އޭއައިއައިބީގެ ރައީސްއާ ރައީސް މުއިއްޒު ބައްދަލުކުރައްވައިފި
އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ)ގެ ރައީސް އަދި ބޯޑް އޮފް ޑިރެކްޓާސްގެ ޗެއާ ޖިން ލީޗުންއާ ރައީސް ޑރ. މުހައްމަދު މުއިއްޒު ބައްދަލުކުރައްވައިފި އެވެ.
އެ ބައްދަލުވުން ކުރިއަށް ދިޔައީ މިހާރު އަޒަރުބައިޖާންގެ ވެރިރަށް ބަކޫގައި ކުރިއަށްދާ ކޮޕް ސަމިޓުގެ ހަވާސާގެ ތެރެއިން އެވެ.
އެ ބައްދަލުވުމުގައި ރައީސް ވަނީ އޭއައިއައިބީ އިން ރާއްޖެއަށް ދެއްވާ އެހީއަށް ޝުކުރު އަދާކުރައްވައިފަ އެވެ. އަދި އެ އެހީތެރިކަމަކީ ރާއްޖޭގެ ތަރައްގީގެ މަޝްރޫއުތަކަށް ޒަރޫރީ އެހީއެއްކަން ވެސް އެމަނިކުފާނު ވަނީ ފާހަގަ ކުރައްވައިފަ އެވެ.
އަދި ރާއްޖެއިން އެކުލަވާލުމުގެ މަސައްކަތް ފަށާފައިވާ، ގައުމީ ތަރައްގީގެ 20 އަހަރުގެ މާސްޓާ ޕްލޭން ފަދަ ދުރު ރާސްތާއަށް އެކަށައަޅާފައިވާ ލަނޑުދަނޑިތައް ހާސިލުކުރުމަށާއި، މޫސުމީ ބަދަލުތަކަށް ހޭނުމަށް ކުރާ މަސައްކަތްތައް ހަރުދަނާކުރުމަށް، އޭއައިއައިބީގެ އެއްބާރުލުމުގެ މުހިންމުކަމުގެ މައްޗަށް އެ ބައްދަުވުމުގައި ރައީސް ވަނީ އަލިއަޅުވާލައްވައިފަ އެވެ.
އެ ބައްދަލުވުމުގައި އޭއައިބީގެ ރައީސް ޖިން ވަނީ ރާއްޖެއިން ދެމެހެއްޓެނިވި ތަރައްގީއަށާއި ވިލުންތެރިކަން އިތުރުކުރުމަށް ކުރާ މަސައްކަތްތަކުގައި އޭއަައިއައިބީގެ އެއްބާރުލުން ލިބެމުންދާނޭ ކަމުގެ ޔަގީންކަން ދެއްވައިފަ އެވެ.
އެ ބައްދަލުކުރެއްވުން ނިންމަވާލައްވަމުން ދެ ލީޑަރުންވެސް ވަނީ، ވަސީލަތްތައް ސިންދަފާތުކުރުމުގެ މުހިންމުގެ މައްޗަށް މަޝްވަރާކޮށް، ރާއްޖޭގެ މޫސުމީ އަދި ތަރައްގީގެ ލަނޑުދަނޑިތަކާ ގުޅުންހުރި ދާއިރާތަކުގައި އެކުގައި މަސައްކަތްކުރުމަށް އެއްބަސްވެވަޑައިގެންފަ އެވެ.
