ކެފޭތަކެއް ރެއިޑްކޮށް ގަވާއިދާ ހިލާފަށް އުޅުނު 4 ބިދޭސީއަކު އަތުލައިގެންފި
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ކުރަމުންދާ މަސައްކަތުގެ ތެރެއިން ކެފޭތަކެއް ރެއިޑްކޮށް ގަވައިދާ ހިލާފަށް އުޅުނު ހަތަރު ބިދޭސީން އަތުލައިގެންފި އެވެ.
މޯލްޑިވްސް އިމިގްރޭޝަނުން މިއަދު "އެކްސް" ގައި ކުރި ޕޯސްޓެއްގައި ބުނީ ގަވާއިދާ ހިލާފަށް ރާއްޖޭގައި އުޅޭ ބިދޭސީން ބަލައި ފާސްކުރުމަށް އެ އިދާރާއިން ފެށި މަސައްކަތް ހުއްޓުމެއްނެތި ކުރިއަށްދާ ކަމަށެވެ.
އެގޮތުން، އިއްޔެ ވެސް މާލޭގައި ހިންގަމުންދާ 9 ކެފޭއެއް ބަލައި ފާސްކޮށްފައިވާ ކަމަށެވެ. ސައްހަ ވިސާއެއް ނެތި ގަވާއިދާ ހިލާފަށް އެ ތަންތަނުގައި މަސައްކަތް ކުރަމުންދިއަ 4 ބިދޭސީއަކު އެ އިދާރާގެ ބެލުމުގެ ދަށަށް ގެނައި ކަމަށް އިމިގްރޭޝަނުން ބުނެފައިވެ އެވެ.
މިއީ މިފަހުން ކެފޭތައް ބަލައި ފާސްކުރުމަށް ގާތްގާތުގައި އިމިގްރޭޝަނުން ހިންގި ދެ ވަނަ އޮޕަރޭޝަނެވެ. ބުދަ ދުވަހު ހިންގި ރެއިޑުގައި 8 ކެފޭއެއް ބަލައި ފާސްކޮށް، ގަވާއިދާ ހިލާފަށް މަސައްކަތް ކުރަމުންދިޔަ 3 ބިދޭސީއަކު އެ އިދާރާގެ ބެލުމުގެ ދަށަށް ގެންދިޔަ އެވެ.
އިމިގްރޭޝަނުން ހިންގާ ރެއިޑްތަކުގައި ބޮޑަށް އިސްކަންދެނީ ގަވާއިދާ ހިލާފަށް ވިޔަފާރިކުރާ ބިދޭސީން ހޯދުމަށެވެ. ރެއިޑްތަކުގައި އެފަދަ ވިޔަފާރިތައް ހިންގާ ގިނަ ބިދޭސީންތަކެއް ދަނީ އަތުލައިގަންނަމުންނެވެ.
ގަވާއިދާ ހިލާފަށް އުޅޭ ބިދޭސީންނަށް އަމާޒުކޮށް މަސައްކަތް ކުރުމަށް އުފައްދާފައިވާ ޓާސްކްފޯހުން ގިނަ އޮޕަރޭޝަންތަކެއް ހުއްޓުމެއް ނެތި މިހާތަނަށް އައިއިރު ވަނީ ކުރިއަށް ގެންގޮސްފަ އެވެ. އެގޮތުން 200 އަށް ވުރެ ގިނަ އޮފިސަރުން ހިމަނައިގެން މާލެ އަދި ހުޅުމާލޭގައި މާސް އިންސްޕެކްޝަންތަކެއް ކުރިއަށް ގެންގޮސްފައިވެ އެވެ.
އޮޕަރޭޝަންތަކުގައި 1،300 އަށް ވުރެ ގިނަ ތަންތަން ބަލައި ފާސްކުރިއިރު، ޖުމްލަ 5،012 ބިދޭސީން ވަނީ ފުރުވާލާފައިވާ ކަމަށް އިމިގްރޭޝަނުން އެންމެފަހުން އާންމުކޮށްފައިވާ ތަފާސް ހިސާބުތަކުން ދައްކަ އެވެ.
ރާއްޖެއިން ފުރުވާލި ބިދޭސީންގެ ތެރޭގައި ސައްހަ ވިސާ ނެތި އުޅެމުންދިޔަ މީހުންނާއި އެކި ކުށްތަކަށް އަރައިގަންނަމުންދިޔަ ބިދޭސީން ހިމެނެ އެވެ. އޭގެ ތެރޭގައި މަސްތުވާތަކެތީގެ މައްސަލަތަކާއި ވައްކަމުގެ އިތުރުން ހަށިވިއްކުމުގެ ވިޔަފާރީގައި އުޅުނު ބިދޭސީން ހިމެނެ އެވެ.
