ރާއްޖޭގައި ބޭރުގެ ހަތިޔާރު އެޅި އެއްވެސް ސިފައިންނެއް ނެތް: އެމްއެންޑީއެފް
ރާއްޖޭގައި އެހެން ގައުމެއްގެ ހަތިޔާރު އެޅި އަސްކަރީ ސިފައިން ނުތިބޭނެ ކަމަށް އެމްއެންޑީއެފް އިން ބުނެފި އެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ޗީފް އޮފް ޑިފެންސް ފޯސް، މޭޖަރު ޖެނެރަލް އަބްދުﷲ ޝަމާލް ވިދާޅުވީ އެއްވެސް ގައުމެއްގެ މިލިޓަރީ ޕްރެސެންސް އެއް ރާއްޖޭގައި ނެތް ކަމަށެވެ.
އެމްއެންޑީއެފް އިން މިހެން ބުނެފައި މިވަނީ ރާއްޖޭގައި އިންޑިއާ އަސްކަރިއްޔާގެ ގިނަ އަދަދެއްގެ ބަޔަކު ހަރަކާތްތެރިވަމުން އަންނަ ކަމަށް އިދިކޮޅު ފަރާތްތަކުން ބުނަމުންދާ ދަނޑިވަޅެއްގައެވެ.
ހަނގުރާމަވެރި ހަތިޔާރު އަޅައިގެން ތިބޭ ސިފައިންގެ ފައުޖެއް ރާއްޖޭގައި ނެތް ކަން ފާހަގަ ކުރައްވައި ޝަމާލް ވިދާޅުވީ އެހެން ނަމަވެސް ހިއުމެނިޓެރިއަން ރޯލެއްގައި އިންސާނީ ހިދުމަތްތަކެއް ދިނުމަށް، ޓެކްނީޝަނުންގެ އެހީތެރިކަން އަބަދުވެސް ހޯދަމުން ދާކަމަށެވެ.
ޝަމާލް މިހެން ވިދާޅުވި ނަމަވެސް އިންޑިއާއިން ރާއްޖެއަށް ހަދިޔާކޮށްފައިވާ ހެލިކޮޕްޓަރުތައް ބެލެހެއްޓުމަށް އައްޑޫގައާއި ހައްދުންމަތީގައި އިންޑިއާގެ ސިފައިން ތިބޭ ކަމަށް އެ ދެ ސަރަޙައްދަށް ނިސްބަތްވާ ގިނަ ބަޔަކު ބުނެއެވެ.
Ads by STO
