މާ އަވަހަށް ގޮތް ނުނިންމާށެވެ. ބޯދިގު ކޮންމެ މީހަކީ ވިޔާނުދާ މީހެއް ނޫނެވެ.
އަޅުގަނޑުމެންގެ މި ކުޑަކުޑަ މުޖުތަމައުގައި ދިރިއުޅޭ ގިނަ ބައެއްގެ ގައިގައި ހަރުލާފައިވާ ނުރަނގަޅު އެއް އާދަ އަކީ މީހަކު ހުންނަ ގޮތަށް ބަލައި އެމީހަކާ މެދު މާއަވަހަށް ގޮތް ނިންމުމެވެ. ބޯދިގު ކޮންމެ މީހަކީ ޕާޓޭ އެއް ކަމުގައި ދުށުމެވެ. ގޮޅި ޖެހި ގަމީސްލާ ، ޖީއެން ސައިކަލެއް ދުއްވާނަމަ އެމީހަކީ އާވާރާއެއް ކަމަށް ދުށުމެވެ.
ދަންނަވަންތޯއެވެ. ތިޔައީ ކުރެވޭ ކުށްހީއެކެވެ. އަންހެނެއްގެ އިސްތަށިގަނޑު ފަދައިން އިސްތަށިގަނޑު ދިގުކުރުން ރަނގަޅު ވާހަކައެއް ނޫނެވެ. ނަމަވެސް ކޮންމެ މީހަކު ބޯދިގު ކުރަނީ ޕާޓޭ އަކަށް ވާކަށް ނޫނެވެ. ޖީއެން ސައިކަލެއްގައި އުޅޭ ކޮންމެ މީހަކީ އަންހެން ކުދިންނާ މަގުމަތިން ފޮށޭ މީހެއް ނޫނެވެ. ބޯދިގު ކޮށްފައި ހުންނަ މީހަކީ ވެސް ހަމަ ހަރުދަނާ މީހަކަށް ވެދާނެއެވެ. ބޯދިގު ކޮށްފައި ހުންނަ މީހަކީ ވެސް ރަނގަޅު އަޚުލާގެއްގެ ވެރި މީހަކަށް ވެދާނެއެވެ. މީހަކު ހުުންނަ ގޮތަކުން އެމީހެއްގެ ގޮތެއް ނޭނގޭނެއެވެ.
މިއަދު އަޅުގަނޑުމެންގެ މުޖުތަމައުގައި ބޯދިގުކޮށްފައި ހުންނަ ފިރިހެނަކާ ކައިވެނި ކުރަން އަންހެން ކުއްޖަކު އުޅުނު ކަމުގައި ވިޔަސް އެ ކުއްޖެއްގެ އާއިލާ އިން ދެކޮޅު ހަދާތަން ފެނެއެވެ. ސަބަބަކީ އެމީހަކީ ބޯދިގު ކޮށްފައި ހުންނަ މީހަކަށްވުން އެކަންޏެވެ. ރަނގަޅު ވަޒީފާއެއްގައި އަމިއްލަ ފައި މައްޗަށް ތެދުވެ ހުރި ރަނގަޅު މީހެއް ނަމަވެސް އެ ކުއްޖަކީ ބޯދިގު ކޮށްފައި ހުންނަ މީހެއް ނަމަ އެމީހަކީ ގޯސް މީހެއް ކަމަށް ދެކެއެވެ. އެ މީހަކީ ވިޔާނުދާ މީހެއް ކަމުގައި ގަބޫލު ކުރެއެވެ.
ހަގީގަތަކީ މިއެއް ނޫނެވެ. ކިތައްމެ ކުރުކޮށް ބޯކޮށާ އަދި ކިތަންމެ ރީއްޗަށް ހެދުން އަޅާ މީހަކު ވެސް އެއީ ވިޔާނުދާ މީހަކަށް ވެދާނެއެވެ. އެ މީހަކީ ހަމަ ތިޔަ ދެކިލައްވާ "ޕާޓޭ" އަކަށް ވެސް ވެދާނެއެވެ. އިސްތަށިގަނޑަކީ އެކުއްޖާ "ޕާޓޭ" އެއް ކަން ނުވަތަ ނޫން ކަން މިންކުރާ ތަރާދެއް ނޫނެވެ. އެމީހެއްގެ އީމާންތެެރިކަމާއި އެމީހެއްގެ ގަބޫލު ކުރުން ތައް ވަނީ އެމީހެއްގެ ހިތުގައެވެ.
ބަލާލަން ރީތި ކޮންމެ މޭވާ އެއް އަނގައަށް މީރެއް ނޫނެވެ. ބަލާލަން ރީތި ކޮންމެ ވަޅި އަކީ ތޫނު ވަޅި އަކަށް ވެސް ނުވެދާނެއެވެ. އަދި ހަމަ އެހެންމެ ބަލާލަން ރީތި ކޮންމެ އަންހެން ކުއްޖަކީ އުޅުންހުރި އަޚްލާޤް ރަނގަޅު ކުއްޖަކަށް ވެސް ނުވެއެވެ. ހަމަ މި ބީދައިން އިސްތަށިގަނޑު ކުރުކޮށް ކޮށާފައި ހުންނަ ކޮންމެ މީހަކީ ރަނގަޅު އަޚުލާގެއްގެ ވެރިއަކަށް ވެސް ނުވެދާނެއެވެެ. އަދި އިސްތަށިގަނޑު ދިގުކޮށް ހުންނަ ކޮންމެ މީހަކީ ވިޔާނުދާ މީހަކަށް ނުވެދާނެއެވެ.
،މައްސަލައަކީ އިސްތަށިގަނޑެއް ނޫނެވެ. މައްސަލަ އަކީ ތިބާގެ ވިސްނުމެވެ. ވިޔާނުދާ ގިނަ ބަޔަކު އިސްތަށިގަނޑު ދިގުކޮށްފައި ހުރުމުގެ މާނަ އަކީ އިސްތަށިގަނޑު ދިގު ކޮށްފައި ހުންނަ އެންމެންނަކީ ވިޔާނުދާ މީހުންނެކޭ ނޫނެވެ. މީހަކާ މެދު ގޮތެއް ނިންމުމުގެ ކުރިން އެމީހާގެ ވަނަވަރު ރަނގަޅަށް ހޯދާ ބަލާށެވެ. މާ އަވަހަށް ގޮތް ނިންމުމަކީ "ޖާހިލުން" ކަންތައް ކުރާ ގޮތެކެވެ.
އެ ތެދެއް. ހަމަ އަންހެނަކަށްވެސް ވެދާނެ އެއްނު؟ ކީޕް އެން އޯޕަން މައިންޑް ގައިސް
ދީނައްލޯބިކުރާމީހާ ބޮލުގެ އިސްތަށިގަނޑު ދިގުކުރާނެބާ؟