ބިދޭސީއެއްގެ އަތުން ފޯނެއް ފޭރިގަތް ދެ މީހަކު ހައްޔަރުކޮށްފި
މަގުމަތިން ހިނގާފައި ދިޔަ ބިދޭސީއެއްގެ އަތުން ފޯނެއް ފޭރިގަތް ދެ މީހަކު ހައްޔަރުކޮށްފި އެވެ.
މިހާދިސާ ހިނގާފައިވަނީ މިއަދު މެންދުރު 12:38 ހާއިރު ހ. އެއްގަމުގެ ކައިރީގަ އެވެ. އެތަނުން ހިނގާފައި ދިޔަ ބިދޭސީ މީހާގެ އަތުގައި އޮތް ފޯނު ފޭރިގަތީ ސައިކަލުގައި ދިޔަ ދެ މީހަކު ކަމަށް ފުލުހުން ބުންޏެވެ.
މިމައްސަލައިގެ ރިޕޯޓު ލިބުމާއިއެކު ފުލުހުން ވަނީ ފޭރުނު ދެ މީހުން ހޯދުމުގެ މަސައްކަތް ފަށައިފަ އެވެ. ފުލުހުން ބުނީ ބިދޭސީ މީހާގެ ފޯނު ފުލުހުން ހޯދާފައިވާ ކަމަށެވެ.
އަދި މައްސަލައިގައި ޝާމިލުވާ ދެ މީހުން ހައްޔަރުކޮށްފައިވާ ކަމަށްވެސް ފުލުހުން ބުންޏެވެ.
އެގޮތުން ހައްޔަރު ކުރީ އުމުރުން 32 އަހަރުގެ ފިރިހެނަކާއި 36 އަހަރުގެ ފިރިހެނެކެވެ. މި ދެ މީހުންނަކީވެސް ދިވެހީންނެވެ.
މާލޭގައި ފޭރުމާއި ވައްކަމުގެ މައްސަލަތައް އިތުރުވަމުން ދާއިރު ރަހީނު ކުރުމާއި ބިރުދެއްކުން ފަދަ މައްސަލަތައްވެސް މިފަހުން ވަނީ ސިލްސިލާކޮށް އިތުރުވާން ފަށައިފަ އެވެ. ފުލުހުން ދަނީ މިކަންކަމަށް އާންމުން ސަމާލުވެ ތިބުމަށް ތަކުރާރުކޮށް އިލްތިމާސް ކުރަމުންނެވެ.
