އިންވެސްޓްކުރާ ބޭރު މީހުންނަށް ރާއްޖޭގެ ރެސިޑެންސީ ދޭން ޕްރޮގްރާމެއް
ބޭރުގައުމުތަކުގެ އިންވެސްޓަރުންނަށް ރާއްޖޭގައި އިންވެސްޓްކޮށްގެން ރެސިޑެންސީ ލިބޭ ގޮތަށް ރެސިޑެންސީ ޕްރޮގްރާމެއް ތައާރަފްކުރުމާ ގުޅޭ ގޮތުން މަޝްވަރާކުރަން ކެބިނެޓުގެ މިއަދުގެ ބައްދަލުވުމަށް ތާވަލުކޮށްފި އެވެ.
އެކަން ހާމަކުރެއްވީ ކެބިނެޓުގެ މިއަދުގެ ބައްދަަލުވުމުގެ އެޖެންޑާއާ ގުޅޭ ގޮތުން ރައީސް އޮފީހުން ސޯޝަލް މިޑީއާގައި ހިއްސާކުރި ވީޑިއޯއެއްގައި ރައީސް ޑރ މުހައްމަދު މުއިއްޒު އެވެ.
އެމަނިކުފާނު ވިދާޅުވީ އެ ޕްރޮގްރާމަކީ ރާއްޖޭގެ އިގްތިސާދު ސިންދަފާތު ކުރުމުގެ މަގުސަދުގައި ކުރުމަށް ނިންމާފައިވާ ނިންމުމެއް ކަމަށެވެ.
"މި އިގްތިސާދު ޑައިވާސިފައިކުރަން އިންވެސްޓާ ރެޒިޑެންސީ ޕްރޮގްރާމެއް ތައާރަފްކުރުން. މިކަމާއި ގުޅޭ ގޮތުން މަޝްވަރާކުރަން އެޖެންޑާކޮށްގެން މިއުޅެނީ" ރައީސް މުއިއްޒު ވިދާޅުވި އެވެ. ރައީސް ވިދާޅުވީ އެއީ ދުނިޔޭގެ ކުރިއަރާފައިވާ ބޮޑެތި ގައުމުތަކުގައިވެސް ހިންގަމުންދާ ޕްރޮގްރާމެއް ކަމަށެވެ.
ބެލެވޭ ގޮތުގައި ކެބިނެޓުން ނިންމާ ނިންމުން ރައީސް އޮފީހުން ހާމަކުރާނެ އެވެ.
މިއަދުގެ ކެބިނެޓު ބައްދަލުވުމުގެ އެޖެންޑާގައި ހިމެނޭ އިތުރު ކަންކަން:
- ރީޖަނަލް އެއާޕޯޓްސް ކޮމްޕެނީ އެމްއޭސީއެލްގެ ދަށަށް ބަދަލުކުރުން
- އެޗްޑީސީ އާއި ފަހިދިރިއުޅުން ކޯޕަރޭޝަން އެއްކޮށްލުން
- މޯލްޑިވްސް ފަންޑު މެނޭޖްމެންޓް ކޯޕަރޭޝަން ލިމިޓެޑް ބިޒްނަސް ސެންޓާ ކޯޕަރޭޝަން ލިމިޓެޑް، ދެ ކުންފުނި އެކުގައި މަސައްކަތްކުރެވޭނެ ގޮތް ހޯދުން
