އަލީ ވަހީދަށް ތުހުމަތު ކުރެވޭ ކޮރަޕްޝަންގެ މައްސަލަތަކެއް ބަލަނީ
ކުރީގެ ޓޫރިޒަމް މިނިސްޓަރ އަލީ ވަހީދުގެ މައްޗަށް ތުހުމަތު ކުރެވޭ ކޮރަޕްޝަންގެ މައްސަލައެއް އޭސީސީން ބަލަމުންދާ ކަމަށް އެކޮމިޝަނުން ބުނެފިއެވެ.
ކޮވިޑާއި ގުޅިގެން ކޮށްފައިވާ ޚަރަދުތައް ބެލުމަށްފަހު ނެރުނު އޮޑިޓް ރިޕޯޓުން ހާމަވާ ގޮތުގައި ޓޫރިޒަމް މިނިސްޓްރީން ވެސް ވަނީ ކޮރަޕްޝަނަަށް މަގުފަހިވާފަދަ ބައެއް ކަންކަން ކޮށްފައެވެ.
އޭސީސީން ތަހުގީގު ކުރަނީ އެރިޕޯޓުގެ މައްސަލައެވެ.
އެނގިފައިވާ ގޮތުގައި އޮޑިޓް ރިޕޯޓާ ގުޅިގެން އަށް މައްސަލައެއް އޭސީސީން އަންނަނީ ތަހުގީގު ކުރަމުންނެވެ. އަދި އެ މައްސަލަތައް ތަހުގީގު ކުރަމުން ދަނިކޮށް، އަމިއްލަ ފަރާތަކުން އިތުރު މައްސަލަތަކެއް ހުށަހެޅެމުން އެ މައްސަލަތައް ވެސް ބަަލަމުންދާ ކަމަށް އެކޮމިޝަނުގެ އޮފިޝަލަކު އޮންލައިން ނޫސް "ސަން" އަށް މައުލޫމާތު ދީފައިވެއެވެ.
"ޓޫރިޒަމްގެ އޮޑިޓްގައި ހުރި ކަންކަން އަޅުގަނޑުމެން ބަލަން ފެށީ. އޭގެ ތެރެއިން އަށް މައްސަލައެއް އަޅުގަނޑުމެން ތަހުގީގު ކުރަން ފަށާފައި ވަނީ. އެ ތަހުގީގު ކުރަމުން ދަނިކޮށް، އެ ކަންކަމާ ގުޅުވައިގެން އިތުރު ކަންތައްތަތަކެއް ފާހަގަކޮށް 7 ސެޕްޓެމްބަރުގައި އަމިއްްލަ ފަރާތްތަކުން ވަނީ މައްސަލަތަކެއް ހުށަހަޅާފައި،" އޭނާ ވިދާޅުވެފައިވެއެވެ.
މީގެއިތުރުން އޭނާ ވިދާޅުވީ، އަމިއްލަ ފަރާތަކުން އޭސީސީއަށް ހުށަހަޅާފައިވަނީ އަލީ ވަހީދަށާއި މިނިސްޓްރީގެ ބައެއް މުވައްޒަފުންނަށް ތުހުމަތުތަކެއް ކޮށް ކަމަށެވެ.
Ads by STO
