އެނބުރި ގައުމަށްދާ ބިދޭސީންގެ ވަޒީފާގެ ސްޓޭޓަސް ކަށަވަރު ކުރަނީ
އިކޮނޮމިކް މިނިސްޓްރީން ހިންގާ ރިޕެޓްރިއޭޝަން ޕްރޮގްރާމްގެ ދަށުން ގައުމަށް އެނބުރި ދާން ރަޖިސްޓްރީވެފައި ތިބި ބަންގްލަދޭޝްގެ މީހުންނަކީ ސައްހަ އެމްޕްލޯއިމަންޓް އެޕްރޫވްގައި ތިބި މީހުންތޯ ބެލުމުގެ މަސައްކަތް ކުރަން ފަށައިިފިއެވެ.
އިކޮނޮމިކް މިނިސްޓްރީން ނެރުނު އިއުލާނެއްގައި ބުނެފައިވަނީ އެމީހުންގެ ވަޒީފާއާ ބެހޭ ސްޓެޓަސް ކަށަވަރު ކުރުމަށްޓަކައި އެބިދޭސީންގެ މައުލޫމާތު އާންމު ކޮށްފައިވާނެ ކަމަށެވެ.
މިޕްރޮގްރާމަކީ ދިވެހި ސަރުކާރާއި ބަންްގްލަދޭޝްގެ ސަރުކާރާއި ގުޅިގެން ހިންގާ ޕްރޮގްރާމެކެވެ. މި ފްރޮގްރާމަކީ ސައްހަ އެމްޕްލޯއިމަންޓު އެޕްރޫވަލެއް ނެތި ގަވައިދާ ހިލާފަށް ރާއްޖޭގައި މަސައްްކަތް ކުރަމުންދާ ބަންގްލަދޭޝް މީހުން އެނބުރި ގައުމަށް ފޮނުވުމަށް ހިންގާ ޕްރޮގްރާމެކެވެ.
މިޕްރޮގްރާމްގައި ގައުމަށް ފޮނުވަނީ ސައްހަ އެމްޕްލޯއިމަންޓު އެޕްރޫވަލް އޮތް ބިދޭސީން އެކަނި ނަމަވެސް ސައްހަ އެމްޕްލޯއިމަންޓް އެޕްރޫވަލެއްނެތި ގިނަ އަދަދެއްގެ ބިދޭސީން ގައުމަށް އެނބުރި ދިއުމަށް އެދި ހުށަހަޅަމުންދާ ކަމަށް މިނިސްޓްރީގެ އިއުލާނުގައި ވެއެވެ. އަދި އެ ފަރާތްތަކުން އެކަމަށް އެދެނީ ދޮގު މައުލޫމާތު ދީގެން ކަމަށްވެސް އިއުލާނުގައި ބުނެފައި ވެއެވެ.
މިއަދު އިކޮނޮމިކް މިނިސްޓްރީން އާންމު ކޮށްފައިވާ ލިސްޓުގައިވާ މީހުންނަކީ އެމްޕްލޯއިމަންޓް އެޕްރޫވަލް ދޫކުރެވިފައިވާ ވަޒީފާ ދޭ ފަރާތުގެ ވަޒީފާގައި މަސައްކަތް ކުރަމުން ދާ މީހުންނަމަ އެކަން ބަޔާން ކޮށް 15 ސެޕްޓެމްބަރުގެ ކުރިން [email protected] އަށް އީމެއިލް މެދުވެރިކޮށް އެކަން އެންގުމަށް އިއުލާނުގައި ވަނީ އެދިފައެވެ. މި އީމެއިލުގައި ބިދޭސީ މީހާގެ ނަމާއި ޕާސްޕޯޓު ނަންބަރާއި އަދި ވަޒީފާ ދޭ ފަރާތުުގެ މައުލޫމާތު ހިމަނަން ޖެހެއެވެ.
15 ސެޕްޓެމްބަރުގެ ކުރިން ވަޒީފާ ދޭ ފަރާތުން މިނިސްޓްރީއަށް މައުލޫމާތު ހިއްސާ ނުކުރާ މީހުންގެ ތެރެއިން ލިސްޓުގައި ހިމެނޭ ބިދޭސީން "ވޮލަންޓްރީ ރެފަޓްރިއޭޝަން" ޕްރޮގްރާމްގެ ދަށުން ގައުމަށް އެނބުރި ފޮނުވައިލެވޭނެ ކަމަށް އިއުލާނުގައި ބުނެފައި ވެއެވެ.
