އަލިފާނުގެ ހާދިސާ: އެކަކު ފިޔަވާ އެންމެން ހޮސްޕިޓަލުން ދޫކޮށްލައިފި
މ. އެންޒިއަން ގޭގެ 3ބީ އެޕާޓްމަންޓުގައި މިދިޔަ ބުރާސްފަތި ދުވަހު އަލިފާނުގެ ހާދިސާއެއް ހިނގައިގެން އައިޖީއެމްއެޗް ހޮސްޕިޓަލަށް ފަރުވާއަށް ގެންދިޔަ މީހުންގެ ތެރެއިން އެކަކު ފިޔަވާ އެހެން އެންމެން ހޮސްޕިޓަލުން ދޫކޮށްލައިފި އެވެ.
އެ ހާދިސާގައި ހާލުދެރަވި 5 މީހަކު ހޮސްޕިޓަލަށް ގެންދިޔަ އެވެ. އޭގެ ތެރެއިން ހަތަރު މީހުންނަށް އިމާޖެންސީގައި ފަރުވާދިން އިރު އެކަކަށް އައިސީޔޫގައި ފަރުވާދިނެވެ.
އައިޖީއެމްއެޗް އިން މިއަދު 'ދެން' އަށް މައުލޫމާތު ދިން ގޮތުގައި ހަތަރު މީހެއްގެ ހާލު ރަނގަޅުވުމުން ހޮސްޕިޓަލުން ދޫކޮށްލާފައިވާ ކަމަށެވެ. އަދި އަނެއް މީހާގެ ހާލު ރަނގަޅުވަމުންދާތީ ފަރުވާދެމުންދަނީ ވޯޑުގައި ކަމަށެވެ.
މި ހާދިސާގައި އެޕާޓްމަންޓަށް ދިރިނޫޅެވޭ ވަރަށް ގެއްލުންވި އެވެ. އެހެންވެ ނެޝަނަލް ޑިޒާސްޓާ މެނޭޖްމަންޓް (އެންޑީއެމްއޭ) އިން ވަނީ އެތަަނުގައި ދިރިއުޅުނު މީހުންނަށް 15 ދުވަހުގެ ވަގުތީ ހިިޔާ ހަމަޖައްސައިދީފަ އެވެ.
Ads by STO
