އިޒްރޭލް ޕާސްޕޯޓު މަނާ ކުރުމަކާ ދެކޮޅެއް ނުހަދަން، އެއީ އޮޅުމެއް: ފައިރޫޝް
އިޒްރޭލުގެ ޕާސްޕޯޓުގައި ރާއްޖެއަށް އެތެރޭ ނުވެވޭނެ ގޮތަށް އެ ޕާސްޕޯޓު މަނާ ކުރުމަށް ގާނޫނަށް ގެންނަންޖެހޭ ބަދަލުތައް ގެންނަން ވަޒީރުންގެ މަޖިލީހުން ނިންމާފައިވާ ނިންމުމަށް ދެއްވި ކޮމެންޓު އާންމުންނަށް ފަހުމްނުވީ ކަމަށާއި، އެކަން އެހެން ކުރުމާއި ދެކޮޅު ނޫން ކަމަށް ކަމަށް ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ފައިރޫޝް ވިދާޅުވެއްޖެ އެވެ.
މިއަދު އެކްސްގައި ކުރެއްވި ޕޯސްޓެއްގައި ފައިރޫޝް ވިދާޅުވީ، އޭނާގެ އެކްސް އެކައުންޓާއި، އެކްސްގައި ކުރާ ޕޯސްޓުތަކުން އޭނާ ހުރީ ފަލަސްތީނާއި އެކުގައި ކަން ފެނިގެންދާނެ ކަމަށެވެ.
ފައިރޫޝް ވިދާޅުވީ، މީގެކުރިން އޭނާ ކުރެއްވި ޕޯސްޓުގައި ވިދާޅުވާން ބޭނުންވީ އިޒްރޭލުގެ ޕާސްޕޯޓުގައި ރާއްޖެ އެތެރެ ނުވެވޭގޮތް ހެދުމަކީ، ހައްލެއް ނޫން ކަމަށެވެ. އެ ކަން އެ ގޮތަށް ކުރުމުގެ ސަބަބުން އޭގެ އަސަރު އިޒްރޭލުން ހިފާފައިވާ ފަލަސްތީނުގެ ސަރަހައްދުތަކުގައި ދިރިއުޅެމުންދާ ފަލަސްތީނުގެ ރައްޔިތުންނަށް ވެސް ކުރާނެ ކަމަށެވެ.
"ބުނަން ބޭނުންވީ އިޒްރޭލުގެ ޕާސްޕޯޓުގައި ރާއްޖެ އެތެރެ ނުވެވޭ ގޮތް ހެދުމުން، އިޒްރޭލުން ހިފާފައިވާ ފަލަސްތީނުގެ ސަރަހައްދުތަކުގައި ދިރިއުޅެމުންދާ ފަލަސްތީނުގެ 1.8 މިލިއަން ރައްޔިތުންނަށް ވެސް ކުރާނެއޭ. އޭރުން އެބަ އެ ރައްޔިތުންނަށް ރާއްޖެ އެތެރެވުން މަނާވޭ،" ފައިރޫޝް ވިދާޅުވިއެވެ.
ފައިރޫޝް އިތުރަށް ވިދާޅުވީ، ދެ ގައުމެއްގެ ޕާސްޕޯޓް އޮންނަ އިޒްރޭލުގެ ރައްޔިތުންނަށް ރާއްޖެ އެތެރެވުމުގެ ފުރުސަތު މިހާރު ވެސް ލިބިދާނެ ކަމަށެވެ. ނަމަވެސް އެ ފުރުސަތު ނުލިބޭނީ އިޒްރޭލުން ހިފާފައިވާ ސަރަހައްދުތަކުގައި ދިރިއުޅެމުންދާ ފަލަސްތީނުގެ ރައްޔިތުންނަށް ކަމަށެވެ.
ފައިރޫޝް މިފަދައިން ވިދާޅުވެ ބަޔާން ނެރެފައިވަނީ އިޒްރޭލުގެ ޕާސްޕޯޓް މަނާކުރުމާއި ގުޅިގެން މިދިޔަ ބުރާސްފަތި ދުވަހު އެކްސްގައި ކުރެއްވި ޕޯސްޓަކާއި ގުޅިގެން ސޯޝަލް މީޑިއާގައި އެތައް ބަޔަކު ފައިރޫޝްއަށް ފާޑުކިޔަމުންދާ ދަނޑިވަޅެއްގައެވެ.
އެ ޕޯސްޓުގައި ފައިރޫޝް ވިދާޅުވީ، ރާއްޖޭގެ ހާރިޖީ ސިޔާސަތު ބިނާކުރަން ޖެހެނީ ސޯޝަލް މީޑިއާގައި އާންމުން ބުނާ ބަހަށް ބަލާ، އެ މީހުން ހިތްހަމަ ޖެއްސުމަށް ނޫން ކަމަށެވެ.
"ހާރިޖީ ސިޔާސަތު ބިނާކުރަން ޖެހެނީ ގައުމުގެ ވަސީލަތްތަކާއި މާލީ ހާލަތް އަދި އެކު ޖުމްލަ ގައުމަށް ކުރާނެ ފައިދާއަށް ބަލައިގެން،" ފައިރޫޝް ވިދާޅުވިއެވެ.
އިޒްރޭލް ޕާސްޕޯޓް މަނާ ކުރުމަކީ ސަރުކާރުގެ ނިންމުމެވެ. އެހެން ނަމަވެސް އެ ކަން ކުރަން ގާނޫނަށް އިސްލާހު ގެންނަން ޖެހޭ ކަމަށް ސަރުކާރުން ބުނެ އެވެ. ސަރުކާރުގެ ބިލް އަދި މަޖިލީހަށް ނުފޮނުވަ އެވެ.
އިދިކޮޅު އެމްޑީޕީއަށް ނިސްބަތްވާ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް، އިމިގްރޭޝަން ގާނޫނަށް އިސްލާހު ގެންނަން ބިލެއް ހުށަހަޅުއްވާފައި އެބަވެ އެވެ. އިޒްރޭލް ޕާސްޕޯޓު އޮތް މީހަކު އަތުގައި އެހެން ގައުމެއްގެ ޕާސްޕޯޓު އޮތަސް، އެ މީހަކަށް ރާއްޖެ އެތެރެވުން މަނާ ކަމަށް ގާނޫނު އިސްލާހު ކުރުމަށް ހުށަހަޅާ އެ ބިލުގައި ބަޔާންކޮށްފައިވެއެވެ.
