29 މީހަކު ވަގުތީ ހިޔާތަކަށް ބަދަލުކުރުމުގެ މަސައްކަތް ކުރަނީ
ތިން މިނިސްޓްރީއެއް ހިންގަމުން އައި މ. ގްރީން ބިލްޑިންގައި މިއަދު ހިނގި ނުރައްކާތެރި އަލިފާނުގެ ހާދިސާ އާ ގުޅިގެން އެ ސަރަހައްދުގައި ހުރި 3 އިމާރާތަކުން 29 މީހަކު ވަގުތީ ހިޔާތަކަށް ބަދަލުކުރުމުގެ މަސައްކަތް ކުރަމުން އަންނަ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.
ހައުސިން، ލޭންޑް އެންޑް އާބަން ޑިވެލޮޕްމަންޓް އާއި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އަދި ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ ހިންގަމުން އަންނަ ގްރީން ބިލްޑިންގައި އަލިފާން ރޯވެފައި ވަނީ މިއަދު ހެނދުނު 6:30 ހާއިރު އެވެ.
އެ ބިލްޑިންގައި ރޯވުމާ ގުޅިގެން އެމްއެންޑީއެފްގެ ފަޔަ އެންޑް ރެސްކިޔު ސާވިސަސް އާއި ވީއައިއޭގެ ފަޔާފައިޓަރުން ވަނީ އަލިފާން ނިއްވުމަށް އެ ސަރަހައްދުގައި ހަރަކާތްތެރިވެފަ އެވެ.
ގްރީން ބިލްޑިންގައި ރޯވިއިރު، އެ އިމާރާތާ ޖެހިގެން ހުންނަ އޮފީސް އިމާރާތްތަކުންނާއި އެ ސަރަހައްދުގައި ހުރި ބައެއް އޮފީސް އިމާރާތްތަކުން މުވައްޒަފުން ވަނީ ނެރެފަ އެވެ. އަދި ކަމާ ގުޅުންހުރި އިދާރާތަކުން ވަނީ އެ ސަރަހައްދުގައި ހުރި ގެތަކުން މީހުން ނެރެ، ހުސްކޮށްފަ އެވެ.
ތިން މިނިސްޓްރީއެއް ހިންގަމުން އައި އޮފީސް އިމާރާތުގައި ހިނގި އަލިފާނުގެ ހާދިސާ އާ ގުޅިގެން އެންޑީއެމްއޭ އާއި މޯލްޑިވިއަން ރެޑް ކްރެސެންޓް (އެމްއާރުސީ) ގެ ޓީމުތަކުން އެ ސަރަހައްދުގައި ވަނީ ހަރަކާތްތެރިވެފަ އެވެ.
އެންޑީއެމްއޭއިން ބުނެފައިވާ ގޮތުގައި އަލިފާނުގެ ހާދިސާ އާ ގުޅިގެން އެ އޮތޯރިޓީގެ އެހީތެރިކަމަށް އެދި 50 މީހުން ގުޅި ކަމުގަ އެވެ. އަދި އެ ފަރާތްތަކުގެ ރަޖިސްޓްރޭޝަން ހެދިފައިވާ ކަމަށާއި ބޭނުންވާނެ ޒަރޫރީ އެހީތެރިކަން ފޯރުކޮށްދިނުމަށް ސޯޝަލް ސެންޓަރުގައި ހެދިފައިވާ އިވެކުއޭޝަން ސެންޓަރު ވަނީ ތައްޔާރު ކުރެވިފައި ކަމުގަ އެވެ. އެހެންނަމަވެސް އާއިލާތަކުގެ އެދުމުގެ މަތިން ވަގުތީ ގޮތުން އެ ފަރާތްތައް ތިމާގެ ގޭގެއަށް ވަނީ ބަދަލުކުރެވިފައި ކަމުގަ އެވެ.
އެ އޮތޯރިޓީން ބުނީ 3 އިމާރާތެއްގެ 7 ގޭބީސީއަކުން 29 މީހަކު ވަގުތީ ހިޔާތަކަށް ބަދަލުކުރުމުގެ މަސައްކަތް މިވަގުތު ކުރަމުންދާ ކަމަށެވެ. އެއީ މ. ލޯކަށިގެ، މ. ކުދިމާވިލާ އަދި މ. ލޫބިޔާއިން ކަމަށެވެ.
"މިއީ 15 ފިރެހެނުންނާއި 14 އަންހެނުން. މީގެ ތެރޭގައި ސިއްހީ ހާއްސަ އެހީތެރިކަން ބޭނުންވާ ފަރާތެއް ވެސް ހިމެނޭ،"
އެ މަސައްކަތުގެ އިތުރުން އަލިފާނުގެ ހާދިސާ އާ ގުޅިގެން ފެނާއި ކަރަންޓުގެ ހިދުމަތް މެދުކެނޑިފައިވާ އިމާރާތްތަކަށް ފެނާއި ކަރަންޓު އަލުން ގުޅައިދިނުމުގެ ހިދުމަތް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އާއި މާލޭ ވޯޓަ އެންޑް ސްވަރޭޖް ކޮމްޕެނީ (އެމްޑަބްލިއުއެެސްސީ) އާ ގުޅިގެން ކުރަމުން އަންނަ ކަމަށް އެންޑީއެމްއޭއިން ބުންޏެވެ.
އެންޑީއެމްއޭއިން މީގެކުރިން ވަނީ ގެއްލުން ލިބުނު އިމާރާތްތަކުގެ ރެޕިޑް އެސެސްމަންޓެއް ހަދަމުންދާކަން ފާހަގަކޮށްފަ އެވެ. އަދި އެ ތަންތަނަށް މީހުން ބަދަލުވާން ރައްކާތެރި ނަމަ އާއިލާތައް ބަދަލުކުރަން އެހީތެރިކަން ފޯރުކޮށްދޭނެ ކަމަށް ވެސް ބުނެފައިވެ އެވެ.
ގްރީން ބިލްޑިންގައި ހިނގި ނުރައްކާތެރި އަލިފާނުގެ ހާދިސާ އާ ގުޅިގެން އެ ސަރަހައްދުގެ ޓްރެފިކް ފްލޯއަށް ވަނީ ބަދަލު ގެނެސްފަ އެވެ.
