ޗައިނާ އެފްޓީއޭން އިގުތިސޯދީ ސިޔާދަތަށް ނުރައްކާ އެބަ އޮތް: ފައްޔާޒު

ކުރީގެ ރައީސް އަބްދުﷲ ޔާމީނުގެ ވެރިކަމުގައި ގާއިމުކުރަން މަސައްކަތްކުރި ޗައިނާގެ ފްރީޓް ޓްރޭޑް އެގްރިމަންޓް (އެފްޓީއޭ) އެ ގޮތުގައި ތަންފީޒު ކުރުމަށް މި ސަރުކާރުން މަސައްކަތް ކުރާއިރު އެއީ އިގުތިސޯދީ ސިޔާދަތަށް ނުރައްކާ އޮތް ކަމެއް ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.

Ads by Hajj Corporation

އެމްޑީޕީން މިރޭ ކުރިއަށް ގެންދިޔަ ޕެނަލް ޑިސްކަޝަންގައި ވާހަކަ ދައްކަވަމުން ފައްޔާޒު ވިދާޅުވީ ޔާމީނުގެ ވެރިކަމުން ފެށިގެން ޗައިނާއާ އެކީގައި ގާއިމު ކުރަން މަސައްކަތް ކުރި އެ އެފްޓީއޭއާ މެދު ކަންބޮޑުވުންތަކެއް އޮތް ކަމަށެވެ.

އޭރު ޔާމީނުގެ ވެރިކަމުގައި ޗައިނާގެ އެ އެއްބަސްވުން ރައްޔިތުންގެ މަޖިލީހުން ފާސްކުރީ ވެސް އެއްވެސް ދިރާސާއެއް ނުކޮށް ކަން، އޭރު ރައްޔިތުންގެ މަޖިލީހުގެ ގަމު ދާއިރާގެ މެންބަރަކަށް އިންނެވި ފައްޔާޒު މިރޭ ފާހަގަ ކުރެއްވި އެވެ.

މިދިޔަ ސަރުކާރުގައި އެފްޓީއޭ ތަންފީޒުނުކޮށް ލަސްކުރީ އެ 1000 ސަފްހާގެ އެގުރިމަންޓް ދިރާސާ ކުރުމަށް ފަހު ނޫނީ ތަންފީޒު ނުކުރުމަށްކަމަށް އިކޮނޮމިކް މިނިސްޓަރުކަން ކުރެއްވި ފައްޔާޒު މިރޭ ވިދާޅުވި އެވެ. މިދިޔަ ސަރުކާރުގައި ދިރާސާކުރުމުން އޭގައި ގިނަ ކަންބޮޑުވުންތަކެއް ފާހަގަވި ކަމަށް ވިދާޅުވި އެވެ.

ފައްޔާޒު ފާހަގަ ކުރެއްވި ކަމަކީ އެފްޓީއޭގައި ޗައިނާގެ ގިނަ އަދަދެއްގެ މުދާ އެތެރެކުރުމަށް ހިމަނާފައިވާ ކަމަށެވެ. ރާއްޖޭން ހިމަނާފައިވަނީ ރާއްޖޭގައި އުފައްދާ މަހުގެ ބާވަތްތަކެއް އެކަނި ކަމަށެވެ. އެއީ މައިގަނޑު ގޮތެއްގައި ރާއްޖޭން އެކްސްޕޯޓް ކުރާ ހަމައެކަނި މުދަލެވެ.

"އިގުތިސޯދީ ސިޔާދަތު ހިފެހެއްޓޭނީ އަޅުގަނޑުމެންގެ ވިޔަފާރީގެ ސިޔާދަތު ހިފެހެއްޓިގެން. އަޅުގަނޑުމެންގެ ޓްރޭޑް ޕޮލިސީ މެއިންޓެއިން ކުރެވިގެން،"

ފައްޔާޒު ވިދާޅުވީ ޒަމާނުއްސުރެން ދިވެހި ސަރުކާރުތަކުން ވިޔަފާރީގެ މަސްލަހަތާއި އިގުތިސޯދީ ސިޔާދަތު ދަމަހައްޓާފައިވަނީ ދުނިޔޭގެ އެކި ކަންކޮޅުތަކުގައި ވިޔަފާރީގެ ގުޅުން ގާއިމުކޮށްގެންނެވެ.

އެންމެ ގާތް ގުޅުމެއް އޭގައި ގާއިމުކޮށްފައިވަނީ އަވައްޓެރި ގައުމުތައް ކަމަށްވާ، އިންޑިއާ އަދި ސްރީލަންކާއާ އެކީގައި ކަން ފާހަގަ ކުރެއްވި އެވެ. ދެން އެންމެ ގާތް ކަމެއް އޮންނާނީ ޗައިނާ، ދުބާއީ، ސިންގަޕޫރާ އެކީގައި ކަން ފާހަގަ ކުރެއްވި އެވެ. އަދި ކޮންމެ ވެސް ވަރެއްގެ ގުޅުންތަކެއް ޔޫރަޕުގެ ގައުމުތަކާ އެކު ކަމަށެވެ.

"މިހާތަނަށް ރާއްޖޭން އެ ކަން ބަލަހައްޓަމުން ދިޔައީ ވަރަށް ޒަމާނުއްސުރެން ފެށިގެން އުފައްދާފައިވާ ޓްރޭޑް ލިންކްތައް މެދުވެރިކޮށް. އެއިން ބޮޑު ބަޔަކީ އަޅުގަނޑުމެންގެ އަވައްޓެރި އިންޑިއާ އަދި ސްރީލަންކާ، ސިންގަޕޫރު، ދުބާއީ، އަދި ޗައިނާއިން ބައެއް ދެން. ޔޫރަޕުން ވެސް ކޮންމެ ވެސް ވަރަކަށް،" ފައްޔާޒު ތަފްސީލްކޮށްދެއްވި އެވެ.

ނަމަވެސް ޗައިނާއާއެކީ ގާއިމުކުރާ އެފްޓީއޭގެ ސަބަބުން ވިޔަފާރިވެރިންނަށް އެ ގައުމުން ނޫނީ މުދާ ގެނައުމަށް މަޖުބޫރު ވާނެ ކަމަށް ފައްޔާޒު ވިދާޅުވި އެވެ. އޭގެ ސަބަބުން ރާއްޖޭން ދެން ގާއިމުކޮށްފައިވާ ވިޔަފާރީގެ ގުޅުންތައް ފުނޑުފުނޑުވެ، ރާއްޖެއަށް އެއްވެސް ވަރަކަށް އިމްޕޯޓު ޑިއުޓީ ވެސް ނުލިބޭނެ ކަމަށް ވިދާޅުވި އެވެ.

"ޗައިނާއަކީ ބޮޑު ފެކްޓަރީއެއް މި ދުނިޔޭގެ، ނަތީޖާއެއްގެ ގޮތުން ޒަމާނުއްސުރެން މި އޮތް ޓްރޭޑް ލިންކްތައް މި ފުނޑުފުނޑު ވަނީ، ޗައިނާގެ ދަށަށް އަޅުގަނޑުމެންގެ މުޅި އިގުތިސޯދު އެ ދަނީ،" ފައްޔާޒު ވިދާޅުވި އެވެ.

ޒަމާނުއްސުރެން އިންޑިއާއާ ގާތް ގުޅުމެއް ބާއްވަމުން ގެންދާ ސިޔާސީ ޕާޓީއެއްގެ ގޮތުގައި އެމްޑީޕީ އޮތް އިރު، އެ ޕާޓީގެ ޗެއާޕާސަން ފައްޔާޒު ދެން ފާހަގަ ކުރެއްވި ކަމަކީ ޗައިނާއަކީ ވެސް މަސް އެކްސްޕޯޓް ކުރާ ގައުމެއް ކަމެވެ. ޗައިނާއިން މަސް ބޭރުކޮށްގެން ހޯދާ އާމްދަނީ 200 މިލިއަން ޑޮލަރަށް ވުރެ މައްޗެވެ.

"އެފްޓީއޭގެ މަންފާ މި ލިބެނީ މުދާ އެކްސްޕޯޓްކުރާ ގައުމުތަކަށް، މަހުގެ ބާޒާރަށް ބަލައިފިއްޔާ ޗައިނާއަކީ އަޅުގަނޑުމެންގެ ކޮމްޕެޓިޓާއެއް އަނެއްކާ ވެސް، އަޅުގަނޑަކަށް ހިއެއް ނުވޭ އެ ބުނާހާ ވަރަކަށް މަސް ޗައިނާއަށް ބޭރުވެސް ކުރެވިދާނެ ހެނެއް،" ފައްޔާޒު ވިދާޅުވި އެވެ.

ފައްޔާޒު ވިދާޅުވީ ދިވެހި މަހުގެ އުފެއްދުންތަކަށް ޗައިނާއަށް ވުރެ މާ ރަނގަޅު ބާޒާރުތައް އެބަ އޮތް ކަމަށެވެ. ދިވެހި މަހުގެ އުފެއްދުންތަކަށް ބާޒާރެއް ހޯދުމަށް ކުރި މަސައްކަތުގައި އެމްޑީޕީގެ ސަރުކާރުން އިނގިރޭސިވިލާތާ އެކީ މަހުގެ އުފެއްދުންތަކަށް ޓްރޭޑް އެގުރިމަންޓެއް ގާއިމުކޮށް ޕާޓްނާޝިޕެއް ގާއިމުކުރުމަށް މަސައްކަތް ކޮށްފައިވާ ކަން އޭނާ ފާހަގަ ކުރެއްވި އެވެ.

"އިނގިރޭސި ވިލާތަކީ އަޅުގަނޑުމެންގެ މަސް އެންމެ ގިނައިން ގަންނަ އެއް ގައުމު، އެމްއޯޔޫ ކުރިއަށް ގެންދިޔައިމަ ޒީރޯ ޓެރިފްގައި އެތެރެ ކުރެވޭނެ،" ފައްޔާޒު ވިދާޅުވި އެވެ.