މުޒާހަރާއިން ހައްޔަރުކުރި މީހުންނާމެދު ކަންތައްކުރަމުންދަނީ ޤާނޫނުއަސާސީއާ ޚިލާފަށް: ވަކީލް އާދަމް
"އަޅުވެތިކަމާއި ދެކޮޅަށް" ޒުވާނުން މިއަދު ބޭއްވި މުޒާހަރާގައި ހައްޔަރު ކުރިި މީހުންނާއި މެދު ކަންތައް ކުރަމުން ދަނީ ޤާނޫނުއަސާސީއާއި ޚިލާފަށް ކަމަށް ރައީސް ޔާމީންގެ ވަކީލް އާދަމް ޝަމީމް ވިދާޅުވެއްޖެއެވެ.
ދާދި ދެންމެއަކު ޝަމީމް ކުރައްވާފައިވާ ޓްވީޓެއްގައި ބުނެފައިވަނީ ހައްޔަރު ކުރެވޭ ވަގުތުން ފެށިގެން ލަސްކުރުމެއްނެތި ޤާނޫނީ ވަކީލެއްގެ އެހީތެރިކަން ލިބުމުގެ ފުރުސަތު ކޮންމެ މީހަކަށްވެސް ފަހިކޮށް ދިނުމަކީ ދައުލަތުގެ ޒިންމާ އެއް ކަމަށެވެ. އެހެން ނަމަވެސް މިއަދުގެ މުޒާހަރާއިން ހައްޔަރު ކުރި މީހުން ވަނީ އެ ހައްޤުން މަހުރޫމް ކޮށްފައި ކަމުގައި ޝަމީމް ފާހަގަ ކުރައްވާފައިވެއެވެ.
"ދެން"އަށް މައުލޫމާތު ދެެއްވަމުން ޝަމީމް ވިދާޅުވީ މިއަދު ހައްޔަރު ކުރި މީހުންނާއި ބައްދަލު ކުރުމަށް އިދިކޮޅުގެ ވަކީލުން ދިއުމުން ފުލުހުންގެ ސިސްޓަމަށް ހައްޔަރުކުރި މީހުންގެ މައުލޫމާތު އެންޓާރ ނުވެ ހުރި ކަމަށްބުނެ އެތަނުން ވަކީލުން ފޮނުވާލައިފައިވާ ކަމަށެވެ.
މިއަދުގެ އެއްވުމުގައި ފުލުހުންގެ ބެލުމުގެ ދަށަށް 41 މީހަކު ވަނީ ގެންގޮސްފައެވެ.
