މިނިވަންކަމުގެ ރަތްރޮނގުގެ އެތެރޭގައި ތިބި ބަޔަކު ނަމަ ބޭރުކުރާނަން: ރައީސް
ރާއްޖޭގެ މިނިވަންކަމުގެ ރަތްރޮނގުގެ އެތެރެއަށް ވަނުމުގެ ހައްގު އެއްވެސް ބަޔަކަށް ނޯންނާނެ ކަމަށާއި ވަދެ ތިބި ބަޔަކު ނަމަ ބޭރުކުރާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ދިވެހި އަސްކަރިއްޔާއިން ރާއްޖޭގެ އިގްތިސާދީ ސަރަހައްދު ބެލެހެއްޓުމުގެ ހިދުމަތް ފެށުމުގެ ރަސްމިއްުޔާތުގައި ވާހަކަފުޅު ދައްކަވަމުން ރައީސް ވިދާޅުވީ, ދިވެހި މިނިވަންކަމުގެ ރަތްރޮނގު ދަމާނީ ވަރަށް ފަލަކޮށް ކަމަށް މީގެ ކުރިން ވެސް ވިދާޅުވެފައިވާނެ ކަމަށެވެ.
"އެ ރަތްރޮނގުގެ އެތެރެއަކަށް ހަމަ އެއްވެސް ބަޔަކަށް ވަނުމުގެ ހައްގެއް ނޯންނާނެޔޭ, އެ ކަން ކުރުމުގެ ފުރުސަތެއް ހަމަ ހިލާ ނުދޭނަމޭ, އެތެރޭގައި ތިބި ބަޔަކު ވިއްޔާ އިރާދަކުރެއްވިއްޔާ ބޭރުކުރާނަމޭ," ރައީސް ވިދާޅުވިއެވެ.
ރައީސް ވިދާޅުވީ މިއީ އެންމެ ފުރަތަމަ ދުވަހު ވެސް ދެއްކެވި ވާހަކަ ކަމަށާއި އެމަނިކުފާނުގެ އަމަލާއި ބަސް ދިމާވާނެ ކަމަށެވެ. މި ކަން މިހެން ކުރިއަށް ގެންދެވެނީ ހުރިހާ ބައެއްގެ އެއްބާރުލުމާއެކުގައި ކަމަށް ރައީސް ވިދާޅުވިއެވެ.
ރައީސް މުއިއްޒު ވިދާޅުވީ މިކަން މިހެން ކުރުމުން ކަންބޮޑުވާން ޖެހޭ އެއްވެސް ބަޔަކު ތިބެގެން ނުވާނެ ކަމަށާއި ދިވެހިންނަކީ އެއްވެސް ގައުމެއްގެ ހަތުރުން ނޫން ކަމަށެވެ.
އެހެން ނަމަވެސް, މަސައްކަތް ކުރަނީ ހުރިހާ މާނައެއްގައި ދިވެހިން އަމިއްލަ ފައި މައްޗަށް ތެދުވެ, މިނިވަން މުސްތަގިއްލު ގައުމެއްގެ ގޮތުގައި ކުރިއަށް ދިއުމަށް ކަމަށް ރައީސް ވިދާޅުވިއެވެ. ރައީސް ވިދާޅުވީ ރާއްޖޭގެ މިނިވަންކަމާއި ސިޔާދަތު ހަމަމަގަށް އަޅުވައިފިނަމަ މި ސަރަހައްދުގެ ސްޓޭބިލިޓީ ގާއިމްވެގެން ދާނެ ކަމަށެވެ.
އެހެންކަމުން ކޮންމެ މީހަކީ ވެސް އެންމެ ފުރަތަމަ ދިވެއްސެއް ކަން ދަންނަން ޖެހޭ ކަން ރައީސް ވިދާޅުވިއެވެ.
