މިހާތަނަށް ޖެހި އެއްވެސް ހިސާބެއް ދިމާނުވެފައެއް ނޯންނާނެ: އަބްދުއްރަހީމް

ސިޔާސީ ކަންކަމުގައި ހިސާބު ޖައްސަވަނީ ވަރަށް ގިނަ ކަންކަމަށް ރިއާޔަތްކޮށްފައި ކަމަށާއި, މިހާތަނަށް ޖެއްސި ހިސާބެއް ދިމާނުވެފައި ނޯންނާނެ ކަމަށް ފޮނަދޫ ދާއިރާގެ އިންތިޚާބީ މެންބަރު, ސަރުކާރުގެ ސީނިއަރ މިނިސްޓަރ އަބްދުއްރަހީމް އަބްދުالله ވިދާޅުވެއްޖެއެވެ.

Ads by STELCO

އަބްދުއްރަހީމް މިހެން ވިދާޅުވެފައިވަނީ ރައްޔިތުންގެ މަޖިލީހުގެ އިންތިޚާބުގައި ޕީއެންސީއަށް ލިބޭނެ ކަމަށް ނޮވެންބަރު މަހު ވިދާޅުވި އަދަދަށް މިދިޔަ އާދީއްތަ ދުވަހު ބޭއްވި އިންތިޚާބުގައި އެ ޕާޓީއަށް ގޮނޑި ލިބިފައި ވަނިކޮށެވެ.

މަޖިލީހުގެ ސުޕަ މެޖޯރިޓީ ޕީއެންސީއަށް ލިބުމާ ގުޅޭ ގޮތުން ދައުލަތުގެ މީޑިއާއިން ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ, ޖައްސަވާ ހިސާބު ދިމާނުވެ ނުދާ ކަމަށެވެ.

"އަޅުގަނޑު ޖަހާ ސިޔާސީ ހިސާބު ޖަހަނީ ވަރަށް ބަލާފައި. މިހާތަނަށް އަޅުގަނޑު ޖެހި ހިސާބު ދިމާނުުވެފައެއް ނޯންނާނެ." އަބްދުއްރަޙީމް ވިދާޅުވިއެވެ.

އޭނާ އިތުރަށް ވިދާޅުވީ, ހިސާބު ޖައްސަވަން ދަސްކުރެއްވީ އަމަލީ މައިދާނަށް ނިކުމެ ކުރި މަސައްކަތުން ކަމަށެވެ.

ޕީޕީއެމް ފުރަތަމަ އުފައްދައިގެން, އެމްޑީޕީ ވެރިކަމުގައި އަޅުގަނޑު ވާދަކުރިން 25 ބައި އިލެކްޝަންގައި. އޭގެ ތެރެއިން 22 ބައި އިލެކްޝަން ކާމިޔާބު ކުރިން. އިންތިޚާބުތަކުގެ ތެރެއިން އެއް ދުވަހު ދެ ރަށެއްގައި ބާއްވާ އިންތިޚާބެއް ފިޔަވާ ކޮންމެ އިންތިޚާބެއްގައި ގްރައުންޑުގައި އަޅުގަނޑު މަސައްކަތްކޮށްފައި ހުންނާނީ. ހުންނާނެ އެ އިންތިޚާބުތަކުގައި ނަތީޖާ ދިމާކޮށްފައި, ދެ ވޯޓް ނޫނީ ތިން ވޯޓު ތަފާތުން" އަބްދުއްރަހީމް ވިދާޅުވިއެވެ.

އަބްދުއްރަހީމް ހިސާބު ޖައްސަވާ ވާހަކަައަކީ ސިޔާސީ މީހުންގެ ތެރޭގައި މިޒާޖީކޮށް ދައްކަވާ ވާހަކަފުޅެކެވެ. އެގޮތުން ހައިކޯޓުން މިނިވަންވެ ވަޑައިގެންނެވި ދުވަހު ކުރީގެ ރައީސް އަބްދުﷲ ޔާމީން ވަނީ އަބްދުއްރަހީމްގެ ހިސާބާ ގުޅޭ ގޮތުން ޖޯކު ޖައްސަވާފައެވެ.

އެމަނިކުފާނު ހިސާބު ޖައްސަވާ ގޮތާއި ގުޅޭ ގޮތުން އިތުރަށް އަބްދުއްރަހީމް ވިދާޅުވީ, ހިސާބު ޖައްސަވަނީ ވަކި މީހަކު ހިތްހަމަ ޖައްސަން ނޫން ކަމަށާއި, ކަމުގެ ޙަޤީޤަތަށް ބަލާފައި ކަމަށެވެ.

"އެ ހުރިހާ ތަޖުރިބާއަަކާ އެކީގައި ވާހަކަ ދެއްކީ. އެއީ އޯޑިއަންސްގައި ހުންނަ ބަޔަކު ހިތްހަމަ ޖައްސަން ނޫނީ  ނޫސްވެރިޔާއަށް ޖަވާބު ދޭކަށް ނޫން" އަބްދުއްރަހީމް ވިދާޅުވިއެވެ.

މިދިޔަ މަޖިލިސް އިންތިޚާބުގައި ޕީއެންސީއަށް 66 ގޮނޑި ވަނީ ކާމިޔާބުވެފައެވެ. އަމިއްލަ ގޮތުން ވާދަކުރި ހަ މެންބަރަކު މިއަދު އެ ޕާޓީއާ ގުޅުމާއެކު އެ އަދަދު ވަނީ 76 އަށް އަރާފައެވެ.