ޖިނާއީ ކުށުގެ ޒިންމާ ނަގަން ޖެހޭ އުމުރު 12 އަހަރަށް ބަދަލުކުރަނީ

ޖިނާއީ ކުށުގެ ޒިންމާ ނަގަން ޖެހޭ އުމުރު 12 އަހަރަށް ދަށްކުރަން ނިންމާފައިވާ ކަމަށް ހޯމް މިނިސްޓަރު އަލީ އިހުސާން މިރޭ ވިދާޅުވެއްޖެއެވެ.

Ads by Hajj Corporation

ރޭ، އއ. ރަސްދޫގެ މިސްކިތެއްގެ ފާހާނާގައި ކުޑަކުއްޖަކަށް އަނިޔާކުރި މައްސަަލައެއް ފެންމަތިވެ ކަމާއި ބެހޭ އިދާރާތަކުން ވަނީ ސީރިއަސް މައްސަލައެއްގެ ގޮތުގައި އެކަން ބަލަން ފަށާފައެވެ.

ކުޑަކުދިން ގަނާއިން ރައްކާތެރިކުރުމަށް މަސައްކަތްކުރާ ޓާސްކްފޯސް އިން މިރޭ ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ، މި ވަގުތު ދިމާވެފައި އޮތް އެންމެ ބޮޑު މައްސަލަ އަކީ ޖިނާއި ކުށުގެ ޒިންމާ ނަގަން ޖެހޭ އުމުރަކީ 15 އަހަރު ކަމުގައި ކަނޑައަޅާފައި އޮތް އޮތުން ކަމަށެވެ.

ފުލުހުންގެ ރިކޯޑުތަކާއި ޖުވެނައިލް ޖަސްޓިސް ޑިޕާޓްމެންޓުގެ ރިކޯޑްތަކަށް އިޝާރާތް ކުރައްވަ މިނިސްޓަރު ވިދާޅުވީ، ކުށުގެ ވެށީގެ މާހައުލުގައި 12 އަހަރާއި 13 އަހަރުގެ ގިނަ އަދަދެއްގެ ކުދިން އުޅެމުންދާ ކަމަށެވެ.

''މި ދެންނެވި 200 ކުދިންގެ ތެރޭގައިވެސް ގިނައީ 12،13، އަދި 14 އަހަރުގެ ކުދިން'' އިހުސާން ވިދާޅުވިއެވެ. އެހެން އޮތުމުން އެއިން އެއްވެސް ކުއްޖަކީ ކުށުގެ ޒިންމާ ނަގަންޖެހޭ އުމުރަށް ނުފެތޭ ކުދިން ކަމަށް ވިދާޅުވިއެވެ. އެހެންވެ ސަރުކާރުގެ ވިސްނުމަކީ އެ އުމުރުފުރާ ބަދަލުކުރުން ކަމަށް މިނިސްޓަރު ވިދާޅުވިއެވެ.

މިހާރު މިއޮތް ގާނޫނުގައި މި ބަޔާންކުރާ 15 އަހަރުން ކުށުގެ ޒިންމާ ނަގަން ޖެހޭ އުމުރަކަށް މިއިން ކުއްޖަކު ނުފެތޭ، އެހެންވެ މި ވަގުތު އަޅުގަނޑުމެންނަށް މި ކުދިން ޖިނާއި ކުށެއް ކުރި ކަމަށްވިޔަސް އެ ކުދިން އެ ކުށަށް ޒިންމާ ކުރެވޭ ގޮތަކަށް ނޫން ގާނޫނު ބައްޓަން ކުރެވިފައި މިއޮތީ، އަދުގެ ސަރުކާރުގެ ވިސްނުންފުޅަކީ މި އުމުރުފުރާ 12 އަހަރަށް ކުޑަކުރުން

އިހުސާން ވިދާޅުވީ ދުނިޔޭގެ ކުރިއަރާފައިވާ ބައެއް ގައުމުތަކުގައިވެސް ކުށުގެ ޒިންމާ ނަގަން ޖެހޭ އުމުރު 15 އަހަރަށް ދަށްކޮށްފައިވާ ކަމަށެވެ.

އެ ޕްރެސްގައި ބަންޑާރަ ނައިބު އަހުމަދު އުޝާމް ވިދާޅުވީ ކުޑަކުއްޖަކު ބަންދު ކުރަންޖެހިއްޖެނަމަ އޮންނަ ގާނޫނީ އިޖުރާއަތު މިހާރު އޮތީ އެހާ ސާފުކޮށް ނޫން ކަމަށެވެ. އެހެންވެ ކުޑަކުއްޖާ ބަންދުކުރުމުގެ އަމުރު ނެރެން ޖެހޭ ކޯޓުގެ ހިލާފެއް ވެސް އުޅޭ ކަމަށް ވިދާޅުވިއެވެ.