ފްރާންސް އާއިލާއިން ރާއްޖޭގެ ރަށްވެހިކަމަށް އެދިއްޖެ

ރާއްޖޭގެ ރަށްވެހިކަން ނުލިބިއްޖެނަމަ ވިސާއެއް ނެތި ރާއްޖޭގައި އުޅޭ ފްރާންސު އާއިލާ ބޭނުންވަނީ ރާއްޖެ ދޫކޮށް ދާން ކަމަށް މޯލްޑިވްސް އިމިގްރޭޝަނުން މިއަދު ބުނެފި އެވެ.

Ads by Sosun Fihaara

ތ. ވޭމަންޑޫގައި ދިރިއުޅެމުންދާ 6 މީހުންގެ ފްރާންސްގެ އާއިލާ ރާއްޖޭގައި ގަވާއިދާ ހިލާފަށް އުޅޭތާ 12 އަހަރު ވެފައިވެ އެވެ. އެ މީހުން އަތުގައި ޓްރެވެލް އެއްވެސަ ޑޮކިއުމެންޓެއް ނެތް ކަމަށްވެ އެވެ.

އެ އާއިލާ ފުރުވާލަން އިމިގްރޭޝަނުން މަސައްކަތްކުރަމުންދާއިރު އެކަމުގެ ކަންބޮޑުވުން އާންމުން ދަނީ ފާޅުކުރަމުންނެވެ.

އަދި ޖަމިއްޔާއެއް ކަމަށްވާ, ޔޫތު ފޯ ޔުނިޓީއިން ރޭ އާޓިފިޝަލް ބީޗުގައި އެ މީހުން ފުރުވާލުމާ ދެކޮޅަށް އަޑުވެސް އުފުލި އެވެ. އެ މީހުންނަށް ރާއްޖޭގެ ރަށްވެހިކަން ނުވަތަ 'އެސައިލަމް' ދޭން އެއްވި މީހުން ގޮވާލާފައިވެ އެވެ.

އިމިގްރޭޝަންގެ މީޑިއާ އޮފިޝަލް "ދެން" އަށް ވިދާޅުވީ ފްރާންސްގެ އާއިލާއިން ރާއްޖޭގެ ރަށްވެހިކަމަށް އެދިފައިވާ ކަމަށެވެ.

މީޑިއާ އޮފިޝަލް ވިދާޅުވީ އެ މީހުންގެ އެއްވެސް ލިޔެ ކިޔުމެއް ނެތުމުން މިހާރު ކުރަމުންދަނީ ލިޔެކިޔުންތައް ހަމަކުރުމުގެ މަސައްކަތްތައް ކަމަށެވެ.

އެ މީހުން ފުރުވާލަނީ ކަމެއް ނުވަތަ ރާއްޖެ ނާދެވޭ ގޮތަށް ޑީޕޯޓްކޮށްލަނީކަމެއް މި ވަގުތު ބުނަން ދަތި ކަމަށް އޭނާ ވިދާޅުވި އެވެ.

"އިންޓަވިއުގައި އެ މީހުން ބުނެފައި އިނީ ސިޓިޒަންޝިޕް ލިބެން ނެތިއްޔާ އެ މީހުން ބޭނުންވަނީ ފުރަންށޭ"

އިމިގްރޭޝަން ކޮންޓްރޯލާ މުހައްމަދު ޝަމްއާން ވަހީދު ވިދާޅުވީ އެ އާއިލާގެ މައްސަލަ ބަލަންފަށައި އެ އާއިލާގެ އިސް ފަރާތް އިމިގްރޭޝަނަށް މިދިޔަ އޮކްޓޫބަރު މަހު ހާޒިރުވެސްކުރި ކަމަށެވެ.

އަދި އެ ފަރާތްތަކުގެ ޕާސްޕޯޓުގެ މުއްދަތު ހަމަވެފައިވާތީ އެ މީހުންގެ ޓްރެވަލް ޑޮކިއުމަންޓްސް ހޯދަމުންދާ ކަމަށާއި އެ ލިޔުންތައް ލިބުނުހާ އަވަހަކަށް އެ އާއިލާ ފޮނުވާލާނެ ކަމަށް ވެސް ޝަމްއާން މީގެ ކުރިން ވިދާޅުވެފައިވެ އެވެ.

ބޭރުގެ ފަރާތަކަށް ރާއްޖޭގެ ރަށްވެހިކަން ލިބޭނެ ކަމަށް ގާނޫނުގައި ބަޔާންކުރާ ޝަރުތުތައް:

• މުސްލިމަކު ކަމުގައިވުން.
• އުމުރުން 21 އަހަރުވެ، ބުއްދި ސަލާމަތުން ހުރި މީހަކު ކަމުގައިވުން.
• މެދުކެނޑުމެއްނެތި ރާއްޖޭގައި 12 އަހަރު ވަންދެން އުޅެމުން އައިސްފައިވާ މީހަކު ކަމުގައިވުން.
• ރާއްޖޭގެ ގާނޫނު އަސާސީގެ މައުލޫމާތު އެނގިހުރި މީހަކު ކަމުގައިވުން.
• ދިވެހި ބަހުން ވާހަކަ ދައްކަން އެނގުމާއެކު، ރާއްޖޭގެ އަސާސީ ތައުލީމުގެ މުގައްރަރުގައިވާ ފެންވަރަށް ތަކެތި ދަންނަ މީހަކު ކަމުގައިވުން.
• ސިޔާސީ ކުށެއް، ނުވަތަ ޝަރީއަތުގައި ހައްދު ކަނޑައެޅިފައިވާ ކުށެއް، ނުވަތަ، ގާނޫނާ ހިލާފަށް މަސްތުވާ ތަކެތި އުފެއްދުމާއި، ފެތުރުމާއި، އެތަކެތީގެ ވިޔަފާރި ކުރުމުގެ ކުށެއް ކޮށްފައިވާ މީހަކު ކަމުގައި ނުވުން.
• ރާއްޖެއަށް ބޭނުންތެރި މީހަކު ކަމުގައިވުން.
• އެމީހެއްގެ އަސްލު ސިޓިޒެންޝިޕް ދޫކޮށްލާނެ ކަމަށް އިގްރާރުވުމާއެކު، އެ ސިޓިޒެންޝިޕުން ތަނާޒުލްވުމާމެދު އިއްތިރާޒެއް ނެތްކަމުގެ ރަސްމީ ލިޔުމެއް، އެމީހެއްގެ ގައުމުގެ ސަރުކާރުން ހޯދައި ހުށަހެޅުން.