އެއްވެސް މީޑިއާއެއް އުވާލަން ބުނުމަކީ އެދެވޭ ގޮތެއް ނޫން: ރައީސް ނަޝީދު
ޗެނަލް 13 އިން ގެނެސްދިން ޕްރޮގްރާމެއްގައި ރައީސް އިބްރާހިމް މުހައްމަދު ސާލިހުގެ ހަށިކޮޅުގައި ހުޅުޖަހަން ޖެހޭ ކަމަށް މީހަކު ބުނި މައްސަލަ އަކީ މިއަދު މީސްމީޑިއާގައި އެންމެ ވައިގައި ހިފާފައިވާ ވާހަކައެވެ. އަދި މިކަމާ ގުޅިގެން ޗެނަލް13 އުވާލުމަށް ބައެއް މީހުން ދަނީ އަޑު އުފުލަމުންނެވެ.
މި ވާހަކަ އާއި ގުޅިގެން ރައްޔިތުން މަޖިލީހުގެ ރައީސް މުހައްމަދު ނަޝީދު ޓްވީޓެއް ކުރައްވައިފިއެވެ. އެމަނިކުފާނުގެ ޓްވީޓުގައި ވިދާޅުވަފައި ވަނީ އެއްވެސް މީޑިއާއެއް އުވާލަން ބުނުމަކީ އެދެވޭ ގޮތެއް ނޫން ކަމަށެވެ. އެހެނަސް އެއްވެސް މީީޑިއާ އަކުން ރުޅިވެެރިކަމާއި ހަސަދަ އާއި ނަފްރަތު އުފެެއްދުމަކީ ބަލައިގަނެވޭނެ ކަމެއް ނޫން ކަމުގައި އެމަނިކުފާނުގެ ޓްވީޓުގައި ވިދާޅުވެފައި ވއެެވެ.
މި މޭރުމުން ވާހަކަފުޅު ދައްކަވަމުން ރައީސް ނަޝީދުވަނީ އެފަދަ މީޑިއާތަކުގެ އަޑު ނޭއްސެވުމަށް އިލްތިމާސް ކުރައްވާފައެވެ. އަދި އެފަދަ މީޑިއާތަކުން ދައްކަވާ ވާހަކަތައް ގަބޫލު ނުކުރުމަށް ވެސް ރައީސް ނަޝީދު ވަނީ ގޮވާލައްވާފައެވެ.
ޗެނަލް13 އިން މިކަމާ ގުޅިގެން އިއްޔެ ނެރުނު ބަޔާނެއްގައި ބުނެފައިވަނީ އެ ޗެނަލް އަކީ އަނިޔާވެރިކަމާއި އާންމުންގެ މެދުގައި އެކަކު އަނެކަކަށް ނަފްރަތު އުފެއްދުމަށް ހިތްވަރު ދޭނެ ބައެއް ނޫން ކަމަށެވެ. އަދި ކުރިއަށް އޮތް ތަނުގައިވެސް އެފަދަ ކަންކަމަށް ހިތްވަރު ދީ ގާނޫނާއި ޚިލާފު ކަންކަން ކުރުމަށް އެ ޗެނަލްގެ ފަރާތުން އެއްވެސް ފަރާތަކަށް ފުރުސަތު ނުދޭނެކަމަށް ވެސް އެ ބަޔާނުގައި ފާހަގަ ކޮށްފައި ވެއެވެ.
