ހޯމަ ދުވަހާ ހަމައަށް ވައި ގަދަވާނެ، ވިލާގަނޑުގައި 55 މޭލަށް ގަދަވާނެ ކަމަށް ލަފާ ކުރެވޭ
އަންނަ ހޯމަ ދުވަހާ ހަމައަށް ރާއްޖޭގެ ހުރިހާ ހިސާބަކަށް ވެސް ވައި ހިފަހައްޓާނެ ކަމަށާއި ވިލާގަނޑުގައި ގަޑިއަކު 55 މޭލަށް ވައި ގަދަވުމަކީ އެކަށީގެންވާ ކަމެއް ކަމުގައި ގައުމީ މޫސުމާ ބެހޭ އިދާރާ، މޯލްޑިވްސް މީޓިއޮރޮލޮޖިކަލް ސާވިސްއިން ބުނެފި އެވެ.
މެޓް އޮފީހުން މިއަދު ބުނީ ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ، ރާއްޖެ އާ ދުރުން އުތުރާއި ދެކުނުގައި ދެ ކޮޅިގަނޑު އުފެދިފައިވާ ކަމަށެވެ. ވޭތުވެދިޔަ ހަތަރު ދުވަހު އުތުރާއި މެދުރާއްޖެތެރޭގެ ސަރަހައްދަށް ވައި ވައިގަދަވެ، ވިލާގަނޑުގައި ވައި ވަރަށް ގަދަވި ކަމަށެވެ.
"އެގޮތުން ވިލާގަނޑުގައި އެންމެ ވައިގަދަވި ކަމަށް ރެކޯޑު ކުރެވިފައި ވަނީ ބ. ދަރަވަންދޫގައި 2024 އޮކްޓޫބަރު 09 ވަނަ ދުވަހު 23:10 ގައި ގަޑިއަކު 55 މޭލު ބާރުމިނަށް އަދި ހުޅުލެއަށް މިއަދު 05:40 ގައި ގަޑިއަކު 58 މޭލަށް އަދި 10:46 ގައި 61 މޭލު ބާރުމިނަށެވެ،"
މި މުއްދަތުގައި އެންމެ ބޯކޮށް ވާރޭވެހިފައިވާ ކަމަށް ރެކޯޑު ކުރެވިފައި ވަނީ މިދިޔަ އަންގާރަ ދުވަހު ފުވައްމުލައް ސިޓީއަށް ކަމަށެވެ. އެއީ 120 މިލިމީޓަރެވެ.
ރާއްޖޭގެ ހުރިހާ ސަރަހައްދަކަށް ވެސް ހޯމަ ދުވަހާ ހަމައަށް އާންމު ވައި ގަދަކޮށް ހިފަހައްޓާނެ ކަމަށް ލަފާކުރެވޭ ކަމަށް މެޓް އޮފީހުން ބުނެ އެވެ. އެގޮތުން އުތުރާއި މެދު ރާއްޖެތެރޭގެ އަތޮޅުތަކުގައި އެވްރެޖްކޮށް ގަޑިއަކު 15 މޭލާއި 25 މޭލާ ދެމެދު ވައި ޖެހި، ބޮޑު ބަޔަކަށް ގަދަ ވަޔާއެކު ވިއްސާރަކޮށް ގުގުރާނެ ކަމަށެވެ. އަދި ދެކުނުގެ ދެކުނުގެ އަތޮޅުތަކުގައި އެވްރެޖްކޮށް ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ބެލެވޭ ކަމަށެވެ. އަދި ބައެއް އަތޮޅުތަކަށް ގަދަ ވަޔާ އެކު ވިއްސާރަކޮށް ގުގުރާނެ ކަމަށެވެ.
"ވިލާގަނޑުގައި ހުރިހާ ހިސާބަކަށް ވެސް ގަޑިއަކު 45 މޭލާއި 55 މޭލަށް ވައިގަދަވުން އެކަށީގެންވެ އެވެ. އަދި ރާއްޖޭގެ ބޮޑު ބަޔަކަށް ގަދަވަޔާ އެކު ވިއްސާރަކޮށް ގުގުރާނެ ކަމަށް ލަފާ ކުރެވެ އެވެ. އާންމުކޮށް އުދައަރާ ސަރަހައްދުތަކަށް ދިޔަވަރު ބޮޑުވާ ގަޑިތަކުގައި އުދައިގެ އަސަރު ކުރުން އެކަށީގެންވެ އެވެ،"
އެ އޮފީހުން ވަނީ ގަދަ ވަޔާ އެކު ކަނޑުތައް ގަދަވެ، ބޯކޮށް ވާރޭވެހޭނެ ކަމަށް ލަފާ ކުރެވޭތީ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސްކޮށްފަ އެވެ. އަދި ކަނޑުދަތުރުކުރާ ފަރާތްތަކުން ދަތުރުތަކަށް ފެއްޓެވުމުގެ ކުރިން އެންމެފަހުގެ މޫސުމީ މައުލޫމާތު ހޯދުމަށް ވަނީ އެދިފަ އެވެ.
