ގަވާއިދާ ހިލާފަށް ތިލަފުށީގައި އުޅުނު 33 ބިދޭސީއަކު ހައްޔަރުކޮށްފި

ތިލަފުށީގައި ގަވާއިދާ ހިލާފަށް އުޅޭ ބިދޭސީންނަށް އަމާޒުކޮށް ހިންގި ހާއްސަ ރެއިޑް އޮޕަރޭޝަނެއްގައި 33 މީހަކު މޯލްޑިވްސް އިމިގްރޭޝަނުގެ ބެލުމުގެ ދަށަށް ގެންގޮސްފި އެވެ.

Ads by MWSC

ގަވާއިދާ ހިލާފަށް އުޅޭ ބިދޭސީން ބަލައި ފާސްކުރުމަށް މާލެ ސަރަހައްދުގައި ހިންގާ ރެއިޑްތަކާ އަދި މާސް އިންސްޕެކްޝަންތަކުގެ އިތުރުން ރަށްރަށުގައި އުސޫލަށް ތަބާނުވާ ބިދޭސީންނާ ގުޅޭ ރިޕޯޓުތައް ބެލުމުގެ މަސައްކަތް ވެސް ވަނީ ފަށާފަ އެވެ. އެ މަސައްކަތުގެ ތެރެއިން މިދިޔަ މަހު ކ. ގުރައިދޫގައި ހާއްސަ އޮޕަރޭޝަނެއް ކުރިއަށް ގެންދިޔަ އެވެ.

އިމިގްރޭޝަނުން މިރޭ "އެކްސް" ގައި ކުރި ޕޯސްޓެއްގައި ބުނީ ތިލަފުށީގައި ގަވާއިދާ ހިލާފަށް އުޅޭ ބިދޭސީންނަށް އަމާޒުކޮށް ޓާސްކުފޯހުން ހާއްސަ ރެއިޑް އޮޕަރޭޝަނެއް ހިންގާފައި ވަނީ ބުރާސްފަތި ދުވަހުގެ ހެނދުނު ކަމަށެވެ.

އެ އޮޕަރޭޝަނުގައި އިމިގްރޭޝަނުގެ 28 އޮފިސަރުންނާ އަދި ފުލުހުންގެ 35 އޮފިސަރުން ބައިވެރިވި ކަމަށެވެ. ރެއިޑުގައި 257 ބިދޭސީއަކު ޗެކްކުރި ކަމަށް އިމިގްރޭޝަނުން ބުންޏެވެ.

"މީގެ ތެރެއިން ސައްހަ ވިސާއެއް ނެތި އުޅެމުންދިއަ 33 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެވި، 22 ފަރާތަކަށް ވަނީ ލިޔުމުން ނޯޓިސް ދެވިފައި،"

އެކި މައްސަލަތަކާ ގުޅިގެން ރާއްޖޭގައި ގަވާއިދާ ހިލާފަށް އުޅެމުން ދިޔަ 5،000 އަށް ވުރެ ގިނަ ބިދޭސީން މިހާތަނަށް ޑީޕޯޓުކޮށްފައިވާ ކަމަށް މިފަހުން ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާން ވަނީ ވިދާޅުވެފަ އެވެ.

ރާއްޖެއިން ފުރުވާލި ބިދޭސީންގެ ތެރޭގައި ސައްހަ ވިސާ ނެތި އުޅެމުންދިޔަ މީހުންނާއި އެކި ކުށްތަކަށް އަރައިގަންނަމުންދިޔަ ބިދޭސީން ހިމެނެ އެވެ. އޭގެ ތެރޭގައި މަސްތުވާތަކެތީގެ މައްސަލަތަކާއި ވައްކަމުގެ އިތުރުން ހަށިވިއްކުމުގެ ވިޔަފާރީގައި އުޅުނު ބިދޭސީން ހިމެނެ އެވެ.