ފަލަސްތީން ޓެލެތޯން އިން ލިބުނު 19 މިލިޔަން ސަރުކާރާ ހަވާލުކޮށްފި
ރާއްޖެއިން ފަލަސްތީނުގެ ރައްޔިތުންނަށް އެހީވުމަށް ރައީސް ޑރ މުހައްމަދު މުއިއްޒުގެ އިސްނެންގެވުމުގެ ދަށުން. ދައުލަތުގެ މީޑިއާ ޕީއެސްއެމުން ކުރިއަށްގެންދިޔަ ޓެލެތޯނަށް ލިބުނު ފައިސާ ފަލަސްތީންގެ ރައްޔިތުންނަށް ފޯރުކޮށްދިނުމަށްޓަކާ ފޮރިން މިނިސްޓްރީއާ ހަވާލުކޮށްފި އެވެ.
ޕީއެސްއެމުން ބުނީ އެ ޓެލެތޯނުން 19،186،851.5 ރުފިޔާ ލިބިފައިވާ ކަމަށެވެ. ފައިސާގެ ރަމްޒީ ޗެކް ފޮރިން މިނިސްޓްރީއާ ހަވާލުކޮށްފައިވަނީ އެކަމަށްޓަކައި މިއަދު ބޭއްވި ބައްދަލުވުމެއްގަ އެވެ. ޕީއެސްއެމްގެ ފަރާތުން މިރަމްޒީ ޗެކް ހަވާލުކޮށްދެއްވީ މެނޭޖިން ޑިރެކްޓަރ ޒީނާ ޒާހިރު އެވެ. ޗެކާ ހަވާލުވެވަޑައިގެންނެވީ މިނިސްޓަރު މޫސާ ޒަމީރެވެ.
މިިދޔަ މަހުގެ 12 ވަނަ ދުވަހު ކުރިއަށްގެންދިޔަ "ފަލަސްޠީނާއެކު ދިވެހީން" ޓެލެތޯން ކުރިއަށްދިޔަ ގޮތް ބެލެހެއްޓީ މިނިވަން އޮޑިޓް ފާމެއް ކަމަށްވާ ކްރޯ މޯލްޑިވްސްއިން ކަމަށް ޕީއެސްއެމުން މައުލޫމާތުދެ އެވެ. ޓެލެތޯންގެ ހުރިހާ ކަމެއް ކުރިއަށް ގެންގޮސްފައިވަނީ ޓްރާންސްޕޭރެންޓްކޮށް ކަމަށްވެސް ޕީއެސްއެމުން މައުލޫމާތުދެ އެވެ.
ޓެލެތޯނަށް 19 މިލިއަން ރުފިޔާ ލިބިފައިވާއިރު އޭގެ ތެރޭގައި ހިމެނެނީ 18،418،922.24 ދިވެހި ރުފިޔާއާއި 49،800 ޑޮލަރާއި 86 ސެންޓެވެ.
ޕީއެސްއެމުން ބުނީ އެ ޓެލެތޯނަށް ލިބުނު ފައިސާގެ ތެރެއިން 15 މިލިޔަން ރުފިޔާއަކީ އޮންލައިން ޓްރާންސެކްޝަންގެ ގޮތުގައި ލިބިފައިވާ ފައިސާ ކަމަށެވެ. އަދި އޮންލައިން ޓްރާންސެކްޝަންގެ ގޮތުގައި 37919 ޑޮލަރުވެސް ލިބިފައިވާ ކަމަށެވެ.
އޭގެ އިތުރުން އެކި ސަރަހައްދުތަކުގައި ބެހެއްޓި ފަންޑު ފޮށިތަކަށް 1.4 މިލިއަން ރުފިޔާ ލިބިފައިވާއިރު 11،768 ޑޮލަރުވެސް ފަންޑުފޮށިތަކަށް ލިބިފައިވެ އެވެ. މީގެ އިތުރުން ޕީއެސްއެމުން ކުރިއަށް ގެންދިޔަ ލައިވް ކަވަރޭޖްގެ ތެރޭގައިވެސް 1.5 މިލިޔަން ރުފިޔާއާއި 113 ޑޮލަރު ލިބިފައިވާ ކަމަށް ބުންޏެވެ.
އެ ޓެލެތޯނުން ލިބުނު ފައިސާ ފަލަސްތީންގެ ރައްޔިތުންނަށް ފޯރުވައިދިނުމަށް ހަމަޖެހިފައިވަނީ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލެސްޓައިން ރެފިއުޖީސް (އަންރުވާ) މެދުވެރިކޮށެވެ.
