މޮރޮކަން ސްކޮލާޝިޕް: 20 ދަރިވަރުންނަށް ފުރުސަތު ދެނީ
މޮރޮކޯއިން ދޭ ސްކޯލާޝިޕަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.
މިނިސްޓްރީ އޮފް ހަޔާ އެޑިއުކޭޝަނުން ބުނި ގޮތުގައި، "މޮރޮކަން ސްކޮލަޝިޕް" ސްކީމްގެ ދަށުން ޕީއެޗްޑީ އާއި މާސްޓާސް އަދި ބެޗެލާސް ޑިގްރީ އަށް ކިޔެވުމުގެ ފުރުސަތު ލިބިގެންދެއެވެ. އަދި މި ސްކީމްގެ ދަށުން 20 ދަރިވަރަކަށް މަތީ ތައުލީމު ހާސިލްކުރުމުގެ ފުރުސަތު ލިބިގެންދާނެއެވެ.
އިތުރަށް މިނިސްޓްރީއިން ބުނީ، މި ސްކޮލާޝިޕްގައި ބައިވެރިވުމުގެ ފުރުސަތު އަންނަ ބުރާސްފަތި ދުވަހުގެ ހެނދުނު 10 ޖެހުމާއި ހަމައަށް ހުޅުވާލައިފައިވާ ކަމަށެވެ. ސްކޮލަޝިޕްތަކަށް މައި އެޑިއު ޕޯޓަލް މެދުވެރިކޮށް ކުރިމަތިލެވޭނެއެވެ.
މީގެއިތުރުން، މި ސްކޮލަޝިޕަށް ކުރިމަތިލެވޭނީ 19 އަހަރާއި 23 އަހަރާއި ދެމެދުގެ ދަރިވަރުންނަށެވެ. އަދި ސްކޮލާޝިޕަށް ކުރިމަތިލެވޭނީ ތައުލީމީ ގޮތުން ވަކި ޝަރުތުތަކެއް ފުރިހަމަވުމުން ކަމަށް މިނިސްޓްރީން ބުނެފައިވެއެވެ. އެގޮތުން އެ މައުލޫމާތު ސްކޮލަޝިޕުގެ ފުރުސަތު ހުޅުވާލައި ކޮށްފައިވާ އިއުލާނުގައި ލިބެން ހުންނާނެ ކަމަށްވެސް ބުނެފައިވެއެވެ.
މޮރޮކޯގެ ޔުނިވާސިޓީތަކާއި މި ޔުނިވާސިޓީތަކުގެ ކޯސްތައް ވެސް އެގައުމުގެ އިންޓަނޭޝަނަލް ކޯޕަރޭޝަން އޭޖެންސީ (އޭއެމްސީއައި)ގެ ވެބްސައިޓުން ލިބެން ހުންނާނެއެވެ.
މިސްކޮލަޝިޕް ސްކީމްގެ ދަށުން ކޯސް ފީ ހިލޭ ހަމަޖެހިފައިވާ ކަމަށް މިނިސްޓްރީއިން ބުނެއެވެ. އަދި ސްކޮލާޝިޕްގެ ދަށުން ކޮންމެ މަހަކު ދަރިވަރުންނަށް 750 ދިރްހަމް (3154.84ރ.) ދޭނެ ކަމަށް ވެސް ބުނެފައިވެއެވެ.
