ކުޑަކުދިންގެ ޒާާތީ މައުލޫމާތުތައް މީޑިއާތަކުން ހާމަނުކުރަން ފުލުހުން އިލްތިމާސްކޮށްފި
ކުޑަކުދިންގެ ޒާާތީ މައުލޫމާތުތައް މީޑިއާގެ ވަސީލަތްތައް މެދުވެރިކޮށް ހާމަނުކުރަން ފުލުހުން އިލްތިމާސްކޮށްފި އެވެ.
ކުޑަކުދިންގެ ޒާތީ މައުލޫމާތު އާއްމުކުރަމުންދާތިވެ ކަންބޮޑުވުން ފާޅުކޮށް މިއަދު ނެރުނު ބަޔާނެއްގައި ފުލުހުން ކުޑަކުދިންގެ މައުލޫމާތާ އެ ކުއްޖަކީ ކާކުކަން އެގޭ ގޮތަށް ފޮޓޯ އާއި މަންޒަރު އާއްމުކުރުމަކީ ކުޑަކުދިންގެ ކަރާމަތާއި ރައްކާތެރިކަމަށް އުނިކަން އަންނަ ފަދަ ކަމެއް ކަމަށެވެ.
އަދި ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ކުޑަކުދިންގެ ކަރާމާތަށް އުނިކަން އަންނަ ގޮތަށް
އެކުދިންގެ ޒާތީ މައުލޫމާތު އެއްވެސް ފަރާތަކުން އާންމުކޮށްގެން ނުވާނެކަމަށް ސާފުކޮށް ބަޔާންކޮށްފައިވާކަން ފާހަގަކޮށް ފުލުހުން ބުނީ ބައެއް މީޑިއާގެ މަންސަތަކުގައި ކުޑަކުދިންގެ މައުލޫމާތާއި ތަސްވީރު، އެ ކުދިންގެ ކަރާމާތަށް އުނިކަން އަންނަ ގޮތަށް ފަތުރަމުން ދިއުމުން އެ ކުދިންގެ މަސްލަހަތު ރައްކާތެރިނުކުރެވ،ި ކުއްޖާ ނުރައްކަލަށް ހުށަހެޅިދާނެ ކަމެއް ކަމަށެވެ.
"ހާއްސަކޮށ،ް ކުޑަކުދިންގެ ފޮޓޯ މީސްމީޑިއާގައި ދައުރުވަމުންދިއުމަކީ އެ ކުޑަކުދިންގެ ނަފްސާނީ އަދި ޖިސްމާނީ ދުޅަހެޔޮކަމަށް ނޭދެވޭ. އަސަރުކޮށްފާނެ ކަންކަމެވެ. އަދި މީގެ ސަބަބުން ކުޑަކުދިން އެކި ބާވަތުގެ އަނިޔާތަކަށް ހުށަހެޅުމުގެ ފުރުސަތު އިތުރުވެގެންދާނެ ކަމެއްވެސް މެއެވެ" ފުލުހުން ބުންޏެވެ.
އެހެންކަމުން ކުޑަކުދިންގެ މައުލޫމާތު އާންމުކުރާއިރ،ު އެ ކުދިންގެ ކަރާމަތާއި ރައްކާތެރިކަން ނެގެހެއްޓުމަށް ހާއްސަ ސަމާލުކަމެއް ދިނުމަށް ވަނީ އިލްތިމާސްކޮށްފަ އެވެ.
ކުޑަކުދިންގެ ފޮޓޯތަކާއި އެހެނިހެން ޒާތީ މައުލޫމާތު މީސްމީޑިއާގައާއި އެހެނިހެން މީޑިއާގެ ވަސީލަތްތަކުގައި ޝާއިއުކުރުމުން އެއްކިބާވެ ކުޑަކުދިންނާ ގުޅޭ މައުލޫމާތު ހާމަކުރުމުގައި ގާނޫނީ އިމުގެ ތެރެއިން އަމަލުކުރުމަށް މީޑިއާތަކާއި އާންމުންނަށް އިލްތިމާސްކޮށްފައިވެ އެވެ.
