ރޯވި އަލިފާންގަނޑު 90 އިންސައްތަ ކޮންޓްރޯލްކޮށްފި
ހައުސިން، ލޭންޑް އެންޑް އާބަން ޑިވެލޮޕްމަންޓް އާއި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އަދި ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ ހިންގަމުން އަންނަ މ. ގްރީން ބިލްޑިންގައި ރޯވި އަލިފާންގަނޑު 90 އިންސައްތަ ކޮންޓްރޯލްކޮށްފައިވާ ކަމަށް އެމްއެންޑީއެފުން ބުނެފި އެވެ.
ގްރީން ބިލްޑިންގައި އަލިފާން ރޯވެފައި ވަނީ މިއަދު ހެނދުނު 7:30 ހާއިރު އެވެ. އެ ބިލްޑިންގައި އަލިފާން ރޯވުމާ ގުޅިގެން އެމްއެންޑީއެފްގެ ފަޔަ އެންޑް ރެސްކިޔު ސާވިސަސް އާއި ވީއައިއޭގެ ފަޔާފައިޓަރުން އެ ސަރަހައްދުގައި އަދިވެސް ދަނީ ހަރަކާތްތެރިވަމުންނެވެ.
ގްރީން ބިލްޑިންގައި ރޯވިއިރު، އެ އިމާރާތާ ޖެހިގެން ހުންނަ އޮފީސް އިމާރާތްތަކުންނާއި އެ ސަރަހައްދުގައި ހުރި ބައެއް އޮފީސް އިމާރާތްތަކުން މުވައްޒަފުން ވަނީ ނެރެފަ އެވެ. އަދި ކަމާ ގުޅުންހުރި އިދާރާތަކުން ވަނީ އެ ސަރަހައްދުގައި ހުރި ގެތަކުން މީހުން ނެރެ، ހުސްކޮށްފަ އެވެ.
އެމްއެންޑީއެފުން ދާދި ދެންމެއަކު ބުނީ އަލިފާނުގެ ހާދިސާ އާ ގުޅިގެން ޓިނު ބިލްޑިން ވަރަށް ބޮޑަށް އަނދާ ހުލިވެފައިވާ ކަމަށެވެ. އަދި އެ ބިލްޑިންގެ 90 އިންސިއްތަ އަލިފާން ނިއްވާލާފައިވާ ކަމަށެވެ.
"ގްރީން ބިލްޑިންގެ 2 ވަނަ އަދި 3 ވަނަ ފަންގިފިލާގައި އަދިވެސް އަލިފާން ވަނީ ރޯވެފަ. ޓިނު ބިލްޑިންގެ އޮޕޮޒިޓަށްވާ ގޮތަށް ހުރި "މަހުމާ ވިލާ" ގައި ކޮންމެވެސް ވަރަކަށް އަލިފާން ހިފާފައިވާ ކަމަށް،" އެމްއެންޑީއެފުން ބުންޏެވެ.
އަލިފާން ރޯވި ހާދިސާ އާ ގުޅިގެން ކޮންސްޓްރަކްޝަން މިނިސްޓްރީން ނެރުނު ނޫސް ބަޔާނެއްގައި ބުނީ އަލިފާނުގެ ހާދިސާ އާ ގުޅިގެން އެ މިނިސްޓްރީގެ އެއްވެސް މުވައްޒަފަކަށް ގެއްލުމެއް ލިބިފައިނުވާ ކަމަށެވެ.
"މި ހާދިސާގެ ސަބަބުން އިމާރާތަށް ބޮޑެތި ގެއްލުންތައް ލިބިފައިވާތީ، މިވަގުތު މިނިސްޓްރީން ދެމުންދާ އާންމު ހިދުމަތްތައް ވަގުތީގޮތުން މެދުކެނޑިފައިވާކަން ހިތާމަޔާ އެކު ދަންނަވަމެވެ،"
އެ ހިދުމަތްތަައް އަލުން ފެށޭނެ ތާރީހެއް ކަނޑައެޅުމަށްފަހު، އެކަން ވަގުތުން އިއުލާނުކުރާނެ ކަމަށް ވެސް ކޮންސްޓްރަކްޝަން މިނިސްޓްރީން ބުންޏެވެ.
ރައްޔިތުންނަށް ދިމާވެފައިވާ ދަތިތަކަށް މާފަށް އެދި އެ މިނިސްޓްރީން ވަނީ ވީހާވެސް އަވަހަށް ހިދުމަތްތައް އަލުން ފެށުމަށް މަސައްކަތް ކުރާނެ ކަމުގެ ޔަގީންކަން ދީފަ އެވެ.
ކޮންސްޓްރަކްޝަން މިނިސްޓްރީގެ ބަޔާނުގައި ވަނީ ހާދިސާ އާ ގުޅިގެން ކަމާ ބެހޭ އިދާރާތަކުންދޭ އެހީތެރިކަމާއި އެއްބާރުލުމަށް ޝުކުރު އަދާކޮށްފަ އެވެ.
