މިފްކޯއަށް ފުރަތަމަ ފަހަރަށް ރާއްޖޭން ބޭރުގެ ސީއީއޯއެއް
ސަރުކާރުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ސީއީއޯއަކަށް ޑރ. ވިޓާލީ ލުބިމޯވް އައްޔަންކުރައްވައިފި އެވެ.
ޔުކްރެއިނަށް ނިސްބަތްވެ ވަޑައިގަންނަވާ ޑރ. ވިޓާލީއަކީ ސްޓްރެޓީޖިކް ކްރައިސް މެނޭޖްމަންޓުގެ ދާއިރާގެ ސްޕެޝަލިސްޓެކެވެ. އެ ދާއިރާގައި އޭނާ ވަނީ 20 އަހަރަށް ވުރެ ގިނަ ދުވަހު މަސައްކަތް ކުރައްވާފަ އެވެ.
މިއީ މިފްކޯގެ ސީއީއޯގެ މަގާމަށް ރާއްޖޭން ބޭރުގެ ބޭފުޅަކު އައްޔަންކުރެއްވި ފުރަތަަމަ ފަހަރެވެ. އެ މަގާމަށް ޑރ. ވިޓާލީ އައްޔަންކުރައްވާފައި ވަނީ މަގާމަށް ދެ ފަހަރު އިއުލާނު ކުރުމަށް ފަހުގަ އެވެ. އެންމެ ފުރަތަމަ އެ މަގާމަށް އިއުލާނުކުރީ މިދިޔަ ޖޫން މަހުގެ 26 ވަނަ ދުވަހު އެވެ. އެ އިއުލާނު ޖުލައި މަހު ބާތިލު ކުރުމަށް ފަހު، ދެވަނަ ފަހަރަށް އިއުލާނުކުރީ ސެޕްޓެމްބަރު މަހުގެ 29 ވަނަ ދުވަހު އެވެ.
މިފްކޯއިން ބުނީ ސީއީއޯގެ މަގާމަށް އައްޔަން ކުރެއްވި ޑރ. ވިޓާލީ މާދަމާ ހެނދުނު ރަސްމީކޮށް މަސައްކަތާ ހަވާލުވެވަޑައިގަންނަވާނެ ކަމަށެވެ.
އެ ކުންފުނީގެ ސީއީއޯގެ މަގާމު ހުސްވެފައި ވަނީ ސަރުކާރުން އެ މަގާމަށް އައްޔަންކުރެއްވި އަހްމަދު ސަމާހު ރަޝީދު އެމަގާމުން ވަކިކުރުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ނިންމުމުންނެވެ.
ޕީސީބީން އިއުލާނުކޮށްފައިވާ ގޮތުން މިފްކޯގެ ސީއީއޯގެ މަގާމުގެ މުސާރައިގެ ގޮތުގައި މަހަކު 12،000 ޑޮލަރު (185،040ރ.) އާއި 15،000 ޑޮލަރު (231،300ރ.) ލިބޭނެ އެވެ. މަގާމު މުއްދަތަކީ 4 އަހަރު ދުވަހެވެ.
Ads by STO
