އެކްސިޑެންޓުވި މީހަކަށް ފަރުވާދެމުން ދަނިކޮށް ނިޔާވެއްޖެ
ހުޅުމާލޭގައި މިދިޔަ ހަފްތާގައި ހިނގި އެކްސިޑެންޓުގައި އަނިޔާވި 36 އަހަރުގެ މީހަކަށް ފަރުވާ ދެމުން ދަނިކޮށް ނިޔާވެއްޖެ އެވެ.
ނިމިދިޔަ ހަފްތާގައި މި އެކްސިޑެންޓު ހިނގާފައިވަނީ ހުޅުމާލޭ ނިރޮޅުމަގު އެމްޑަބްލިޔުއެސްސީ ކައިރިން ދުއްވާފައި ދިޔަ ސައިކަލެއް ކަހާލައި ވެއްޓިގެންނެވެ. މި އެކްސިޑެންޓުގައި އަނިޔާވެގެން ހާލު ސީރިއަސްވީ ސައިކަލު ދުއްވަން އިން މީހާ އެވެ.
މިމަހު 5 ވަނަ ދުވަހުގެ ހަވީރު ހިނގި މި އެކްސިޑެންޓަށްފަހު އެމީހާއަށް ފަރުވާދޭން ގެންދިޔައީ ހުޅުމާލެ ހޮސްޕިޓަލަށެވެ. އެހެންނަމަވެސް އިތުރު ފަރުވާ ދިނުމަށް އޭޑީކޭ ހޮސްޕިޓަލަށް އޭނާ ބަދަލުކުރި އެވެ.
އޭނާ ނިޔާވީ މިމަހުގެ 6 ވަނަ ދުވަހު އެވެ. ފުލުހުން ބުނީ އެކްސިޑެންޓާއި ގުޅިގެން ބަލަންޖެހޭ ކަންކަން އިތުރަށް ބަލަމުން އަންނަ ކަމަށެވެ.
ދުއްވަންޖެހޭ ސްޕީޑަށްވުރެއް ބާރަށް ދުއްވުމުގެ ސަބަބުން މީގެ ކުރިންވެސް ނުރައްކާތެރި އެކްސިޑެންޓުތަކެއް ހިނގާފައި ވެއެވެ. މާލެ ހުޅުމާލެ ބްރިޖު ހުޅުވި ފަހުން ހައިވޭގައި ވަނީ ވަރަށް ގިނަ އެކްސިޑެންޓުތައް ހިނގައިފަ އެވެ.
