އޮޓޮޕްސީއެއް ހަދަން ނިންމުމުގެ ބާރު އެންއައިސީއަށް ނޯންނާނެ: ފައިރޫޝް
އެއްވެސް މަރެއްގެ ޕޯސްޓްމޯޓަމް ހެދުމުގެ ޤާނޫނީ އެއްވެސް ހައިސިއްޔަތެއް ނޭޝަނަލް އިންޓަގްރިޓީ ކޮމިޝަން (އެންއައިސީ)އަށް ލިބިގެންނުވާ ކުރީގެ އެސިސްޓެންޓް ކޮމިޝަނާ އޮފް ޕޮލިސް ޑރ. ޢަބްދުﷲ ފައިރޫޝް ވިދާޅުވެއްޖެއެވެ.
ފައިރޫޝް މިފަދައިން ވިދާޅުވީ ފުލުހުންގެ ބެލުމުގެ ދަށުގައި ހުއްޓައި ގދ. ހޯޑެއްދޫ، ސްވެން، ޢަބްދުﷲ ރަޝީދު އޮކްޓޫބަރު 25 ވަނަ ދުވަހު ނިޔާވި މައްސަލާގައި އިންސާފަށް ވާސިލުވުމަށް މުހިންމުކަމަކަށްވާތީ ތަޙުޤީޤުގެ ބޭނުމަށް ކަނޑައެޅިފައިވާ އިޖުރާޢަތުގެ ދަށުން ޢަބްދުﷲ ރަޝީދުގެ ޕޯސްޓްމޯޓަމް ހެދުމަށް ނިންމާފައިވާކަމަށް ނޭޝަނަލް އިންޓަގްރިޓީ ކޮމިޝަން (އެންއައިސީ)ން ނިންމުމާ ގުޅިގެންނެވެ.
މި މައްސަލައާ ގުޅިގެން ފައިރޫޝް ވިދާޅުވީ އޮޓޮޕްސީ (ޕޯސްޓްމޯޓަމް އެގްޒަމިނޭޝަން) ހަދަން އެންއައިސީން ނިންމި ނިންމުމާ މެދު ވަރަށް ބޮޑު އޮޅުމެއް އެބައޮތް ކަމަށެވެ. އަދި 22 ސެޕްޓެމްބަރ 2020 ގައި އެކުލަވާލާފައިވާ ޖިނާއީ އިޖުރާއަތުގެ ގާނޫނަށް ތިންވަނަ އިޞްލާޙު ގެނައުމުގެ ޤާނޫނުން މި ބާރު ފުލުހުންނަށް ލިބިދޭތީ، އޮޓޮޕްސީ ހެދުމުގެ އިޚްތިޔާރު އެންއައިސީއަށް ނެތްކަމަށް ދެކޭ ކަމަށެވެ.
މީގެ އިތުރުން ފައިރޫޝް ވިދާޅުވީ 27 ޑިސެމްބަރު 2020 ގައި ވުޖޫދަށް އައި ފުލުހުންގެ ހިދުމަތުގެ ގާނޫނުގައި އޮޓޮޕްސީ ހެދުމުގެ ކުރިން ކޯޓު އަމުރެއް އެމްޕީއެސް އިން ހޯދަން ޖެހޭނެ ކަމަށް 97 ވަނަ މާއްދާގެ (ހ) ގައި ބަޔާންކޮށްފައިވާ ކަމަށެވެ. އެހެންކަމުން ބޮޑެތި މައްސަލަތަކުގައި ވެސް އެފަދަ ނިންމުމެއް ނިންމޭނީ ފުލުހުންގެ ހިދުމަތަށް އެކަނި ކަމަށް ފައިރޫޝް ވިދާޅުވިއެވެ.
އަބްދުﷲ ރަޝީދުގެ ހަށިގަނޑު އާއިލާގެ ރުހުންނެތި ޕޯސްޓްމޯޓަމް ހަދަން މަސައްކަތްކޮށް، އާއިލާއަށް ހަށިގަނޑު ނުދައްކާތީ އެކަމާ އެ އާއިލާއިން އަންނަނީ ނުރުހުން ފާޅުކުރަމުންނެވެ. އަބުދުﷲ ރަޝީދުގެ ހަށިގަޑު ހޯދުމަށް އޭނާގެ އާއިލާއިން މިހާރު ވަނީ ސިވިލް ކޯޓަށް މައްސަލަ ހުށަހަޅައިފައެވެ.
