އޭނާގެ ބަސްތައް ކޮންޓްރޯލު ނުކުރެވޭ މީހާ ވާނީ އަނގަ ހުތުރު، ހިތް ފަސާދަވެފައިވާ މީހަކަށް: ހުތުބާ
އިންސާނާއަށް އޭނާގެ ބަސްތައް ކޮންޓްރޯލު ނުކުރެވިއްޖެ ނަމަ އޭނާއަކީ އަނގަ ހުތުރު، ހިތް ފަސާދަވެފައިވާ މީހަކަށް ވެދާނެ ކަމުގައި މިއަދުގެ ހުކުރު ހުތުބާގައި ބުނެފި އެވެ.
ހަނުހުރުމުގެ އަހުލާގާ ގުޅޭގޮތުން ހުތުބާގައި ބުނީ ކަމަކާ މެދު އިންސާނާ ވިސްނައި، އޭނާގެ އަމަލުތައް މުރާޖައާކޮށް، އޭނާގެ ކަންތައްތަކަށާއި ހާލަތްތަކަށް ބަލައި ވަޒަންކުރާއިރު، އޭނާ ހަނުހުރުމުގެ އަތަށް ލެނބޭ ކަމަށެވެ. ހަނުހުރުމަކީ މުއުމިނުންގެ ސިފަތަކުގެ ތެރޭގައި ހިމެނޭ ސިފައެއް ކަމަށެެވެ. އެއީ ބުއްދިވެރީންނާއި ވިސްނުންތެރީންގެ ސިފައެއް ކަމަށެވެ.
މާތް ﷲ އާއި އެކަލާނގެ ރަސޫލާ މީސްތަކުންނަށް ގޮވައިލައްވަނީ ހަނު ހުރުމަށެވެ. އަނގަގަދަ ނުކުރުމަށެވެ. ބުއްދިވެރި ގޮތަކީ މަސްލަހަތެއް ނެތް ނަމަ، ހަނުހުރުމަށާއި ބޭކާރު ވާހަކަތައް ނުދެއްކުމެވެ. ނަބިއްޔާ ހަދީސްކުރެއްވި ބަސްފުޅެއްގެ މާނައިގައިވެ އެވެ. "ﷲ އަށާއި އާހިރަތް ދުވަހަށް އީމާންވާ މީހާ ފަހެ ހެޔޮ ބަސް ބުނާށެވެ! ނުވަތަ އެމީހަކު ހަނުހުންނަ ހުށްޓެވެ!"
ހެޔޮ ނޫން ބަހެއް ބުނުމަކީ ބާތިލު ބަހެއް ބުނުންކަން ފާހަގަކޮށް ހުކުރު ހުތުބާގައި ބުނި ގޮތުގައި ވިސްނައިނުލައި އެއްޗެއް ބުނުމަކީ ކުށް ބަހެއް ބުނުން ކަމުގަ އެވެ. ހިފެހެއްޓުމެއްނެތް ދުލަކީ ޝައިތާނާގެ އަތަށް ދޫކޮށްލެވޭ ވާގަނޑެެއް ކަމުގަ އެވެ. ބާތިލު ވާހަކަތަކާ ދުރުހެލިވެ ހުންނަ މީހާ ވާނީ ސުވަރުގޭގެ އަހުލުވެރިއަކަށް ކަމުގަ އެވެ.
"އޭނާ ބާތިލު ވާހަކަ ދައްކަން ފަށައިފި ނަމަ ޝައިތާނާ އޭނާ އަތްއަތަށް ދަމާން ފަށައިފާނެތެވެ. އެކަލޭގެ އެދޭ ގޮތަށް އެދޭ ކޮންމެ ވަގުތަކު އޭނާ އަނބުރައިލައިފާނެ އެވެ. އިންސާނާއަށް އޭނާގެ ބަސްތައް ކޮންޓްރޯލު ނުކުރެވިއްޖެ ނަމަ އޭނާއަކީ އަނގަ ހުތުރު، ހިތް ފަސާދަވެފައިވާ މީހަކަށް ވެދާނެ އެވެ،"
މިހެންވެ ކައުރަސޫލާ ހަދީސްކުރައްވާފައިވާ ބަސްފުޅެއްގެ މާނައިގައިވެ އެވެ. "ހިތް ސީދާ ވެއްޖައުމަށް ދާންދެން އެއްވެސް އަޅެއްގެ އީމާންކަން ސީދާ ނުވާނެތެވެ. އަދި އޭނާގެ ދޫ ސީދާ ވެއްޖައުމަށް ދާންދެން އޭނާގެ ހިތް ސީދާ ނުވާނެތެވެ."
މިއަދުގެ ހުތުބާގައި ބުނީ އިންސާނާ ވަޒަން ކުރެވޭނީ އޭނާގެ ދުލުން ބުނާ ބަސްތަކުން ކަމަށެވެ. އޭނާ ހަނުހުރެއްޖެ ނަމަ އޭނާ އާ މެދު، ނިޔާއެއް ކަނޑައަޅަން ނޭނގޭނެ ކަމަށެވެ. އޭނާ ވާހަކަ ދައްކައިފި ނަމަ، އޭނާގެ ޝަހްސިއްޔަތު ފާޅުވާނެ ކަމަށެވެ. ހަރުދަނާ ކަމާއި ދޯހަޅިކަން ފެނިދާނެ ކަމަށެވެ.
މުއުމިނާއަކީ އޭނާގެ ދުލަށް ރައްކާތެރިވާ މީހާ ކަމަށާއި އަމަލު ގިނަކޮށް ބަސް މަދުކުރާ މީހާ ކަމަށެވެ. މުއުމިނާ ވާހަކަ ދައްކާނީ އޭނާގެ ނަފުސަށާއި އޭނާގެ މުޖުތަމައަށާއި އޭނާގެ ވަތަނަށް ފައިދާ ހުރި ކަންކަމުގައި ކަމަށެވެ.
ރަސޫލާ މުސްލިމުންނަށް އަމުރު ކުރައްވަނީ ހެޔޮ ބަހެއް ނޫނީ ނުބުނުމަށެވެ. ރިވެތި ބަހުން މީހުންނާ މުހާތަބުކޮށް މުއާމަލާތުކުރާ މީހާއަށް ﷲ ގެ ހަޒުރަތުގައި މަތިވެރި މަގާމެއް ލިބެ އެވެ. މީސްތަކުންގެ ގާތުގައި ރުހުމާއި މަގުބޫލުކަން ލިބެ އެވެ. މީސްތަކުންގެ ގާތުގައި އޭނާ ވާނީ އެމީހުންގެ ހަޔާތަށް އަލިކޮށްދޭ ދަންމަރަކަށެވެ. މީސްތަކުން އޭނާއަށް އިތުބާރުކޮށް އޭނާގެ ގާތަށް ނަސޭހަތް ހޯދުމަށް އަންނާނެ އެވެ. އޭނާ ވާނީ މުޖުތަމައު އިސްލާހުކޮށްދޭ ފަރުދަކަށެވެ.
ހުތުބާގައި ބުނި ގޮތުގައި ހަނުހުރުމުގެ އިމަކީ އަމިއްލަ މީހާ އާ ބެހޭ ކަންކަމުގައި ރިވެތި ބަހުން ބަސްބުނުން ކަމުގަ އެވެ. މިއަދު ބުނާ ކޮންމެ ކަލިމައަކާ ބެހޭ ގޮތުން ގިޔާމަތް ދުވަހުން ސުވާލު ކުރެވޭނެ ކަމުގަ އެވެ. ވުމާ އެކު ވާހަކަ ދައްކަން ވާނީ އެކަމަށް ސަމާލުވެގެން ކަމުގަ އެވެ. މުއުމިނާއަކީ އޭނާގެ ދޫ ހެޔޮކަމުގެ ވަސީލަތެއް ކަމުގައި ހަދައި އެއިން ފަނާނުކޮށް އާރާސްތުކުރާ މީހާ ކަމުގަ އެވެ. އެއިން މީސްތަކުން ބައިބައިނުކޮށް އެކުވެރިކުރާ މީހާ ކަމުގަ އެވެ.
ދުނިޔެ އާއި އާހިރަތުގައި ނަޖާވުމުގެ ވަސީލަތަކީ ދޫ ރައްކާތެރި ކުރުމާއި ހަނުހުރުމެވެ. ނަޖާވުމާ ބެހޭގޮތުން ކީރިތި ރަސޫލާ ހަދީސްކުރައްވާފައިވާ ބަސްފުޅެއްގެ މާނައިގައިވެ އެވެ.
"ތިބާގެ ދޫ ރައްކާތެރި ކުރާށެވެ! އަދި ފިތުނަތަކުން ރައްކާތެރިވެ ހުރުމަށް ޓަކައި ތިބާގެ ގެ އިހުތިޔާރު ކުރާށެވެ! އަދި ތިބާގެ ކުށްތަކަށް ޓަކައި ދެރަވެ ރޯށެވެ!"
މާތް ﷲ އަށް ތަގުވާވެރިވެ، ހަނުހުރުމުގެ ހުލްގުން ޒީނަތްތެރިވުމަށް ގޮވާލައި މިއަދުގެ ހުކުރު ހުތުބާގައި ވަނީ ބޭނުންވާ މިންވަރަށް ވާހަކަ ދައްކަން އެދިފަ އެވެ. މި ޒަމާނުގެ މީސްމީޑިއާތަކުގެ މަންސަތަކަށް ވަދެ ވަގުތުތައް ބޭކާރު ގޮތުގައި ހޭދަ ނުކުރަން އިލްތިމާސްކޮށްފަ އެވެ. ވަގުތަކީ މާތް ﷲ ދެއްވި ނިއުމަތެއްކަން ފާހަގަކޮށް މި ނިއުމަތާ މެދު ގާފިލުވާ މީހުން ގިނައިރު، ނިއުމަތުގެ ބޭނުން ހެޔޮ ގޮތުގައި ހިފުމަށް އަޒުމު ކަނޑައެޅުމަށް ވަނީ ގޮވާލާފަ އެވެ.
