މަސައްކަތްކުރަނީ ބިދޭސީންގެ މައްސަލަ އަށް އަވަސް ހައްލެއް ހޯދަން: ޝައްމާން
މަސައްކަތްކުރަނީ ބޮއްސުންލާފައިވާ ބިދޭސީންގެ މައްސަލައަށް އަވަސް ހައްލެއް ހޯދުމަށް ކަމަށް ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝައްމާން ވަހީދު މިރޭ ވިދާޅުވެއްޖެ އެވެ.
ރާއްޖޭގައި އިޖުތިމާއި މައްސަލައަކަށްވެފައިވާ ބިދޭސީންގެ މައްސަލަ ހައްލުކުރަން އެހެން ސަރުކާރުތަކޭ އެއް ފަދައިން މި ސަރުކާރުންވެސް މަސައްކަތް އެބަ ކުރެ އެވެ. ގަވާއިދާ ހިލާފަށް އުޅޭ ބިދޭސީން ހޯދުމަށް އިމިގްރޭޝަނާ ފުލުހުން ގުޅިގެން އޮޕަރޭޝަނެއްވެސް ވަނީ ފަށާފަ އެވެ. ރޭ އެކަނިވެސް ގަވާއިދާ ހިލާފަށް އުޅެމުންދާ 8 ބިދޭސީއަކު ވަނީ ހައްޔަރުކޮށްފަ އެވެ.
އެ އޮޕަރޭޝަންއާ ގުޅޭ ގޮތުން ރަސްމީ އެކައުންޓުން 'އެކްސް' ގައި ކުރި ޕޯސްޓެއްގައި ޝައްމާން ވިދާޅުވީ މިވަގުތު އިމިގްރޭޝަންގެ ފޯކަސް ހުރީ ދިވެހިން ކުރަމުންގެންދާ ކުދި އަދި މެދުފަންތީގެ ވިޔަފާރިތަކުގައި ގަވާއިދާ ހިލާފަށް ޝާމިލުވާ ބިދޭސީން ދެނެގަތުމުގެ މަސައްކަތް ކަމަށެވެ.
އޭނާ ވިދާޅުވީ އެފަދަ ތަންތަން ދެނެގަނެ އެ ފަރާތްތައް އިމިގްރޭޝަންގެ ބެލުމުގެ ދަށަށް ގެނެސް، ގާނޫނުގެ ދަށުން އަޅަން ޖެހޭ ފިޔަވަޅު އަޅަމުންދާނެ ކަމަށެވެ.
ޝައްމާން ވިދާޅުވީ އިމިގްރޭޝަނުން މަސައްކަތްކުރަނީ ރައީސް ޑރ. މުހައްމަދު މުއިއްޒުގެ ވައުދުފުޅާއި އެއްގޮތަށް، ރާއްޖެއަށް ދިމާވެފައިވާ ބިދޭސީންގެ މައްސަލަ އަށް އަވަސް ހައްލެއް ހޯދުމަށް ކަމަށެވެ. އެއަށް ފަހު އޭނާ ދެއްވި ޔަގީންކަމަކީ ހުއްޓުމެއްނެތި އެ މަސައްކަތް ކުރިއަށްދާނެ ކަމެވެ.
"ކުރިއަށް މިގެންދާ އޮޕަރޭޝަންތައް ހުއްޓުމެއްނެތި ކުރިއަށް ދާނެ ވާހަކަ ދަންނަވަން"
ހިޖުރީ އާ އަހަރާއި ގުޅިގެން މިރޭ ދެއްވި ހިތޯބުގައިވެސް ރައީސް މުއިއްޒު ވަނީ ބިދޭސީންގެ މައްސަލައާ މެދު ވާހަކަފުޅު ދައްކަވާފަ އެވެ. އެމަނިކުފާނު ވިދާޅުވީ ގާނޫނުތަކާ ހިލާފަށް އެތައް ބިދޭސީއަކު ރާއްޖޭގައި ދިރިއުޅެމުންދާ ކަމަށެވެ. މީގެ ތެރެއިން ގިނައީ ބަންގްލަދޭޝް މީހުންނެވެ.
ހޯމް މިނިސްޓަރު އަލި އިހުސާން ހިއްސާކޮށްފައިވާ މައުލޫމާތުތަކަށް ބަލާއިރު މިދިޔަ އަހަރުގެ ޑިސެމްބަރު މަހުގެ 17 ނިޔަލަށް ރާއްޖޭގައި މަސައްކަތްކުރާ ބަންގްލަދޭޝް މީހުންގެ އަދަދަކީ 90،624 އެވެ. އެ މުއްދަތުގެ ތެރޭގައި ވިސާއާ ވޯކް ޕާމިޓް ކެންސަލްކޮށް އަމިއްލަ ގޮތުން 206 މީހަކު އަނބުރާ ގައުމަށް ގޮސްފައިވެ އެވެ. މި ވަގުތު އެކްޓިވް ވޯކް ޕާމިޓްގެ އަދަދަކީ 135،679 އެވެ. 96،675 ބިދޭސީންނަކީ ގަވާއިދާ ހިލާފަށް އުޅެމުންދާ މީހުންނެވެ.
ސަރުކާރުން އަމާޒު ހިފާފައިވަނީ ކުރިއަށް އޮތް 3 އަހަަރު ތެރޭ ބިދޭސީންގެ މައްސަލަ ހައްލު ކުރުމަށެވެ. ރާއްޖޭގައި އުޅޭ ހުރިހާ ބިދޭސީންގެ އިނގިލީގެ ނިޝާނާއި ފޮޓޯ ނެގުމުގެ މަސައްކަތް ކުރިއަށް އެބަދެ އެވެ.
ރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދޫކުރާ ހުއްދަތަކަށް ވަޒީފާއާ ބެހޭ ގާނޫނާއި ގަވާއިދުގެ ދަށުން ދައްކަންޖެހޭ ފީތަކާއި ޖޫރިމަނާތައް، 10،619 ވަޒީފާދޭ ފަރާތުގެ ނަންމަތީގައި ރަޖިސްޓަރީ ކޮށްފައިވާއިރު 102،807 ބިދޭސީ މަސައްކަތްތެރީންގެ ފީގެ ގޮތުގައި ދައުލަތަށް 1.7 މިލިއަނެއްހާ ރުފިޔާ ދައްކަން ޖެހެ އެވެ.
ހައްލެއްނުވާނެތާ، މަދު ފައިސާކޮޅަކަށް ގައުމު ވިއްކައި ބިދޭސީންނަށް ވިޔަފާރި ހުއްދަތަކާއި އެކައުންޓްތައް ދީގެން ތިބި ދިވެހިން ހޯދައި އެޅޭނެ ފިޔަވަޅުތަކެއް ނުއުފެއްދިއެއް.