ކާމިޔާބީ ފާހަގަ ކުރަން ލާމު އަތޮޅުގެ 8 ރަށެއްގައި ހަވާ އަރުވަނީ

ވިހިވަނަ ރައްޔިތުންގެ މަޖިލީހުގެ އިންތިޚާބުގައި ލާމު އަތޮޅުން ލިބުނު ތާއީދާއެކު އެކަމުގެ އުފާ ފާޅު ކުރަން ލ. އަތޮޅުގެ 8 ރަށެއްގައި ހަވާ އަރުވާނެކަމަށް ޓުއަރިޒަމް މިނިސްޓަރ އިބްެރާހިމް ފައިސަލް ވިދާޅުވެއްޖެއެވެ.

Ads by Hajj Corporation

އިއްޔެ ބޭއްވި މަޖިލީހުގެ އިންތިޚާބުގައި އަތޮޅުގެ ހަތަރު ދާއިރާގެ ތެރެއިން ތިން ދާއިރާއެއް ސަރުކާރުގެ މައި ޕާޓީ ޕީއެންސީން ވަނީ ކާމިޔާބުކޮށްފައެވެ. އެއީ އިސްދޫ, ގަން އަދި ފޮނަދޫ ދާއިރާއެވެ. މާވަށު ދާއިރާގެ ގޮނޑި ކާމިޔާބު ކުރީ އެމްޑީޕީއިންނެވެ.

މިއަދު "ދެން"އާ ވާހަކަފުޅު ދައްކަވަމުން ފައިސަލް ވިދާޅުވީ އިންތިޚާބުުން ލިބުނު ނަތީޖާއަކީ ސަރުކާރަށް ރައްޔިތުން ކުރާ ތާއީދު ހާމަވެގެން ދިޔަ ކަމެއް ކަމަށެވެ. އަދި ޕީއެންސީއަށް ރައްޔިތުން ކުރެއްވި ތާއީދަށް ޝުކުރު ދެންނެވިއެވެ.

ފައިސަލް ވިދާޅުވީ ލާމު އަތޮޅުން މަޖިލިސް ގޮނޑި ކާމިޔާބުކުރެވުނު 3 ދާއިރާގެ ހުރިހާ ރަށެއްގައި އުފާ ފާޅު ކުރުމުގެ ގޮތުން ހަވާ އަރުވާނެއެވެ. އެއީ އިސްދޫ، ކަލައިދޫ، ދަނބިދޫ، މާބައިދޫ، މުނޑޫ، ގަން، ފޮނަދޫ އަދި މާމެންދުއެވެ.

ފައިސަލް ވިދާޅުވީ, ރަށްރަށުގައި ހަވާ އަރުވާނެ ތާރީޚެއް އަދި ކަނޑަނާޅާ ކަމަށާއި މިހާރު އެކަމުގެ މަޝްވަރާތައް ކުރެވެމުން އަންނަ ކަމަށެވެ. މި ހަފްތާ ބަންދުގައި ކާމިޔާބީ ފާހަގަ ކުރަން އިތުރު ހަރަކާތްތަކެއް ވެސް ދަނީ ރާވަމުންނެވެ.

ޕީއެންސީއަށް މި އިންތިޚާބުގައި ލިބުނު ކާމިޔާބީ ފާހަގަ ކުރަން މިރޭ މާލޭގައި ވެސް ހަވާ އަރުވާނެއެވެ. މާލޭގައި ހަވާ އެރުވުމަށް ހަމަޖެހިފައިވަނީ ފަސް މިނެޓަށެވެ.