ކުޑަކުރަނީ ސީނިއަ މެނޭޖްމަންޓުގެ މުސާރަ، އެލަވަންސް ދޭނީ ހައްގު ގޮތުގައި: މިފްކޯ
އެ ކުންފުނީގެ ހިންގުން ހަރުދަނާ ކުރުމަށް ކުރަމުން އަންނަ މަސައްކަތުގެ ތެެރެއިން އުނިކުރަނީ ސީނިއަ މެނޭޖްމަންޓުގެ މުސާރަ ކަމަށާއި އެލަވަންސް ދޭނީ ހައްގު ގޮތުގައި ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން ބުނެފި އެވެ.
މީސްމީޑިއާއަށް އާންމުކޮށްފައިވާ މިފްކޯގެ މެމޯއެއްގައި ވަނީ އެ ކުންފުނީގެ "އެފިޝިއަންސީ" އިތުރުކޮށް، "ރައިޓް ސައިޒް" ކުރުމަށް ކުރިއަށް ގެންދާ "މިފްކޯ އެފިޝިއަންސީ އެކްސަސައިޒް" ގެ ދަށުން މުވައްޒަފުންނާ ގުޅޭގޮތުން ކަންކަން ކުރުމަށް ކުންފުނީގެ ޑިރެކްޓަރުންގެ ބޯޑުގެ ބައްދަލުވުމަކުން ނިންމާފައިވާ ކަމަށެވެ. އެގޮތުން ކުރުމަށް ނިންމާފައިވާ ކަންކަމަކީ:
- ކުންފުނީގެ ސީނިއާ އަދި މިޑްލް މެނޭޖްމަންޓުގެ ވެރިންގެ އަސާސީ މުސާރައިން 20 އިންސައްތަ ކުޑަކުރުން
- މުވައްޒަފުންގެ މުސާރައިގެ އޮނިގަނޑުގައި ހުރި ފަރަގުތައް ކުޑަކުރަން ހުރިހާ ޑިޕާޓްމަންޓްތަކެއްގެ މުސާރައިގެ އޮނިގަނޑު "ހާމަނައިޒް" ކުރުން
- މަސައްކަތުގެ "ޕާފޯމެންސް" އަށް ބަލައި ވަޒީފާއިން ވަކިކުރަން ޖެހޭ މުވައްޒަފުން އުސޫލުތަކާ އެއްގޮތަށް ވަޒީފާއިން ވަކިކުރުން
- "ޕްރޮބޭޝަން" ގައި ތިބި މުވައްޒަފުންގެ "ޕާފޯމެންސް" އަށް ބެލުމަށްފަހު ކޮންމެހެން ކުންފުންޏަށް ބޭނުންވާ މުވައްޒަފުން ފިޔަވާ އެހެން މުވައްޒަފުން ވަޒީފާއިން ވަކިކުރުން
- 65 އަހަރު ވުމަށް ފަހު "ކޮންޓްރެކްޓް" މުވައްޒަފުންގެ ގޮތުގައި ތިބި މުވައްޒަފުންނަށް ތިން މަސް ދުވަހުގެ ނޯޓިސްއެއް ދިނުމަށް ފަހު ވަޒީފާއިން ވަކިކުރުން
- މިހާރު ދެމުންދާ އެލަވަންސްތައް "ހާމަނައިޒް" ކުރުމުގެ ގޮތުން ޑެޕިއުޓީ ހެޑް، އިންޖިނީރިން، ކޭން ޕްރޮޑަކްޝަން، ރިސްކް، ނޮން ޕްރެކްޓިސްއިން ދޭ އެލަވަންސްތައް ހުއްޓާލުން. އަދި ވިލިމާލެ ފެރީ އެލަވަންސް ފިޔަވާ އެހެނިހެން ފެރީ އެލަވަންސްތައް އުނިކުރުން.
- "ކޮންޓްރެކްޓް" މުވައްޒަފުންގެ ތެރެއިން ކުންފުންޏަށް ކޮންމެހެން ބޭނުންވާ ފަރާތްތައް ފިޔަވާ މި މަހުގެ ފަހުން މުއްދަތު ހަމަވާ ފަރާތްތަކުގެ ކޮންޓްރެކްޓް އާ ނުކުރުން
- އިތުރު ގަޑީގައި މަސައްކަތް ކުރަން ކޮންމެހެން ޖެހޭ ފަރާތްތައް ފިޔަވާ އިތުރު ގަޑީގައި މަސައްކަތް ނުކުރުވުން
- ކުންފުނި "ރައިޓް ސައިޒް" ކުރުމަށް ގެނެވޭ ބަދަލުތަކާ އެކު މުވައްޒަފުން ވަޒީފާއިން ވަކިވާން އެދޭނަމަ ތިން މަސް ދުވަހުގެ ޕެކޭޖަކާ އެކު ވަކިވުމުގެ ފުރުސަތު ހުޅުވާލުން
މިފްކޯގެ އެ މެމޯ އާ ހަވާލާދީ ތުހުމަތުކޮށްފައި ވަނީ ސިޔާސީ މުވައްޒަފުން ބޭތިއްބުމަށްފަހު އާދައިގެ މުވައްޒަފުން ވަޒީފާތަކުން ވަކިކުރަމުންދާ ކަމަށެވެ.
އެކަން ދޮގުކޮށް މިފްކޯއިން މީޑިއާތަކަށް ފޮނުވި މެސެޖެއްގައި ބުނީ އެ ކުންފުނީގެ ހިންގުން ހަރުދަނާކޮށް، ކުންފުނީގެ "ބްލީޑް" ވާ ދިމާ ދެނެގަތުމާއި އިސްރާފު ކުޑަކުރުމަށް ގެންނަމުންދަނީ ހެޔޮ ބަދަލެއް ކަމަށެވެ.
"އެއްވެސް އާދައިގެ މުވައްޒަފެއްގެ މުސާރައިން އުނިކުރުމެއް ނެތް. ޖީއެމް އަދި ސީނިއާ މެނޭޖްމަންޓް ލެވެލްއިން އެކަން ކުރަނީ. މީގައި ޝަކުވާއެއް އޮތަސް އޮންނާނީ އެ ލެވެލްއިން،" މިފްކޯއިން ފޮނުވި މެސެޖުގައިވެ އެވެ.
މިފްކޯއިން ބުނެފައި ވަނީ މިކަމުގައި އެ ކުންފުނިން އެއްވެސް އޮޅުވާލުމެއް ނުގެންގުޅޭނެ ކަަމަށެވެ. އެލަވަންސްތަކަކީ ވެސް ރަނގަޅު މުވައްޒަފުންނަށް ރަނގަޅަށް ލިބެން ޖެހޭ އެެއްޗެއްގެ ގޮތުގައި ކަންކަން ތަރުތީބު ކުރުމަކީ ނުހައްގު ކަމަކަށް ވުރެ، ހައްގު ގޮތުގައި ކަންކަން ތަރުތީބު ކުރުން ކަމަށް އެ ކުންފުނިން ބުނެ އެވެ. މިފްކޯއިން ބުނި ގޮތުގައި މިއީ ކުންފުނީގެ ވިސްނުން އަދި އަމާޒު ކަމުގަ އެވެ.
