ނުރައްކާތެރި ހާދިސާ ހިނގާ ގޮތަށް ހުރި މަގުބައްތިތައް ރަނގަޅު ކުރެންވެން ދެން ކަރަންޓު ކަނޑާލަނީ
ފެނަކަ ކުންފުނިން ކަރަންޓުގެ ހިދުމަތް ދެމުންދާ ރަށްރަށުގެ މަގު ބައްތިތަކުގެ ސަލާމަތީ ކަންކަން ހުރި ގޮތް ބެލުމުގެ ގޮތުން އެ ހުރިހާ ރަށެއްގައި ހުރި މަގުބައްތިތައް އިންސްޕެކްޓްކޮށް، ނުރައްކާތެރި ހާދިސާ ހިނގާ ގޮތަށް ހުރި ކަމަށް ފާހަގަ ކުރެވޭ ބައްތިތައް ރަނގަޅު ކުރެވެން ދެން ކަރަންޓު ނުދޭން ނިންމައިފި އެވެ.
ރ. އުނގޫފާރުގައި ވާރޭ ވެހެމުން ދަނިކޮށް މަގުމަތީގައި ކުޅެން ތިބި ދެ ކުއްޖަކަށާއި ޒުވާނަކު، މަގުމަތީ ހުރި މަގު ބައްތިއެއްގެ ހޮޅިދަނޑިއަކުން ކަރަންޓުގައި ޖެހިގެން ހާލު ދެރަވުމުގެ ހާދިސާއެއް ހިނގީ މިދިޔަ މެއި މަހު ފަހުކޮޅެވެ. ދެ ކުދިން ސަލާމަތް ކުރަން އެ ތަނަށް ދިޔަ ޒުވާނާ ފަރުވާ ހޯދަމުން ދަނިކޮށް އޭނާ ނިޔާވީ ޖޫން މަހު އަށް ވަނަ ދުވަހު އެވެ.
އެ ހާދިސާއަށް ފަހު ފެނަކައިން ހިންގި އިންސެޕްޝަނުން ގިނަ ރަށްރަށުގައި ހަރު ކުރެވިފައި ހުރި މަގު ބައްތިތަކުން ކަރަންޓު ދީފައި ހުރީ އީއެލްސީބީ މެދުވެރި ނުކޮށް ކަން ފާހަގަ ކުރެވިފައިވާ ކަމަށެވެ. އޭގެ ސަބަބުނ ނުރައްކާތެރި ހާދިސާ ހިނގުމަކީ އެކަށީގެންވާ ކަމެއް ކަން ވެސް އެ ކުންފުނިން ފާހަގަކޮށްފައިވެ އެވެ.
ރަށު ކައުންސިލްތަކާ ގުޅިގެން ފެނަކައިން އެ މަގުބައްތިތައް ރަނގަޅު ކުރުމުގެ މަސައްކަތް ފަށާފައިވަނިކޮށް މިއަދު އެ ކުންފުނިން ބުނީ އެ ކުންފުނިން ކަނޑައަޅާފައިވާ ތާވަލާ އެއް ގޮތަށް ޖުލައި މަހުގެ ނިޔަލަށް އެ މަގުބައްތިތަކަށް ކަރަންޓު ކަނޑާލާނެ ކަމަށެވެ. އަދި ކައުންސިލްތަކުން މަސައްކަތް ކުރަމުން ގެންދާ ގޮތް، އެ ރަށެއްގައި ހުރި ފެނަކަ ބްރާންޗުން ގާތުން ބަލަމުންދާނެ ކަމަށް ވެސް އެ ބަޔާނުގައިވެ އެވެ.
ކައުންސިލްތަކަށް މަގު ބައްތި ރަނގަޅު ކުރަން ދިން މުއްދަތުގެ ތެރޭގައި، ކައުންސިލްތަކުން، ތަކެތި ފޯރުކޮށްދިނުމުން ފެނަކައިން ހިލޭ ސަބް ޑީބީތައް އިންސްޓޯލް ކޮށްދޭނެ ކަމަށް ވެސް ފެނަކައިން ބުންޏެވެ. ނުވަތަ ފެނަކައިން ތަކެތި ފޯރުކޮށް ބިލް ކުރެވޭ ގޮތަށް އެ ކުންފުނީގެ ޓެކްނިކަލް މުވައްޒަފުންގެ އެހީތެރިކަމާ އެކު ސަބް ޑީބީ ތައްޔާރުކޮށް ހަރުކޮށްދިނުމުގެ މަސައްކަތް ކޮއްދެވިދާނެ ކަމަށް ވެސް ކުންފުނިން ބުންޏެވެ.
