ޕީޖީ ކަމުން ޝަމީމް އިސްތިއުފާ ދެއްވައިފި
ޕްރޮސެކިއުޓަ ޖެނެރަލް (ޕީޖީ) ކަމުން ހުސައިން ޝަމީމް އިސްތިއުފާ ދެއްވައިފި އެވެ.
ޕީޖީ އޮފީހުގެ "ހަބަރު ފީތާ" ގައި ދެންމެ ބުނި ގޮތުގައި ޝަމީމް މަގާމުން އިސްތިއުފާ ދެއްވުމުން މި ވަގުތަށް އެ އޮފީސް ހިންގުމާ ހަވާލުކޮށްފައިވާނީ ޑެޕިއުޓީ ޕްރޮސެކިއުޓަ ޖެނެރަލް މަހްމޫދު ސަލީމެވެ.
ޕްރޮސެކިއުޓަ ޖެނެރަލްގެ ގާނޫނުގެ ހަތްވަނަ މާއްދާގެ (ބ) ގައި ވާ ގޮތުން ޕީޖީގެ މަގާމު ހުސްވުމުން ވަގުތީ ގޮތުން ޑެޕިއުޓީ ޕްރޮސެކިއުޓަ ޖެނެރަލްއާ ޕީޖީ އޮފީސް ހިންގަން ހަވާލުކުރަން ޖެހެ އެވެ.
ޕީޖީ ޝަމީމް މަގާމުން އިސްތިއުފާ ދެއްވީ، އެ މަގާމުން އޭނާ ވަކިކުރުމަށް ރައްޔިތުންގެ މަޖިލީހުގެ ޖުޑިޝަރީ ކޮމިޓީން މިއަދު ފާސްކޮށް އެ މައްސަލަ މިރޭ ކުރިއަށްދާ ރައްޔިތުންގެ ޖަލްސާގައި ކުރިއަށް ދަނިކޮށެވެ.
ޝަމީމް ޖަވާބުދާރީވުމަށް ކޮމިޓީއަށް ހާޒިރުކުރީ ވެސް މިއަދެވެ. އެ ކޮމިޓީ ކުރިއަށް ގެންދިޔައީ މީޑީއާއާއި އާންމުން ނުވަދެވޭ ގޮތަށް ސިއްރުކޮށްގެނެވެ. ކޮމިޓީ މެންބަރުންގެ ވޯޓަކުން ކޮމިޓީއެއް ސިއްރުކުރުމަކީ ކޮމިޓީ މެންބަރުންނަށް ލިބިދޭ ބާރެކެވެ.
ޕްރޮސެކިއުޓަ ޖެނެރަލްގެ ގާނޫނު ބުނާ ގޮތުން، ޕްރޮސެކިއުޓަ ޖެނެރަލްގެ މަގާމު ފުރުއްވާ ބޭފުޅަކު އެ މަގާމަށް ގާބިލް ނޫން ކަމަށް ނުވަތަ މަގާމާ އެކަށޭނަ ނޫން ކަމެއް ކުރި ކަމަށް މަޖިލީހުގެ ކޮމިޓީއަކަށް ފެނިއްޖެ ނަމަ އެ މައްސަލައެއް މަޖިލީހުގެ ކަމާ ގުޅުން ހުރި ކޮމިޓީއަކަށް ބެލޭނެ އެވެ.
އަދި އެ ކޮމިޓީއަށް އެ ކަން ފެނިގެން ރައްޔިތުންގެ މަޖިލީހުގެ ތަޅުމަށް ހުށަހަޅައި، ވޯޓުގައި ބައިވެރިވެ މެންބަރުންގެ އަގުލަބިއްޔަތުން ވަކި ކުރުމަށް ފާސްކުރުމުން މަގާމުން ވަކިވީ ކަމަށް ވެސް ޕްރޮސެކިއުޓަ ޖެނެރަލްގެ ގާނޫނުގައި ބަޔާންކޮށްފައިވެ އެވެ.
Ny weekly I very delighted to find this internet site on bing, just what I was searching for as well saved to fav