އޭސީސީ ހިނގަން ޖެހޭ ގޮތަކަށް ނުހިނގާ: ނާޒިމް
އެންޓި ކޮރަޕްޝަން ކޮމިޝަން (އޭސީސީ) ހިނގަން ޖެހޭ ގޮތަކަށް މިހާރު ނުހިނގާ ކަމަށް ރައްޔިތުންގެ މަޖިލީހުގެ ނައިބު ރައީސް, ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވެއްޖެ އެވެ.
ސަރުކާރުގެ ފަރާތުން އެންޓި ކޮރަޕްޝަން ކޮމިޝަން (އޭސީސީ) ގެ ރައީސްއާއި ނާއިބު ރައީސް އައްޔަންކުރުމަށް ރައީސުލްޖުމްހޫރިއްޔާއަށް ބާރުދިނުމަށް ހުށަހަޅާފައިވާ ބިލުގެ ބަހުސްގައި ނާޒިމް ވިދާޅުވީ އެއީ އަލަށް ކުރާ ކަމެއް ނޫން ކަމަށާއި ކުރީ ސަރުކާރުން ސިވިލް ސާވިސް ކޮމިޝަންގެ ރައީސް އައްޔަންކުރުމުގެ މަރުހަލާވެސް އެފަދައިން ބަދަލުކޮށްފައިވާ ކަމަށެވެ.
ކުރީ ސަރުކާރުން އޭސީސީގެ ފަސް މެންބަރުން އެއް ފަހަރާ ބަދަލުކޮށްފައިވާ ކަމަށް ނާޒިމް ވިދާޅުވި އެވެ. އަދި މިހާރު އޮތް ކޮމިޝަންގެ ދައުރުގައި ވެސް ބާކީ މުއްދަތު އޮތް ކަން ފާހަގަކުރައްވާ ނާޒިމް ވިދާޅުވީ އެ ކޮމިޝަންވެސް ރަނގަޅަށް މަސައްކަތް ކުރާނެ ގޮތެއް ހަދަން ޖެހޭ ކަމަށެވެ.
އެންޓި ކޮރަޕްޝަން ބޯޑު ހިނގަން ޖެހޭ ގޮތަށް ހިނގާ ކަމަކަށް ރާއްޖޭގެ އެއްވެސް ރައްޔިތަކު ގަބޫލުނުކުރާ ކަމަށް ނާޒިމް ވިދާޅުވި އެވެ.
"އަޅުގަނޑު އެދެނީ އެންޓި ކޮރަޕްޝަންގެ މެންބަރުން އެ ބޭފުޅުން 5 މެންބަރުން ތިއްބަވާއިރު ދެން ތިއްބާ ބާކީ މެންބަރުންވެސް ހިހޫތަނުން ކާލައިގެން, އެއްވެސް ކަމެއް ނުކޮށް ތިބެވޭ ގޮތަށް އެ މީހުންނަށް ޖާގަ ދީގެން ހުންނަ ކަހަލަ ރައީސްއަކު އެތަނަށް ލައިގެން އަނެއްކާވެސް މި ފަސް އަހަރު ވެސް ކޮރަޕްޝަން ހިނގާ ގޮތަށް ހިނގަން ދޫކޮށްލީމަކާ އަޅުގަނޑުމެންނަށް އެ ތަން ބަލާކަށް ނުތިބެވޭނެ"
ނާޒިމް ވިދާޅުވީ ރައްޔިތުން ސުޕަމެޖޯރިޓީ ދިނީ ގައުމުގެ ކަންކަން އިސްލާހުކުރަން ކަމަށާއި ކޮރަޕްޝަންގެ ކަންކަން އިސްލާހުވާ ތަން ނުފެންނަ ކަމަށެވެ.
ނާޒިމް ވިދާޅުވީ ނުހައްގުން މީހުން މުއްސަނދިވަމުން ގޮސް މީހުންގެ ބިންބިމާއި އިމާރާތްތައް ގަންނަމުންދާ ކަމަށާއި އެޕްއޭއެމްގެ ރައީސްވެސް ދެ އެޕާޓްމަންޓް ގަނެގެން އެތައް ކަމެއްކުރި އިރު ކަންތައްވީ ގޮތް ފެނުނު ކަމަށެވެ.
އޭނާ ވިދާޅުވީ އެންޓި ކޮރަޕްޝަން ބޯޑެއް އޮތް ނަމަވެސް އެކަން އެނގުނީ އެޕްއޭއެމްގެ ރައީސްވެސް ގެއިން ނެރެން ޖެހޭ ހިސާބުން ކަމަށެވެ.
