ރާއްޖޭން 20 މިލިއަނެއްހާ ރުފިޔާ ފަލަސްތީނަށް ހަދިޔާކުރަނީ
އ.ދ ގެ މައި މަރުކަޒުގައި މިއަދު ކުރިއަށްދިޔަ 'އަންރުވާ ޕްލެޖިންގް ކޮންފަރަންސް' ގައި 1.29 މިލިއަން އެމެރިކާ ޑޮލަރު (ގާތްގަނޑަކަށް 20 މިލިއަން ރުފިޔާ) އަށް ވުރެ ބޮޑު އެހީއެއް ދިވެހިރާއްޖޭން ފަލަސްތީނަށް، އަންރުވާ މެދުވެރިކޮށް ހަދިޔާކުރަން ހަމަޖެހިފައިވާ ކަމަށް ދިވެހިރާއްޖޭން އ.ދ އަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. އަލީ ނަސީރު މުހައްމަދު ވިދާޅުވެއްޖެ އެވެ.
ދާއިމީ މަންދޫބުގެ ވާހަކަފުޅުގައި ދިވެހިރާއްޖޭން އަންރުވާއަށް ކޮންމެ އަހަރަކު ދެމުންގެންދާ އެހީ 5،000 އެމެރިކާ ޑޮލަރުން 50،000 އެމެރިކާ ޑޮލަރަށް އިތުރު ކުރުމަށް ދިވެހި ސަރުކާރުން ނިންމާފައިވާކަން ހާމަކުރެއްވި އެވެ. އަދި ރައީސް ޑރ. މުހައްމަދު މުއިއްޒުގެ އިސްނެންގެވުމުގެ ދަށުން "ފަލަސްތީނާއެކު ދިވެހީން" މި ނަމުގައި ގައުމީ ފެންވަރުގައި ބޭއްވި ޓެލެތޯނުން ލިބިފައިވާ 18.4 މިލިއަން ރުފިޔާ އަދި 49،800 އެމެރިކާ ޑޮލަރު އަންރުވާ މެދުވެރިކޮށް، ފަލަސްތީނުގެ ރައްޔިތުންނަށް ހަދިޔާކުރުމަށް ނިންމާފައިވާކަން ދާއިމީ މަންދޫބު ފާހަގަކުރެއްވި އެވެ.
ފަލަސްތީނުގެ ރައްޔިތުންނަށް ބޭނުންވާ އަސާސީ ހިދުމަތްތަކާއި ކުއްލި ނުރައްކާތަކުގައި އެހީތެރިކަން ފޯރުކޮށްދިނުމަށް އަންރުވާއިން ކުރަމުންދާ މުހިންމު މަސައްކަތާއި އަދާކުރަމުންދާ އިސް ދައުރު ފާހަގަކުރައްވައި ދާއިމީ މަންދޫބު ވަނީ މި މަސައްކަތްތައް އިތުރަށް ކުރިއަށް ގެންދިއުމަށް ބޭނުންވާ މާލީ އެހީތެރިކަން އިތުރުކުރުމަށް ބައިނަލްއަގުވާމީ މުޖުތަމައަށް ގޮވާލައްވާފަ އެވެ.
