ގަވާއިދާ ހިލާފަށް އުޅޭ ބިދޭސީން ދެނެގަންނަން ކ. ގުރައިދޫގައި ހާއްސަ އޮޕަރޭޝަނެއް
ގަވާއިދާ ހިލާފަށް އުޅޭ ބިދޭސީންނާ ގުޅޭ ރިޕޯޓުކަށް ބަލައި، ކަމާ ގުޅުންހުރި އިދާރާތަކުން ކ. ގުރައިދޫގައި ހާއްސަ އޮޕަރޭޝަނެއް ފަށައިފި އެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ އިތުރުވުމާ ގުޅިގެން އެފަދަ މައްސަލަތައް ރިޕޯޓު ކުރުމަށް ހާއްސަކޮށް އިމިގްރޭޝަނުން، އިމިގްރޭޝަން ވޮޗް އިފުތިތާހުކޮށްފައި ވަނީ މިދިޔަ ޖުލައި މަހުގެ 17 ވަނަ ދުވަހު އެވެ. އިމިގްރޭޝަން ވޮޗް އިފުތިތާހުކުރި ފަހުން މިހާތަނަށް ޖުމްލަ 861 ކޭސް ރިޕޯޓުކޮށްފައިވެ އެވެ.
މޯލްޑިވްސް އިމިގްރޭޝަނުން މިއަދު "އެކްސް" ގައި ކުރި ޕޯސްޓެއްގައި ބުނީ ރަށްރަށުގައި ގަވާއިދާ ހިލާފަށް އުޅޭ ބިދޭސީންނާ ގުޅޭ ރިޕޯޓުތައް ބެލުމަށް ފެށި މަސައްކަތުގެ ތެރެއިން ގުރައިދޫގައި ހާއްސަ އޮޕަރޭޝަނެއް މިވަގުތު ފަށައިގެން ކުރިއަށްދާ ކަމަށެވެ.
އޮޕަރޭޝަން ކުރިއަށް ގެންދަނީ އިމިގްރޭޝަނާއި ފުލުހުން އަދި ކަމާ ގުޅުންހުރި އެހެނިހެން އިދާރާތަކާ ގުޅިގެންނެވެ.
އިމިގްރޭޝަނުގެ ކޮންޓްރޯލަރު މުހައްމަދު ޝަމްއާން މިފަހުން ވިދާޅުވެފައި ވަނީ "އިމިގްރޭޝަން ވޮޗް" އަށް މިދިޔަ ހޯމަ ދުވަހާ ހަމައަށް ޖުމްލަ 861 މައްސަލަ ހުށަހެޅުނު ކަމަށެވެ. އޭގެ ތެރެއިން 596 މައްސަލައެއް އިމިގްރޭޝަނުން ބަލާފައިވާ ކަމަށެވެ. މިހާތަނަށް ހުށަހެޅި މައްސަލަތަކުގެ ތެރެއިން 174 މައްސަލައަކީ އެ އިދާރާ އާ ގުޅުން ނެތް މައްސަލަތަކަށްވާއިރު، 91 މައްސަލައެއް ޔަގީންކުރުމުގެ މަސައްކަތް ދަނީ ކުރަމުންނެވެ.
އިމިގްރޭޝަނުން މިފަހުން އާންމުކުރި ތަފާސް ހިސާބުތައް ދައްކާ ގޮތުން އެ އިދާރާއަށް ހުށަހެޅި މައްސަލަތަކުގެ ތެރޭގައި އެންމެ ގިނައީ ގަވާއިދާ ހިލާފަށް ވިޔަފާރިކުރާ މައްސަލަތަކެވެ. އެގޮތުން އެ ބާވަތުގެ 221 މައްސަލަ ހުށަހެޅިފައިވެ އެވެ. އެއީ ހުށަހެޅުނު މައްސަލަތަކުގެ ނިސްބަތުން 34 އިންސައްތަ އެވެ.
ވޯކް ވިސާ އާ ގުޅުންހުރި 206 މައްސަލައެއް ހުށަހެޅުނުއިރު، ހަށިވިއްކުމާ ގުޅުންހުރި 50 މައްސަލައެއް ރިޕޯޓުކުރި އެވެ.
އަމިއްލަ އައިޑެންޓިޓީ ހާމަނުކޮށް، "އެނޮނިމަސް" ކޮށް ރިޕޯޓު ކުރެވޭ ގޮތަށް ތައާރަފުކުރި އިމިގްރޭޝަން ވޮޗަށް ގަވާއިދާ ހިލާފަށް އުޅޭ ބިދޭސީންގެ މައްސަލަ އާއި ރާއްޖެއަށް ވަގަށް އެތެރެވާން މަސައްކަތްކުރާ ބިދޭސީންގެ މައުލޫމާތު ވެސް ހިއްސާކުރެވޭނެ އެވެ.
އިމިގްރޭޝަން ވޮޗްގެ އެހީގައި 24 ގަޑިއިރު ރިޕޯޓު ކުރުމުގެ ފުރުސަތު ލިބިދެ އެވެ. ލިބޭ މައުލޫމާތުގެ އަލީގައި އިމިގްރޭޝަނުން ގެންދަނީ ރެއިޑްތައް ފުޅާކޮށް، އިތުރު ކުރަމުންނެވެ.
ގަވާއިދާ ހިލާފަށް އުޅޭ ބިދޭސީން ބަލައި ފާސްކުރުމަށް މާލެ އާއި ހުޅުމާލޭގައި ހިންގާ ރެއިޑްތަކުގެ އިތުރުން މާސް ދެ އިންސްޕެކްޝަނެއް ވެސް ވަނީ ކުރިއަށް ގެންގޮސްފަ އެވެ. މިހާތަނަށް އެގޮތަށް އުޅެމުން އައި 4،000 އަށް ވުރެ ގިނަ ބިދޭސީން ވަނީ ފޮނުވާލާފަ އެވެ.
