ރާއްޖެ އެެތެރެކުރަން އުޅުނު ދެ ކިލޯގެ މަސްތުވާތަކެތި އަތުލައިގެންފި
ވައިގެ މަގުން ރާއްޖެ އެތެރެ ކުރަން އުޅުނު 2.05 ކިލޯގެ މަސްތުވާތަކެތި އަތުލައިގެންފި އެވެ.
މޯލްޑިވްސް ކަސްޓަމްސް ސާވިސްއިން "އެކްސް" ގައި މިއަދު ކުރި ޕޯސްޓެއްގައި ބުނީ ރާއްޖެ އެތެރެކުރަން އުޅެނިކޮށް މިދިޔަ އަންގާރަ ދުވަހު އަތުލައިގެންފައިވަނީ މަސްތުވާތަކެތީގެ ބާވަތެއް ކަމަށްވާ ހެރޮއިން ކަމަށެވެ.
އެތަކެތި އަތުލައިގެންފައިވަނީ ވެލާނާ އިންޓަނޭޝަނަލް އެއާޕޯޓުން ކަމަށް ކަސްޓަމުން ބުންޏެވެ.
މި މަހުގެ 5 އަދި 7 ވަނަ ދުވަހުވެސް ރާއްޖެ އެތެރެކުރަން އުޅުނު މަސްތުވާތަކެތި އަތުލައިގެންފައިވެ އެވެ. އެއީ 5 ވަނަ ދުވަހު އަތުލައިގަތް ކޮކެއިންގެ ބަރުދަނުގައި 2.440 ކިލޯ ހުރިއިރު އެތަކެތި އަތުލައިގެންފައިވަނީ ވެލާނާ އިންޓަނޭޝަން އެއާޕޯޓުންނެވެ.
މި މަހުގެ 7 ވަނަ ދުވަހު އަތުލައިގެން ހެރޮއިންގެ ބަރުދަނުގައި 1.040 ކިލޯ ހުއްޓެވެ. އަދި އެ ތަކެތި އަތުލައިގަތީ ޕޯސްޓް މެދުވެރިކޮށް ރާއްޖެ އެތެރެކުރަން އުޅެނިކޮށެވެ.
އޭގެ އިތުރުން މިދިޔަ މަހު ވެސް ރާއްޖެ އެތެރެކުރަން އުޅުނު 3.588 ކިލޯގެ މަސްތުވާކެތި ކަސްޓަމުން އަތުލައިގެންފައިވެ އެވެ. އެއީ ހެރޮއިންގެ 3058 ގުރާމާއި ސިންތެޓިކް ކެތިނޯންގެ 215 ގުރާމް އަދި މެތްއެމްފެޓަމިންގެ 315 ގުރާމެވެ.
