އައިޔޫއެމް އިތުރު ހަރުފަތަކަށް ގެންދިޔުމުގެ މަސައްކަތް އަންނަ އަހަރު ފެށޭނެ: ޝަހީމް
އަންނަ އަހަރު ވެގެންދާނީ އިސްލާމީ ޔުނިވާސިޓީ އޮފް މޯލްޑިވްސް (އައިޔޫއެމް) އަށް ފާގަތި އަހަރަކަށް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
އައިޔޫއެމްގެ ކުއްލިއްޔާ އޮފް ގުރްއާން އެންޑް ސުންނާގެ ފަރާތުން އިންތިޒާމުކޮށްގެން ބާއްވާ "މަހްފަލުލް ގުރްއާނިލް ކަރީމް 1446″ ގެ ފެށުމުގެ ރަސްމިއްޔާތުގައި ވާހަކަ ދައްކަވަމުން ޝަހީމް ވިދާޅުވީ އެ ޔުނިވާސިޓީ އިތުރު ހަރުފަތަކަށް ގެންދިއުމުގެ މަސައްކަތްތަކެއް ސަރުކާރުން އަންނަ އަހަރު ފަށާނެ ކަމަށެވެ.
"އަޅުގަނޑުމެންގެ، ރައީސް ޑރ. މުހައްމަދު މުއިއްޒުގެ އަމާޒަކީ ދިވެހިރާއްޖޭގެ އިސްލާމީ ޖާމިޔާއަކީ (އައިޔޫއެމް) އަކީ ދިވެހިރާއްޖޭގެ ދަރިންނަށް އެކަންޏެއް ނޫން. މި ސަރަހައްދުގެ މުސްލިމް އެހެން ޒުވާނުންނަށްވެސް ތައުލީމު ހާސިލްކުރާނެ މަރުކަޒަކަށް މި ޖާމިޔާވެގެން ދިއުން"
އިސްލާމިކް މިނިސްޓަރު ވަނީ ކީރިތި ގުރުއާންގެ އިލްމު ފެތުރުމަށްޓަކައި އައިޔޫއެމް އިން ކުރަމުންދާ މަސައްކަތްތަކުގެ އަގުވަޒަންކޮށްފަ އެވެ. އަދި އެކަމަށްޓަކައި މިނިސްޓަރު ވަނީ އެ ޔުނިވާސިޓީގެ އިސްވެރިންނާ މުދައްރިސުންނަށް ޝުކުރު އަދާކޮށްފަ އެވެ.
"ދިވެހިރާއްޖޭގެ މި އިސްލާމީ ޖާމިޔާއިން ކީރިތި ގުރުއާންގެ އިލްމު ރާއްޖޭގެ ކަންކޮޅުތަކުގައި ފެތުރުމަށް ކުރައްވަމުން ގެންދަވާ ބުރަ މަސައްކަތްތަކަށް އިސްލާމިކް މިނިސްޓްރީގެ ފަރާތުން އަބަދުވެސް ފުރިހަމަ އެއްބާރުލުމާ އެހީތެރިކަން ލިބޭނެ"
ޝަހީމް ވިދާޅުވީ އައިޔޫއެމްގެ މާޒީއަށް ބަލާލާއިރުގަ، ރާއްޖޭގެ އެކި ކަންކޮޅުތަކުގައި ކީރިތި ގުރުއާންގެ އިލްމު ފެތުރުމަށް ވަރަށް ގިނަ މަސައްކަތްތަކެއް ކުރެވިފައިވާ ކަމަށެވެ. އަދި އެކަމުގެ ނަތީޖާ މިހާރު ފެންނަމުންދާ ކަމަށްވެސް ވިދާޅުވި އެވެ.
އައިޔޫއެމް އުފެދުނީ 9 ޖުލައި 2015 ގައި ދިވެހިރާއްޖޭގެ އިސްލާމީ ޔުނިވާސިޓީގެ ބިލް ރައީސުލްޖުމްހޫރިއްޔާ ތަސްދީގު ކުރެއްވުމާ ގުޅިގެން، ކުރީގެ ކުއްލިއްޔަތުއް ދިރާސާތިލް އިސްލާމިއްޔާ، ދައުލަތުގެ ޔުނިވަސިޓީއަކަށް ބަދަލުކުރުމުންނެވެ. އެ ބަދަލަކީ، މަތީ ފެންވަރުގެ އިސްލާމީ ތައުލީމު އުނގެނުމަށް ބޭނުންވެފައި ތިބި ދަރިވަރުންނަށް، ރާއްޖޭގައި ތިބެގެން ތައުލީމު ހާސިލުކުރެވޭނެ މަގުފަހިކުރުމުގެ ގޮތުން ގެނެވުނު ބަދަލެކެވެ.
އައިޔޫއެމްގައި ފެންވަރު ހުރި ތައުލީމު ދިނުމަށްޓަކައި 2015 ވަނަ އަހަރުންފެށިގެން ހަރަކާތްތެރިވަމުން ދަނީ، އައު ބަދަލުތަކާއި އައު އީޖާދުތައް ތައާރަފުކުރުމުގަ އެވެ.
އައިޔޫއެމްގައި މިވަގުތު ހުރީ 5 ކުއްލިއްޔާއާއި 4 ސެންޓަރެވެ. އޭގެ ތެރޭގައި، ރިސާޗް އެންޑް ޕަބްލިކޭޝަން ސެންޓަރާއި، ޕޯސްޓްގްރެޖުއޭޓް ސެންޓަރު ހިމެނެ އެވެ. އެތަންތަނުން ގިނަ އަދަދެއްގެ ތައުލީމީ ޕްރޮގްރާމުތަކުގައި ޑިޕްލޮމާއާއި، ޑިގްރީއާއި މާސްޓާސް ފެންވަރަށް، ގުރްއާނުގެ އިލްމާއި އަރަބި ބަހާއި އިސްލާމީ ތަރުބިޔަތާއި، އެޑިޔުކޭޝަނާއި، ޝަރީއާތާއި ގާނޫނު ކިޔަވައިދެ އެވެ. ޑޮކްޓޯރަލް (ފީއެޗްޑީ) ކޯހެއް ވެސް އައިޔޫއެމް އިން ތައާރަފުކޮށްފައިވެ އެވެ.
