ބިންވެރިޔާ ގޯތިތަކާ ހަވާލުވާން އަނެއްކާވެސް އިތުރު ފުރުސަތެއް ދެނީ
މާލޭ ރަށްވެހިންނަށް ގޯތި ދޭން ކުރީ ސަރުކާރުން ހިންގި ބިންވެރިޔާ ސްކީމުގެ ދަށުން ގޯތި ލިބުނު މީހުންގެ ތެރެއިން ލިޔުން ހަވާލު ނުކުރެވޭ މީހުންނަށް ލިޔުމާ ހަވާލުވާން އިތުރު ފުރުސަތެއް ދިނުމަށް ހައުސިން މިނިސްޓްރީން ނިންމައިފިއެވެ.
މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓްއިން މިއަދު ނެރުނު އިއުލާނެއްގައި ބުނެފައިވަނީ ބިންވެރިޔާ ސްކީމްގެ ދަށުން ދޫކުރުމަށް ހަމަޖެހިފައިވާ ބިންތަކާގުޅޭ އެއްބަސްވުމުގައި ސޮއިކޮށް ރަޖިސްޓްރީ ހަވާލު ކުރުމުގެ އިތުރުން، ގޯތި ލިބިފައިވާ ކަމުގެ ލިޔުން ހަވާލު ކުރުމަށް އެޕޮއިންޓްމަންޓް ހަމަޖައްސަން މުއްދަތެއް ދެވިފައިވީނަމަވެސް މި މުއްދަތުގައި ހުރިހާ ފަރާތަކުން ސޮއިކޮށް ނިމިފައިނުވާތީ، އިތުރު ފުރުސަތެއް ދިނުމުގެ ގޮތުން 15 އޭޕްރިލް 2024 ވާ ހޯމަ ދުވަހުން ފެށިގެން އަލުން އެޕޮއިންޓްމަންޓް ހަމަޖައްސުމުގެ ފުރުޞަތު ހުޅުވާލެވޭނެ ކަމަށެވެ.
މިކަމަށް އެދޭ ފަރާތްތަކުން، ހިޔާވެހި ޕޯޓަލް މެދުވެރިކޮށް ރަޖިސްޓަރީ/ލިޔުމާއި ހަވާލުވުމަށް އެޕޮއިންޓްމަންޓް ހެދުމުގެ ފުރުޞަތު 14 އޭޕްރިލް 2024 ގައި ހުޅުވާލެވޭނެ ކަމަށް އެ އިއުލާންގައި ބުނެފައިވެއެވެ.
ބިންވެރިޔާ ސްކީމުން ދޫކުރި ގޯތިތައް ހުންނަނީ ހުޅުމާލޭ އާއި ގުޅީފަޅާއި ގިރާވަރު ފަޅުންނެވެ. އެއީ ހުޅުމާލެއިން ދޫކުރާ 1351 ގޯއްޗާއި ގުޅީފަޅުން ދޫކުރާ 2219 ގޯއްޗާއި ގިރާވަރުފަޅުން ދޫކުރާ 5433 ގޯއްޗެވެ.
