މިއީ ކޮންމެ ދިވެއްސަކު ވެސް ގަބޫލުކުރަން ޖެހޭ ކަމެއް ކަމަށާއި ކޮންމެ މީހަކު ވެސް ފިކުރު ތަފާތު ވިޔަސް އިސްކުރަން ޖެހެނީ ދިވެހިވަންތަކަން ކަމަށް ރައީސް ވިދާޅުވިއެވެ.
ރައީސް ވިދާޅުވީ މިއީ ކުޑަ ގައުމެއް ކަމަށް މިހާތަނަށް ދެކެމުން އައި ދެކުން ބަދަލު ކުރަން ޖެހޭ ކަމަށާއި މިއީ އިގްތިސޯދީ ސަރަހައްދު ބޮޑު ގައުމެއް ކަމަށެވެ.
"އެ ބޮޑު ސަރަހައްދު މި ވީހާ ދުވަހު އަމިއްލަ ބާރުވެރިކަމެއްނެތިގެން ނުބެލެހެއްޓި އޮތުމަކީ އަޅުގަނޑުމެން އެކަމަށްޓަކައި ކަންބޮޑުވާން ޖެހޭނެ ކަމެއް ނޫން," ރައީސް ވިދާޅުވިއެވެ.
ރައީސް މުއިއްޒު ވިދާޅުވީ އެންމެންގެ ބުރަ މަސައްކަތުން މިއަދު ކަނޑުގެ ބޮޑު ސަރަހައްދު ބެލެހެއްޓުމުގެ ގާބިލްކަން ގާއިމް ކުރެވުމުން އެކަމާ އުފާ ކުރަން ޖެހޭ ކަމަށެވެ.
